ຄວາມຂັດແຍ້ງກ່ຽວກັບພະລາຊະບັນຍັດນີລະໂທດກຳຂອງໄທຮຸນແຮງຂຶ້ນຕື່ມ ນາງຍິ່ງລັກ ຊິນນະວັດກ່າວວ່າຈະຍອມຮັບຜົນການລົງຄະແນນສຽງຂອງວຸດທິສະພາ
ວັນທີ 6 ພະຈິກນີ້, ທ່ານທັກສິນ ຊິນນະວັດ, ອະດີດນາຍົກລັດຖະມົນຕີໄທທີ່ພັດຖິ່ນຢູ່ຕ່າງປະເທດ ໄດ້ຜ່ານທີ່ປຶກສາດ້ານກົດໝາຍຂອງທ່ານອອກຖະແຫຼງການ ໂດຍຂຽນວ່າ: ຜູ້ຄັດຄ້ານຂອງທ່ານໄດ້ບິດເບືອນພະລາຊະບັນຍັດນີລະໂທດກຳ. ທ່ານທັກສິນ ຊິນນະວັດກ່າວໃນຖະແຫຼງການວ່າ: ໃນຖານະທີ່ເປັນອະດີດນາຍົກລັດຖະມົນຕີ, ທ່ານເຄົາລົບຄວາມເຫັນທີ່ແຕກຕ່າງກັນຂອງປະຊາຊົນໄທ, ແຕ່ທ່ານບໍ່ສາມາດຍອມຮັບການໄສ່ຮ້າຍ ປ້າຍສີຕໍ່ພະລາຊະບັນຍັດນີລະໂທດກຳສະບັບນີ້ ແລະ ຕໍ່ທ່ານພ້ອມດ້ວຍຄອບຄົວຂອງທ່ານເອງໄດ້.
ນາງຍິ່ງລັກ ຊິນນະວັດ, ນາຍົກລັດຖະມົນຕີໄທຄົນປັດຈຸບັນ ເຊິ່ງເປັນນ້ອງສາວຂອງທ່ານທັກສິນ ຊິນນະວັດ ກ່າວວ່າ: ບໍ່ວ່າຜົນການລົງຄະແນນສຽງຕໍ່ພະລາຊະບັນຍັດນີລະໂທດກຳຂອງວຸດທິສະພາຈະເປັນແນວໃດກໍ່ຕາມ, ລັດຖະບານກໍຈະຍອມຮັບເອົາໄດ້. ວຸດທິສະພາໄທຈະໄຂກອງປະຊຸມຄືນໃໝ່ໃນວັນທີ 8 ພະຈິກນີ້ ແລະມີແຜນຈະເລີ່ມລະບຽບການຄົ້ນຄວ້າພິຈາລະນາແລະລົງຄະແນນສຽງຕໍ່ພະລາຊະບັນຍັດນີລະໂທດກຳໃນວັນທີ 11 ພະຈິກນີ້.
