ການເຈລະຈາກ່ຽວກັບບັນຫານິວເຄຼຍຂອງອີຣານໄດ້ຮັບຄວາມຄືບໜ້າ ອາເມລິກາອາດຈະພິຈາລະນາຜ່ອນຄາຍການລົງໂທດຕໍ່ອີຣານ
ວິທະຍຸຕ່າງປະເທດລາຍງານວ່າ, ເຈົ້າໜ້າທີ່ຊັ້ນສູງຂອງກະຊວງການຕ່າງປະເທດອາເມລິກາລາຍງານວ່າ, ວັນທີ 6 ພະຈິກນີ້, ເຈົ້າໜ້າທີ່ຂອງອາເມລິກາກັບອີຣານໄດ້ຈັດການເຈລະຈາສອງຝ່າຍຢູ່ນະຄອນເຊີແນວຂອງສະວິສ. ວັນທີ 7 ພະຈິກນີ້, ທໍານຽບຂາວຂອງອາເມລິກາກ່າວວ່າ, ຈະພິຈາລະນາກ່ຽວກັບການຜ່ອນຄາຍມາດຕະການລົງໂທດຕໍ່ອີຣານທີ່ມີຄວາມຈໍາກັດ.
ຂ່າວແຈ້ງວ່າ, ອີຣານກັບຜູ້ຕາງໜ້າຂອງ 6 ປະເທດ ຄື ຈີນ, ອາເມລິກາ, ຣັດເຊຍ, ອັງກິດ, ຝຣັ່ງ ແລະເຢຍລະມັນກໍາລັງຈັດການເຈລະຈາຢູ່ນະຄອນເຊີແນວ ແລະຫວັງວ່າຈະຍຸດຕິສະພາບທີ່ບໍ່ໄປບໍ່ມາທີ່ເກີດຂຶ້ນຍ້ອນບັນຫານິວເຄຼຍຂອງອີຣານ.
ທໍານຽນຂາວຂອງອາເມລິກາກ່າວວ່າ, ການເຈລະຈາຄັ້ງນີ້ໄດ້ຮັບຄວາມຄືບໜ້າ, 6 ຝ່າຍຍິນດີພິຈາລະນາກ່ຽວກັບການຜ່ອນຄາຍມາດຕະການລົງໂທດຕໍ່ອີຣານຢ່າງມີຄວາມຈໍາກັດ ເພື່ອໃຫ້ອີຣານສະເໜີຫລັກຖານຈະແຈ້ງທີ່ພິສູດວ່າຕົນເອງໄດ້ຍຸດຕິການປະຕິບັດໂຄງການອາວຸດນິວເຄຼຍແລ້ວ ແລະກໍາລັງສືບຕໍ່ດໍາເນີນຕໍ່ໄປ.
ທ່ານໄຈ ຄານີ, ໂຄສົກທໍານຽບຂາວຂອງອາເມລິກາໃຫ້ສໍາພາດຕໍ່ນັກຂ່າວວ່າ, ພາຍຫລັງສອງຝ່າຍໄດ້ບັນລຸສັນຍາ, ຖ້າວ່າອີຣານບໍ່ສາມາດປະຕິບັດຕາມຄໍາໝັ້ນສັນຍາຂອງຕົນ, ອາເມລິກາຈະບໍ່ຜ່ອນຄາຍການລົງໂທດຕໍ່ອີຣານ ແລະຈະປະຕິບັດມາດຕະການລົງໂທດທີ່ເຂັ້ມງວດກວ່າເກົ່າ.
