ກອງປະຊຸມຄົບຄະນະຄັ້ງທີ3ຂອງສູນກາງພັກກອມມູນິດຈີນສະໄໝທີ18ຈະວາງແຜນການພັດທະນາສັງລວມ
ຕາມຂ່າວCRI: ວັນທີ 2 ພະຈິກນີ້, ໃນເວລາພົບປະຜູ້ຕາງໜ້າຕ່າງປະເທດທີ່ເຂົ້າຮ່ວມກອງປະຊຸມປັກກິ່ງສະພາມົນຕີສັດຕະວັດທີ 21 ຢູ່ທີ່ປັກກິ່ງ, ທ່ານສີຈີນຜີງ ປະທານປະເທດຈີນກ່າວວ່າ, ການປະຕິຮູບ ແລະ ເປີດປະຕູສູ່ພາຍນອກຂອງຈີນຈະດຳເນີນໄປໂດຍຕະຫຼອດ. ອີກບໍ່ເທົ່າໃດມື້, ກອງປະຊຸມຄົບຄະນະຄັ້ງທີ 3 ຂອງສູນກາງພັກກອມມູນິດຈີນສະໄໝທີ 18 ກໍ່ຈະວາງແຜນການພັດທະນາສັງລວມ, ເພື່ອຈັດວາງວຽກງານລົງເລິກການປະຕິຮູບໂດຍລວມ.
ທ່ານສີຈີນຜີງກ່າວວ່າ, ຖ້າຢາກບັນລຸ "ຄວາມຝັນຈີນ" ໃຫ້ຜົນເປັນຈິງ, ພວກຂ້າພະເຈົ້າກໍ່ຕ້ອງຍຶດໝັ້ນເດີນຕາມເສັ້ນທາງສັງຄົມນິຍົມທີ່ມີສີສັນພິເສດຂອງຈີນ. ເສັ້ນທາງສາຍນີ້ແມ່ນເສັ້ນທາງອັນຖືກຕ້ອງທີ່ປະຊາຊົນຈີນໄດ້ພົນເຫັນຫຼັງຄົ້ນຫາຢ່າງລຳບາກເປັນເວລາຍາວນານ. ການພັດທະນາຂອງຈີນຍັງມີໜ້າທີ່ໜັກໜ້າ ແລະ ມີເສັ້ນທາງຍາວໄກ. ການແກ້ໄຂບັນຫາພັດທະນາ ແລະ ປົວແປງຊີວິດການເປັນຢູ່ຂອງປະຊາຊົນໃຫ້ດີຂຶ້ນແມ່ນໜ້າທີ່ສຳຄັນອັນດັບທີໜຶ່ງຂອງພວກຂ້າພະເຈົ້າ.
ທ່ານສີຈີນຜີງກ່າວເນັ້ນວ່າ, ຄຽງຄູ່ກັບການພັດທະນາຂອງຈີນ, ຈີນຈະຮັບແບກໜ້າທີ່ສາກົນຫຼາຍກວ່າເກົ່າ, ເຂົ້າຮ່ວມວຽກງານສາກົນ ແລະ ການປະຕິຮູບລະບົບສາກົນຢ່າງຕັ້ງໜ້າກວ່າເກົ່າ. ພວກຂ້າພະເຈົ້າຈະສືບຕໍ່ຖືທ່າທີຖອມຕົວ, ຮ່ຳຮຽນຖອດຖອນເອົາທິດສະດີ ແລະ ບົດຮຽນການພັດທະນາອັນກ້າວໜ້າຂອງປະເທດອື່ນໆ, ເດີນຕາມເສັ້ນທາງພັດທະນາທີ່ຮ່ວມກັນກັບປະເທດອື່ນໆຢ່າງກົມກຽວກັນ.
