ເພີ່ມທະວີການພົວພັນຄູ່ຮ່ວມແບບໃໝ່ ຮ່ວມກັນສ້າງອະນາຄົດທີ່ດີຂອງອາຊີ-ເອີຣົບ
(GMT+08:00) 2013-11-11 19:00:09 cri
ຕາມຂ່າວCRI: ວັນທີ11ພະຈິກນີ້, ທ່ານຫວາງຢີ້, ລັດຖະມົນຕີວ່າການກະຊວງການຕ່າງປະເທດຈີນໄດ້ເຂົ້າຮ່ວມກອງປະຊຸມລັດຖະມົນຕີການຕ່າງປະເທດອາຊີ-ເອີຣົບຄັ້ງທີ11ທີ່ນະຄອນຫຼວງນິວແດນລີຂອງອິນເດຍແລະໄດ້ກ່າວຄຳປາໄສໃນກອງປະຊຸມ.
ທ່ານຫວາງຢິ້ກ່າວເນັ້ນວ່າ, ພາຍໃຕ້ເບື້ອງຫຼັງແຫ່ງໂລກາພິວັດແລະການຫັນເປັນຍຸກມູນຂ່າວສານ, ໂຊກຊະຕາກຳຂອງອາຊີແລະເອີຣົບໄດ້ຕິດພັນກັນນັບມື້ນັບແໜ້ນແຟ້ນ. ການພັດທະນາຮ່ວມກັນຂອງອາຊີແລະເອີຣົບມີຜົນດີຕໍ່ຂະບວນການຫັນເປັນຫຼາຍຂົ້ວຂອງໂລກ, ມີຜົນດີຕໍ່ການເຮັດໃຫ້ກຳລັງທົ່ວໂລກດຸ່ນດ່ຽງກວ່າເກົ່າ. ບໍ່ພຽງແຕ່ຈະຊຸກຍູ້ໃຫ້ເສດຖະກິດໂລກບັນລຸການເຕີບໂຕຢ່າງແຂງແຮງ, ດຸ່ນດ່ຽງແລະແບບຍືນຍົງເທົ່ານັ້ນ, ແຕ່ໄດ້ເຮັດໃຫ້ໂລກມີສັນຕິພາບ, ສະຖຽນລະພາບແລະຈະເລີນຮຸ່ງເຮືອງກວ່າເກົ່ານຳອີກ. ທ່ານຫວາງຢີ້ໄດ້ຊີ້ອອກວ່າ, ຢາກບັນລຸການພັດທະນາຮ່ວມກັນຂອງອາຊີເອີຣົບ, ພວກເຮົາກໍຕ້ອງດຳເນີນການຮ່ວມມືທີ່ແໜ້ນແຟ້ນກວ່າເກົ່າ. ຄວາມໄວ້ເນື້ອເຊື່ອໃຈດ້ານການເມືອງ, ການຊ່ອຍຊູຍູ້ໜູນກັນດ້ານເສດຖະກິດ, ການເຊື່ອມໂຍງເຂົ້າກັນດ້ານວັດທະນະທຳລະຫວ່າງອາຊີ-ເອີຣົບກໍເຮັດໃຫ້ການຮ່ວມມືລະຫວ່າງສອງຝ່າຍສາມາດຂະຫຍາຍຕົວຫວ້າງອອກຕື່ມອີກ. ຢູ່ຈຸດເລີ່ມຕົ້ນໃໝ່ຂອງປະຫວັດສາດ, ອາຊີແລະເອີຣົບສາມາດຖອດຖອນບົດຮຽນເຊິ່ງກັນແລະກັນ, ເອົາສ່ວນທີ່ດີເດັ່ນໄປເສີມສ່ວນທີ່ຂາດຕົນບົກພ່ອງ, ຮ່ວມກັນສຸມກຳລັງເຂົ້າໃນການພັດທະນາແບບຍືນຍົງ.
ທ່ານຫວາງຢີ້ກ່າວວ່າ, ໃນຕໍ່ໜ້ານີ້, ພວກເຮົາຈະຕັດສິນໃຈເພື່ອຊຸກຍູ້ການເຕີບໂຕດ້ານເສດຖະກິດແບບສີຂຽວ, ແບບໝູນວຽນແລະແບບຍືນຍົງ. ການປະຕິຮູບຂອງຈີນຈະບໍ່ຢຸດຢັ້ງ, ແລະການພັດທະນາຂອງຈີນກໍຈະບໍ່ຢຸດຢັ້ງ.
ລັດຖະມົນຕີການຕ່າງປະເທດແລະຜູ້ຕາງໜ້າຂອງ51ປະເທດສະມາຊິກກອງປະຊຸມອາຊີ-ເອຣົບໄດ້ເຂົ້າຮ່ວມກອງປະຊຸມໃນຄັ້ງນີ້.