ລັດຖະມົນຕີການຕ່າງປະເທດມາເລເຊຍກ່າວວ່າ:ການລັກຟັງຈະທຳລາຍການພົວພັນລະຫວ່າງພັນທະມິດ
(GMT+08:00) 2013-11-03 14:06:20 cri
ວັນທີ 2 ພະຈິກນີ້, ກະຊວງການຕ່າງປະເທດມາເລເຊຍໄດ້ອອກແຈ້ງການໂດຍກ່າວວ່າ, ປະເທດທີ່ມີການພົວພັນອັນດີງາມບໍ່ຄວນດຳເນີນການເຄື່ອນໄຫວຕິດຕາມຕໍ່ປະເທດພັນທະມິດຂອງຕົນ, ເພາະວ່າເຮັດແນວນີ້ຈະກະທົບເຖິງການພົວພັນລະຫວ່າງສອງຝ່າຍໃນປັດຈຸບັນ.
ແຈ້ງການດ່ັງກ່າວຂຽນວ່າ, ໃນເວລາເຂົ້າຮ່ວມກອງປະຊຸມສະຫະພັນການຮ່ວມມືພາກພື້ນບໍລິເວນມະຫາສະຫມຸດອິນເດຍຄັ້ງທີ 13, ທ່ານ ອານີຟັນ ອາມັນ ລັດຖະມົນຕີວ່າການກະຊວງການຕ່າງປະເທດມາເລເຊຍໄດ້ພົບປະກັບທ່ານ ຈູລີ ບີຊົບ ລັດຖະມົນຕີວ່າການກະຊວງການຕ່າງປະເທດອົສຕຼາລີ, ສວຍໂອກາດນີ້ໄດ້ສະແດງຄວາມບໍ່ພໍໃຈຕໍ່ອົສຕຼາລີທີ່ມີຂ່າວເປີດເຜີຍວ່າອົສຕຼາລີໄດ້ມີການເຄື່ອນໄຫວຕິດຕາມມາເລເຊຍ.
ທ່ານບິຊົບກ່າວວ່າ, ອີງຕາມນະໂຍບາຍຂອງລັດຖະບານອົສຕຼາລີ, ທ່ານຈະບໍ່ຕອບຕໍ່ເຫດການດັ່ງກ່າວ, ແຕ່ຈະໃຫ້ຄວາມສົນໃຈຕໍ່ຄວາມວິຕົກກັງວົນຂອງມາເລເຊຍທີ່ມີຕໍ່ເຫດການນີ້, ແລະຮັບປະກັນ ວ່າລັດຖະບານອົສຕຼາລີຈະຖືການພົວພັນອັນສະຫນິດສະຫນົມກັບມາເລເຊຍເປັນຜົນປະໂຫຍດສຳຄັນແລ້ວພິຈາລະນາເລື່ອງນີ້.
ນອກນີ້, ເມື່ອມີຂ່າວລາຍງານວ່າ, ເອກອັກຄະລັດຖະທູດອາເມລິກາປະຈຳມາເລເຊຍແລະເຈົ້າຫນ້າທີ່ສູງສຸດຂອງອົສຕຼາລີ ປະຈຳຢູ່ມາເລເຊຍມີການເຄື່ອນໄຫວຕິດຕາມມາເລເຊຍແລ້ວ, ວັນທີ 2 ພະຈິກນີ້, ກະຊວງການຕ່າງປະເທດມາເລເຊຍກໍ່ໄດ້ຮຽກພົບຜູ່ຕາງຫນ້າຂອງສອງປະເທດນີ້, ເພື່ອຍື່ນຫນັງສືປະທ້ວງ.
