ທ່ານສີຈິ້ນຜິງລົງຕິດຕາມເບິ່ງຊີວິດການເປັນຢູ່ຂອງປະຊາຊົນຊົນເຜົ່າສ່ວນຫ້ນອຍຢູ່ເຂດຕາເວັນຕົກຂອງແຂວງຫູຫນານ
ທ່ານສີຈິ້ນຜິງໄປຊອກຮູ້ສະພາບການປູກແລະຈຳຫນ່າຍຫມາກລະແຊັງ, ຫມາກກ້ຽງໃຫຍ່ແລະຫມາກກີວີຢູ່ທ້ອງຖິ່ນນັ້ນ.
ວັນທີ 3 ພະຈິກນີ້, ທ່ານສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນ, ປະທານປະເທດຈີນ, ປະທານຄະນະກຳມະການການທະຫານສູນກາງຈີນໄດ້ເດີນທາງໄປຕິດຕາມເບິ່ງຊີວິດການເປັນຢູ່ຂອງປະຊາຊົນຊົນເຜົ່າສ່ວນຫນ້ອຍຢູ່ກິ່ງແຂວງປົກຄອງຕົນເອງເຜົ່າຖູເຈ່ຍແລະເຜົ່າມົ້ງທີ່ພາກຕາເວັນຕົກຂອງແຂວງຫູຫນານຈີນ. ທ່ານກ່າວເນັ້ນວ່າ, ການບັນລຸຊີວິດທີ່ອີ່ມຫນາມສຳລານຢ່າງຮອບດ້ານກໍ່ຫມາຍຄວາມວ່າຕ້ອງເຮັດໃຫ້ເຂດທຸກຍາກດີຂຶ້ນເຊັ່ນກັນ, ການຫລຸດຜ່ອນຄວາມທຸກຍາກຕ້ອງດຳເນີນໄປຕາມສະພາບຕົວຈິງ, ວາງມາດຕະການທີ່ເຫມາະສົມກັບບ່ອນທີ່ມີເງື່ອນໄຂຕ່າງກັນ.ທ່ານກ່າວວ່າ:
ມື້ນີ້, ຂ້າພະເຈົ້າມາທີ່ນີ້ກໍ່ແມ່ນເພື່ອມາເບິ່ງບ້ານຂອງປະຊາຊົນຊົນເຜົ່າສ່ວນຫນ້ອຍທີ່ແທ້ຈິງ, ບໍ່ຄວນເກັບມ້ຽນເຄື່ອງຂອງຢ່າງຟ້າວຟັ່ງ, ຄວນໃຫ້ມັນມີສະພາບຄືເກົ່າ, ເພື່ອໃຫ້ຂ້າພະເຈົ້າຮູ້ສະພາບຊີວິດການເປັນຢູ່ຂອງປະຊາຊົນຢ່າງແທ້ຈິງ.
ເມື່ອໄດ້ເດີນຕາມເສັ້ນທາງພູດອຍທີ່ຄັບແຄບແລະຄົດລ້ຽວ, ທ່ານສີຈິ້ນຜິງໄດ້ໄປຮອດບ້ານ ສືປ່າຕົ້ງ. ບ້ານ ສືປ່າຕົ້ງ ບໍ່ພຽງແຕ່ແມ່ນບ້ານເຜົ່າມົ້ງທໍ່ນັ້ນ, ແຕ່ແມ່ນບ້ານທຸກຍາກບ້ານຫນຶ່ງ. ໃນເວລາໂອ້ລົມກັບອຳນາດການປົກຄອງຂັ້ນບ້ານແລະຊາວບ້ານ, ທ່ານສີຈິ້ນຜິງກ່າວເນັ້ນວ່າ:
ຊີວິດການເປັນຢູ່ທີ່ມີຄວາມອີ່ມຫນາມສຳລານຮອບດ້ານກໍ່ຫມາຍຄວາມວ່າຕ້ອງເຮັດໃຫ້ເຂດທຸກຍາກຄືພວກເຮົານີ້ດີຂຶ້ນຄືກັນ, ປັບປຸງບ່ອນທີ່ທຸກຍາກທີ່ສຸດ, ຈິ່ງຮັບປະກັນການບັນລຸຊີວິດທີ່ອີ່ມຫນາມສຳລານຢ່າງແທ້ຈິງໄດ້.
ທ່ານສີຈິ້ນຜິງກ່າວວ່າ, ການລົບລ້າງຄວາມທຸກຍາກບໍ່ຄວນມີແຕ່ຄຳຂວັນລ້າໆທໍ່ນັ້ນ. ຄວນເຮັດວຽກໃນສາມດ້ານຢ່າງແທ້ຈິງຄື: ອັນທີຫນຶ່ງແມ່ນພັດທະນາການຜະລິດຕ້ອງອີງຕາມສະພາບຕົວຈິງ, ອັນທີສອງແມ່ນຕ້ອງມີການຮັບປະກັນດ້ານສາທາລະນະໂດຍພື້ນຖານ, ອັນທີສາມແມ່ນຕ້ອງໃຫ້ມີການ ສຶກສາແກ່ຄົນຮຸ່ນໃຫມ່. ຄະນະພັກແລະອົງການປົກຄອງທຸກຂັ້ນຕ້ອງຊອກຫາວິທີແກ້ໄຂບັນຫາຕົວຈິງໃຫ້ຕົກ, ເພື່ອຖອດຖອນເປັນບົດຮຽນແລ້ວເຜີຍແຜ່ໃຫ້ກວ້າງອອກ.
