ລັດຖະມົນຕີການຕ່າງປະເທດຈີນຈະເດີນທາງໄປອິນເດຍເພື່ອເຂົ້າຮ່ວມການພົບປະລະຫວ່າງລັດຖະມົນຕີການຕ່າງປະເທດຈີນ ຣັດເຊຍແລະອິນເດຍ
(GMT+08:00) 2013-11-08 11:13:49 cri
ວັນທີ 7 ພະຈິກນີ້, ຢູ່ທີ່ນະຄອນຫລວງປັກກິ່ງ, ທ່ານຫົງເຫລີຍ, ໂຄສົກກະຊວງການຕ່າງປະເທດຈີນກ່າວວ່າ, ໂດຍຕອບສະຫນອງຕາມຄຳເຊີນຂອງທ່ານຊາມານ ຮູຊິດ ລັດຖະມົນຕີວ່າການກະຊວງການຕ່າງປະເທດອິນໂດຍ, ທ່ານຫວາງຍີ້, ລັດຖະມົນຕີວ່າການກະຊວງການຕ່າງປະເທດຈີນຈະເຂົ້າຮ່ວມການພົບປະຄັ້ງທີ 12 ລະຫວ່າງລັດຖະມົນຕີການຕ່ງປະເທດຈີນ ຣັດເຊຍແລະອິນເດຍແລະກອງປະຊຸມລະດັບລັດຖະມົນຕີການຕ່າງປະເທດອາຊີເອີລົບຄັ້ງທີ 11 ທີ່ໄຂຂຶ້ນຢູ່ອິນເດຍແຕ່ວັນທີ 10 -11 ພະຈິກນີ້.
ທ່ານຫົງເຫລີຍກ່າວວ່າ, ໃນ 10 ກວ່າປີມານີ້, ກົນໄກຮ່ວມມືຈີນ ຣັດເຊຍແລະອິນເດຍໄດ້ກາຍເປັນເວທີທີ່ສຳຄັນສຳລັບສາມປະເທດປະສານຫລັກຫມັ້ນ, ສະແຫວງຫາຄວາມຮັບຮູ້ທີ່ຄືກັນ, ແລະຊອກຫາການຮ່ວມມື.ຈີນໃຫ້ຄວາມສຳຄັນຫລາຍຕໍ່ການພົບປະຄັ້ງທີ 12 ລະຫວ່າງລັດຖະມົນຕີການຕ່າງປະເທດສາມປະເທດ.ໃນໄລຍະການພົບປະ, ລັດຖະມົນຕີການຕ່າງປະເທດຂອງສາມປະເທດຈະໄດ້ປຶກສາຫາລືກັນເຖິງສະຖານະການສາກົນໃນປັດຈຸບັນ,ແລະແລກປ່ຽນຄວາມເຫັນກ່ຽວກັບບັນຫາສາກົນແລະພາກພື້ນທີ່ແຕ່ະລຝ່າຍມີຄວາມສົນໃຈຮ່ວມກັນແລະລົງເລິກການຮ່ວມມືຢ່າງແທ້ຈິງລະຫວ່າງສາມຝ່າຍ.
ທ່ານຫົງເຫລີຍກ່າວວ່າ, ຈີນ, ຣັດເຊຍແລະອິນເດຍແມ່ນປະເທດທີ່ມີຕະຫລາດຈະເລີນໃຫມ່, ມີຄວາມເຫັນທີ່ຄືກັນຫລືຄ້າຍຄືກັນໃນບັນຫາສາກົນແລະພາກພື້ນຫລາຍບັນຫາ, ການທີ່ສາມຝ່າຍຮັກສາການສົນທະນາກັນເປັນປະຈຳ, ນັ້ນແມ່ນມີຜົນດີຕໍ່ການເພີ່ມທະວີຄວາມໄວ້ເນື້ອເຊື່ອໃຈເຊິ່ງກັນແລະກັນ, ກ້າວເຖິງຂັ້ນມີຄວາມຮັບຮູ້ທີ່ຄືກັນແລະເປີດກວ້າງການຮ່ວມມື.ຈີນເຊື່ອວ່າການພົບປະຈະໄດ້ຮັບຜົນສຳເລັດທີ່ດີ, ແລະປະກອບສ່ວນຫລາຍກວ່າເກົ່າເຂົ້າໃນສັນຕິພາບ, ສະຖຽນລະພາບແລະການພັດທະນາຂອງພາກພື້ນກໍ່ຄືຂອງໂລກ.
