ປະເທດອາຊີຕາເວັນອອກສຽງໃຕ້ຕິດຕາມກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນຢ່າງໃກ້ຊິດ
ປັດຈຸບັນນີ້, ກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນກໍາລັງຈັດຂຶ້ນຢູ່ນະຄອນຫລວງປັກກິ່ງຂອງຈີນ. ລັດຖະບານແລະສື່ມວນຊົນຂອງປະເທດອາຊີຕາເວັນອອກສຽງໃຕ້ໄດ້ຕິດຕາມກອງປະຊຸມຄັ້ງນີ້ຢ່າງໃກ້ຊິດ ແລະໄດ້ຕີລາຄາສູງຕໍ່ຄວາມໝາຍທີ່ສໍາຄັນຂອງກອງປະຊຸມຄັ້ງນີ້.
ສື່ມວນຊົນຂອງອິນໂດເນເຊຍເຫັນວ່າ, ກອງປະຊຸມຄົບຄະນະຄັ້ງທີ 3 ສະໄໝທີ 18 ເປັນການປະຕິຮູບໃຫຍ່ຄັ້ງທີສອງທີ່ລິເລີ່ມໂດຍພັກກອມມູນິດຈີນ ພາຍຫລັງກອງປະຊຸມຄົບຄະນະຄັ້ງທີ 3 ສະໄໝທີ 11 ແລະຈະວາງທິດທາງນະໂຍບາຍຂອງການພັດທະນາດ້ານເສດຖະກິດສັງຄົມແລະການເມືອງຂອງຈີນໃນອະນາຄົດ ເຊິ່ງມີຄວາມໝາຍທາງປະຫວັດສາດທີ່ສໍາຄັນທີ່ສຸດ. ປະເທດຈີນທີ່ເຂັ້ມແຂງແລະເປີດປະຕູ ມີຄວາມໝັ້ນຄົງ ມີແຕ່ຜົນດີບໍ່ມີຜົນຮ້າຍຕໍ່ໂລກ, ປະຊາຄົມໂລກມີຄວາມເຊື່ອໝັ້ນຕໍ່ກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນ.
ໜັງສືພິມASIA NEWS TIME ຂອງໄທລາຍງານວ່າ, ທົ່ວໂລກກໍາລັງຕິດຕາມກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນຢ່າງໃກ້ຊິດ. ປະເທດຕ່າງໆໃນໂລກລ້ວນແຕ່ຢາກຮັບຮູ້ວ່າ, ພາຍຫລັງດໍາເນີນການປະຕິຮູບແລະເປີດປະຕູສູ່ພາຍນອກເປັນເວລາ 30 ກວ່າປີມານີ້, ບາດກ້າວຕໍ່ໄປຂອງຈີນຈະເປັນແນວໃດ. ການພັດທະນາຂອງຈີນມີອິດທິພົນຕໍ່ທົ່ວໂລກ, ທິດທາງຂອງຈີນກ່ຽວພັນກັບອະນາຄົດຂອງໂລກ. ທ່ານສົມມາດ, ພົນເສນາລັດຖະມົນຕີວ່າການກະຊວງໂຍທາທິການແລະຂົນສົ່ງລາວກ່າວວ່າ, ກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນຢ່າງໃກ້ຊິດໄດ້ເປັນທີ່ດຶງດູດສາຍຕາຂອງຄົນທົ່ວໂລກ, ຢູ່ລາວມີລາຍງານຂ່າວຫລາຍບົດກ່ຽວກັບກອງປະຊຸມຄັ້ງນີ້. ວົງການຕ່າງໆເຫັນວ່າ, ກອງປະຊຸມຄັ້ງນີ້ຈະຄົ້ນຄວ້າພິຈາລະນາກ່ຽວກັບການລົງເລິກການປະຕິຮູບຢ່າງຮອບດ້ານ, ຈະຊຸກຍູ້ການປ່ຽນແປງຢ່າງເລິກເຊິ່ງແລະການພັດທະນາໃນຂົງເຂດຕ່າງໆຂອງເສດຖະກິດສັງຄົມຂອງຈີນຢ່າງແຂງແຮງຕື່ມອີກ, ສ່ວນວ່າລາວທີ່ໄດ້ຮັບຜົນປະໂຫຍດຈາກການພັດທະນາຂອງຈີນກໍຈະໄດ້ຮັບກໍາລັງຊຸກຍູ້ການພັດທະນາທີ່ຫລາຍກວ່າເກົ່າ. ນອກນີ້, ລາວກັບຈີນມີເສັ້ນທາງພັດທະນາທີ່ຄ້າຍຄືກັນ, ບົດຮຽນດ້ານການປະຕິຮູບແລະການເປີດປະຕູ່ສູ່ພາຍນອກ ແລະການຊຸກຍູ້ການພັດທະນາເສດຖະກິດຂອງຈີນກໍເປັນບົດຮຽນທີ່ດີຕໍ່ລາວເຊັ່ນກັນ.
