ຜູ້ນໍາຈີນໄດ້ກ່າວເຖິງການປະຕິຮູບເປັນເວລາຫລາຍຄັ້ງ ສື່ມວນຊົນຕ່າງປະເທດກ່າວວ່ານີ້ໄດ້ສະແດງໃຫ້ເຫັນເຖິງຄວາມຕັດສິນໃຈໃນການປ່ຽນແປງໃໝ່
ກ່ອນຈະໄຂກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນ, ທ່ານສີຈິ້ນຜິງ, ປະທານປະເທດຈີນ ແລະທ່ານຫລີເຄີ້ສ໋ຽງ, ນາຍົກລັດຖະມົນຕີຈີນໄດ້ກ່າວເຖິງການປະຕິຮູບໃນກໍລະນີຕ່າງໆ. ສື່ມວນຊົນຕ່າງປະເທດເຫັນວ່າ, ນີ້ໄດ້ສະແດງໃຫ້ເຫັນເຖິງຄວາມຕັດສິນໃຈໃນການປ່ຽນແປງໃໝ່ຂອງລັດຖະບານຈີນ.
ວັນທີ 2 ພະຈິກນີ້, ຢູ່ປັກກິ່ງ, ໃນເວລາພົບປະກັບຜູ້ຕາງໜ້າຕ່າງປະເທດທີ່ເຂົ້!ຮ່ວມກອງປະຊຸມຢູ່ປັກກິ່ງຂອງສະມາຄົມສະຕະວັດທີ 21, ທ່ານສີຈິ້ນຜິງກ່າວຢ່າງຊັດເຈນວ່າ, ຈີນຍຶດໝັ້ນການປະຕິຮູບແລະການເປີດປະຕູສູ່ພາຍນອກ. ໜັງສືພິມຫລຽນເຮີຈາວປ້າວຂອງສິງກະໂປຕີລາຄາຕໍ່ເລື່ອງນີ້ວ່າ, ນີ້ໄດ້ສະແດງໃຫ້ເຫັນເຖິງຄວາມຕັດສິນໃຈໃນການລົງເລິກການປະຕິຮູບແລະເປີດກວ້າງການເປີດປະຕູສູ່ພາຍນອກຢ່າງຮອບດ້ານຂອງຈີນ.
ສ່ວນການກະທໍາແລະຄວາມເວົ້າໃນການລົງເຄື່ອນໄຫວເຮັດວຽກຢູ່ນອກປັກກິ່ງຂອງທ່ານສີຈິ້ນຜິງແລະທ່ານຫລີເຄີ້ສຽງກໍໄດ້ສະແດງໃຫ້ເຫັນຄວາມຕັດສິນໃຈໃນການປະຕິຮູບອີກຄັ້ງໜຶ່ງ ເຊິ່ງໄດ້ເຮັດໃຫ້ສື່ມວນຊົນຕ່າງປະເທດສາມາດເຂົ້າໃຈຄວາມຕັດສິນໃຈຂອງຈີນໃນການປະຕິຮູບ.
ວັນທີ 3 ຫາວັນທີ 5 ພະຈິກນີ້, ເວລາລົງເຄື່ອນໄຫວເຮັດວຽກຢູ່ແຂວງຫູໜານ, ທ່ານສີຈິ້ນຜິງໄດ້ຮຽກຮ້ອງໃຫ້ລົງເລິກການປະຕິຮູບແລະການເປີດປະຕູສູ່ພາຍນອກ, ເລັ່ງລັດການຫັນປ່ຽນຮູບແບບການພັດທະນາເສດຖະກິດ, ປ້ອງກັນບໍ່ໃຫ້ການພັດທະນາປ່ຽນເປັນການເຕີບໂຕຂອງ GDP .
ວັນທີ 5 ພະຈິກນີ້, ເວລາລົງກວດກາຄວາມຄືບໜ້າການປະຕິຮູບກະສິກໍາທີ່ທັນສະໄໝ, ທ່ານຫລີເຄີ້ສ໋ຽງສະເໜີວ່າ, ການພັດທະນາກະສິກໍາທີ່ທັນສະໄໝຕ້ອງອາໄສການປະຕິຮູບ.
ຕໍ່ເລື່ອງນີ້, ວັນທີ 6 ພະຈິກນີ້, ໜັງສືພິມ chosun ilbo ຂອງ ສ, ເກົາຫລີເຫັນວ່າ, ການເຄື່ອນໄຫວຂອງຜູ້ນໍາຈີນເຫລົ່ານີ້ໄດ້ສະແດງໃຫ້ເຫັນເຖິງຄວາມຕັດສິນໃຈທີ່ໃກ້ຊິດກັບປະຊາຊົນແລະການປະຕິຮູບ. ຄວາມໃກ້ຊິດກັບປະຊາຊົນ, ການປ່ຽນແປງໃໝ່ແລະການພັດທະນາແບບຍືນຍົງອາດຈະເປັນຫົວຂໍ້ຂອງກອງປະຊຸມຄົບຄະນະຄັ້ງທີ 3 ຄັ້ງນີ້.
