ທ່ານຫວາງສີຊ່ານພົບປະຄະນະຜູ້ແທນພັກປະຊາຊົນປະຕິວັດລາວ
ວັນທີ 5 ພະຈິກນີ້, ຢູ່ຫໍສະພາປະຊາຊົນແຫ່ງຊາດທີ່ນະຄອນຫຼວງປັກກິ່ງ, ທ່ານຫວາງສີຊ່ານ, ກຳມະການປະຈຳກົມການເມືອງສູນກາງພັກ, ປະທານຄະນະກຳມະການກວດກາລະບຽບວິໄນສູນກາງພັກກອມມູນິດຈີນ ໄດ້ພົບປະຄະນະຜູ້ແທນພັກປະຊາຊົນປະຕິວັດລາວທີ່ນຳພາໂດຍທ່ານ ບຸນທອງ ຈິດມະນີ, ກຳມະການກົມການເມືອງສູນກາງພັກ, ເລຂາທິການສູນກາງພັກ ທັງເປັນປະທານຄະນະກຳມະການກວດກາສູນກາງພັກປະຊາຊົນປະຕິວັດລາວ.
ທ່ານຫວາງສີຊ່ານສະແດງຄວາມຍິນດີຕ້ອນຮັບທ່ານບຸນທອງ ຈິດມະນີ ທີ່ໄດ້ນຳພາຄະນະຜູ້ແທນມາຢ້ຽມຢາມຈີນແລະເຂົ້າຮ່ວມກອງປະຊຸມສຳມະນາທິດສະດີສອງພັກຈີນ-ລາວຄັ້ງທີສອງ. ທ່ານກ່າວວ່າ: ໃນເດືອນກັນຍາປີນີ້, ທ່ານສີຈິ້ນຜິງ, ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນ ແລະ ທ່ານຈູມມາລີ ໄຊຍະສອນ, ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ ໄດ້ຮ່ວມກັນກຳນົດທິດທາງການພັດທະນາການພົວພັນລະຫວ່າງສອງພັກ-ລັດ, ເຊິ່ງຈະມີຜົນສະທ້ອນຢ່າງເລິກເຊິ່ງຍາວໄກຕໍ່ການພັດທະນາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນ-ລາວໃຫ້ອຸດົມສົມບູນຍິ່ງຂຶ້ນ. ສອງພັກຈີນ-ລາວລ້ວນແຕ່ປະເຊີນກັບພາລະກຳທີ່ພັກຕ້ອງຄຸ້ມຄອງພັກ ແລະຄຸ້ມຄອງບໍລິຫານພັກຢ່າງເຂັ້ມງວດ, ຄະນະກຳມະການກວດກາລະບຽບວິໄນພັກ ຕ້ອງປະຕິບັດໜ້າທີ່ດ້ວຍຄວາມຮັບຜິດຊອບສູງ. ຫວັງວ່າສອງພັກຈະສາມາດຄົ້ນຄວ້າແລະລົງເລິກການແລກປ່ຽນກັນຢ່າງບໍ່ຢຸດຢັ້ງ, ບໍ່ພຽງແຕ່ເພີ່ມທະວີການຄົ້ນຄວ້າດ້ານທິດສະດີເທົ່ານັ້ນ, ຍິ່ງຈະຕ້ອງເນັ້ນໜັກພຶດຕິກຳແລະການແລກປ່ຽນບົດຮຽນໃນໜ້າທີ່ວຽກງານຕ່າງໆ, ເພີ່ມທະວີລັກສະນະຈຸດສຸມແລະໃຫ້ບັງເກີດຜົນເປັນຈິງ.
ທ່ານບຸນທອງ ຈິດມະນີ ກ່າວວ່າ: ຍິນດີລົງເລິກການແລກປ່ຽນແລະຮ່ວມມືລະຫວ່າງສອງພັກ, ຮ່ຳຮຽນແລະຖອດຖອນບົດຮຽນເຊິ່ງກັນແລະກັນໃນການກໍ່ສ້າງແບບແຜນແລະຄວາມປອດໃສຂາວສະອາດຂອງພັກ.
