ລັດຖະບານສິງກະໂປຍົກສູງສະຕິລະວັງຕົວເພື່ອຕ້ານກັບການຂົ່ມຂູ່ຈາກແຮັກເກີ
ວັນທີ 4 ພະຈິກນີ້, ກົມຄຸ້ມຄອງການພັດທະນາຂໍ້ມູນຂ່າວສານແລະໂທລະຄົມສິງກະໂປ ກ່າວວ່າ: ເນື່ອງຈາກມີຜູ້ຄົນທີ່ເອີ້ນຕົນເອງວ່າເປັນສະມາຊິກອົງການແຮັກເກີສາກົນ ກ່າວວ່າຈະໂຈມຕີພື້ນຖານໂຄງລ່າງດ້ານຂໍ້ມູນຂ່າວສານຂອງສິງກະໂປ, ສະນັ້ນ ອົງການລັດຖະບານໄດ້ຍົກສູງສະຕິລະວັງຕົວ ເພື່ອເພີ່ມທະວີຄວາມປອດໄພທາງອິນເຕີເນັດຂອງຕົນ.
ໃນອາທິດແລ້ວນີ້, ມີຄົນລຶກລັບທີ່ເອີ້ນຕົນເອງວ່າ "ຜູ້ບໍ່ເປີດເຜີຍຊື່" ແລະເປັນສະມາຊິກຂອງອົງການແຮັກເກີສາກົນ ໄດ້ຂົ່ມຂູ່ວ່າ: ຖ້າລັດຖະບານສິງກະໂປຫາກບໍ່ພິຈາລະນາຄືນໃໝ່ກ່ຽວກັບຂໍ້ກຳນົດໃໝ່ດ້ານການບໍລິຫານເວັບໄຊດ້ານຂ່າວສານແລ້ວ ພວກເຂົາກໍຈະໂຈມຕີພື້ນຖານໂຄງລ່າງທາງດ້ານອິນເຕີເນັດ. ພາຍຫຼັງມີການຂົ່ມຂູ່ດັ່ງກ່າວແລ້ວ, ມີເວັບໄຊຈຳນວນໜຶ່ງ ເຊັ່ນ: ເວັບໄຊໜັງສືພິມ "ເດີສະເຕຼສ໌ທາມສ໌" ແລະເວັບໄຊສະໜາມບິນເຊເລຕາຂອງສິງກະໂປໄດ້ຖືກໂຈມຕີຈາກແຮັກເກີ. ກົມຄຸ້ມຄອງການພັດທະນາຂໍ້ມູນຂ່າວສານແລະໂທລະຄົມສິງກະໂປ ກ່າວວ່າ, ບາງເວັບໄຊຂອງອົງການລັດຖະບານໃຫ້ການບໍລິການບໍ່ສະດວກ, ແມ່ນຍ້ອນເກີດການຕິດຂັດໃນການບໍລິຫານ, ຫາກບໍ່ແມ່ນຍ້ອນການໂຈມຕີຈາກແຮັກເກີ. ກົມດັ່ງກ່າວຍັງກ່າວຕື່ມວ່າ, ລັດຖະບານໄດ້ເອົາໃຈໃສ່ຕໍ່ຄວາມປອດໄພທາງເວັບໄຊເປັນຢ່າງດີ.
ສິງກະໂປບໍ່ແມ່ນປະເທດພຽງດຽວເທົ່ານັ້ນທີ່ໄດ້ຮັບການຂົ່ມຂູ່ຕໍ່ຄວາມປອດໄພທາງເວັບໄຊໃນຫວ່າງມໍ່ໆມານີ້. ວັນທີ 3 ພະຈິກນີ້, ມີເວັບໄຊຂອງອົງການທຸລະກິດຈຳນວນໜຶ່ງຂອງອົສຕຼາລີ ແລະ ເວັບໄຊຈຳນວນໜຶ່ງຂອງລັດຖະບານຟິລິບປິນ ກໍໄດ້ຖືກແຮັກເກີໂຈມຕີເຊັ່ນກັນ, ຜູ້ທີ່ໂຈມຕີກໍມີສ່ວນກ່ຽວຂ້ອງກັບອົງການແຮັກເກີສາກົນທີ່ເອີ້ນຕົນເອງວ່າ "ຜູ້ບໍ່ເປີດເຜີຍຊື່".
