ບົດລາຍງານທະນາຄານກາງຈີນຂຽນວ່າ ຈະສືບຕໍ່ປະຕິບັດນະໂຍບາຍເງິນຕາທີ່ໝັ້ນທ່ຽງ ແລະ ມີການປັບປຸງປ່ຽນແປງເລັກໜ້ອຍລ່ວງໜ້າໃນລະດັບທີ່ເໝາະສົມໃນເວລາອັນຄວນ
ວັນທີ 5 ພະຈິກນີ້, ທະນາຄານປະຊາຊົນຈີນ ຫຼື ທະນາຄານກາງຈີນ ໄດ້ເຜີຍແຜ່ບົດລາຍງານການປະຕິບັດນະໂຍບາຍເງິນຕາໃນໄຕມາດທີ 3 ປີ 2013 ໂດຍຂຽນວ່າ: ນະໂຍບາຍເງິນຕາຕ້ອງຍຶດໝັ້ນຄວາມຮຽກຮ້ອງຕ້ອງການທີ່ມີຄວາມໝັ້ນທ່ຽງດ້ານຍອດປະລິມານ ແລະ ປັບປຸງອົງປະກອບໃຫ້ດີ, ຍຶດໝັ້ນປະຕິບັດນະໂຍບາຍຢ່າງມີຄວາມໝັ້ນທ່ຽງແລະມີລັກສະນະຕໍ່ເນື່ອງ, ສືບຕໍ່ປະຕິບັດນະໂຍບາຍເງິນຕາທີ່ໝັ້ນທ່ຽງ, ເພີ່ມທະວີລັກສະນະສຸມໃສ່ ແລະ ລັກສະນະຄ່ອງຕົວຂອງການດັດສົມຄວບຄຸມ, ດຳເນີນການປັບປຸງປ່ຽນແປງເລັກໜ້ອຍລ່ວງໜ້າໃນລະດັບທີ່ເໝາະສົມ.
ບົດລາຍງານ ຊີ້ອອກວ່າ: ຕ້ອງກຳແໜ້ນຈຸດດຸນດ່ຽງແຫ່ງການເຕີບໂຕຢ່າງໝັ້ນທ່ຽງ, ປັບປຸງອົງປະກອບ, ຊຸກຍູ້ການປະຕິຮູບ ແລະ ປ້ອງກັນຄວາມສ່ຽງ, ຈຸດສຳຄັນແມ່ນສ້າງສະພາບແວດລ້ອມດ້ານເງິນຕາແລະການເງິນທີ່ໝັ້ນທ່ຽງ, ຊຸກຍູ້ໃຫ້ອົງກອນຕະຫຼາດຕົ້ນຕໍມີການຄາດຄະເນທີ່ສົມເຫດສົມຜົນແລະໝັ້ນທ່ຽງ, ຊຸກຍູ້ການປັບປຸງແລະຫັນປ່ຽນອົງປະກອບ, ຍົກລະດັບຂະແໜງການໃຫ້ສູງຂຶ້ນ.
