ຈີນກ້າວເຂົ້າສູ່ປະເທດທີ່ຄົ້ນຄວ້າຜະລິດອາວຸດສູ້ຮົບທາງອາກາດທີ່ກ້າວໜ້າທັນສະໄໝແຖວໜ້າຂອງໂລກ
ວັນທີ 6 ພະຈິກນີ້ ຢູ່ທີ່ນະຄອນຫຼວງປັກກິ່ງ, ທ່ານສີຈ້ານປິ່ນ, ຮອງຜູ້ອຳນວຍການໃຫຍ່ກຸ່ມອຸດສາຫະກຳການບິນຈີນ ກ່າວວ່າ: ກຸ່ມບໍລິສັດນີ້ໄດ້ສ້າງຕັ້ງຂຶ້ນເປັນເວລາ 5 ປີມານີ້, ໄດ້ຄົ້ນຄວ້າຜະລິດອາວຸດຍຸດໂທປະກອນທີ່ສຳຄັນທີ່ມີລະດັບກ້າວໜ້າໃນໂລກຈຳນວນໜຶ່ງຢ່າງສຳເລັດຜົນ, ເປັນຕົ້ນແມ່ນ ຍົນຂົນສົ່ງຂະໜາດໃຫຍ່ "ຢຸ້ນ-20", ຍົນຮົບຂຶ້ນລົງເທິງກຳປັ່ນບັນທຸກເຮືອບິນ "ຈ່ຽນ-15", ຍົນເຮຣີກົບແຕປະກອບອາວຸດ "ຈື-10" ແລະອື່ນໆ, ນີ້ໄດ້ສະແດງໃຫ້ເຫັນວ່າ, ຈີນໄດ້ກ້າວເຂົ້າສູ່ປະເທດຈຳນວນໜ້ອຍໃນໂລກທີ່ສາມາດຄົ້ນຄວ້າຜະລິດອາວຸດຍຸດໂທປະກອນທາງອາກາດທີ່ມີລະດັບກ້າວໜ້າຂອງໂລກດ້ວຍຕົນເອງຢ່າງເປັນລະບົບ ແລະ ມີຫຼາຍຊະນິດ.
ໃນຫຼາຍປີຜ່ານມານີ້, ອາວຸດຍຸດໂທປະກອນທາງອາກາດຂອງຈີນ ເຊິ່ງແມ່ນຍົນຮົບ "ຊ່ຽວລົງ" ຫຼື FC-1, ຍົນຝຶກແອບ "ເລ້ຢິ່ງ", ຍົນຝຶກແອບ "ເຄ-8", ຍົນບໍ່ມີຄົນຂັບ "ຢີ້ລົງ" ແລະ ລູກສອນໄຟນຳວິຖີ "ພີ່ລີ້" ຮຸ່ນຕ່າງໆ ເປັນຕົວແທນ ໄດ້ສົ່ງອອກຂາຍໃຫ້ຫຼາຍປະເທດແລ້ວ, ເຊິ່ງໄດ້ບັນລຸການຍົກລະດັບການສົ່ງອອກຍົນຮົບຂອງຈີນຈາກຮຸ່ນທີສອງຂຶ້ນສູ່ຮຸ່ນທີສາມ ແລະ ຈາກຍົນທີ່ມີຄົນຂັບຫັນໄປສູ່ຍົນບໍ່ມີຄົນຂັບ.
