ໝາກຜົນທາງດ້ານເສດຖະກິດທີ່ມີທ່ວງທ່າດີໃນທ່າມກາງໝັ້ນທ່ຽງທີ່ໄດ້ມາໄດ້ຍາກ
(GMT+08:00) 2013-11-11 17:15:40 cri
ເມື່ອຈັງຫວະເຕີບໂຕທາງດ້ານເສດຖະກິດຂອງຈີນໄດ້ຊ້າລົງໃນໄຕມາດທີສອງຂອງປີນີ້ແລ້ວ, ປັດຈຸບັນ ໄດ້ໄວຂຶ້ນອີກເທື່ອໜຶ່ງ, ການປັບປຸງອົງປະກອບ ປາກົດມີຈຸດເດັ່ນໃໝ່, ສະພາບການທີ່ເສດຖະກິດມີຄວາມໝັ້ນທ່ຽງແລະດີຂຶ້ນຄືນໃໝ່ນັ້ນ ເປັນຮູບເປັນຮ່າງຂຶ້ນ.
ຂໍ້ມູນໃນດ້ານການສົ່ງອອກຂາຍນອກທີ່ເຜີຍແຜ່ຫຼ້າສຸດສະແດງໃຫ້ເຫັນວ່າ, ໃນເດືອນຕຸລາປີນີ້ ຍອດມູນຄ່າການຄ້າຂາເຂົ້າຂາອອກຂອງຈີນໄດ້ເພີ່ມຂຶ້ນ 6,5% ເມື່ອທຽບໃສ່ໄລຍະດຽວກັນຂອງປີກາຍນີ້, ເຊິ່ງໄວກວ່າເດືອນກັນຍາທີ່ມີຄວາມໄວ 3,3% ນັ້ນຢ່າງເດັ່ນຊັດ, ພ້ອມກັນນັ້ນ ຂາອອກເພີ່ມຂຶ້ນ 5,6%, ແຕ່ເດືອນກັນຍາຊ້ຳພັດບໍ່ໄດ້ເພີ່ມຂຶ້ນ. ທ່ານຫຼີຈ້ຽນ, ນັກຄົ້ນຄວ້າຂອງສະຖາບັນຄົ້ນຄວ້າກະຊວງການຄ້າຈີນຊີ້ອອກວ່າ: "ຄາດວ່າໃນສອງເດືອນຕໍ່ໜ້າ, ການຄ້າກັບຕ່າງປະເທດຈະສືບຕໍ່ມີທ່ວງທ່າທີ່ດີ."
ທ່ານລຽນພິງ, ຫົວໜ້ານັກເສດຖະສາດຂອງທະນາຄານຄົມມະນາຄົມຈີນເຫັນວ່າ: "ຈັງຫວະເຕີບໂຕຂອງ GDP ຈາກ 7,7% ໃນໄຕມາດທີໜຶ່ງ ໄດ້ຫຼຸດລົງເປັນ 7,5% ໃນໄຕມາດທີສອງ, ແລະເພີ່ມຂຶ້ນເປັນ 7,8% ໃນໄຕມາດທີສາມ, ສາມາດເວົ້າໄດ້ວ່າ, ເສດຖະກິດຂອງຈີນໃນປັດຈຸບັນບໍ່ພຽງແຕ່ໄດ້ແກ້ໄຂຄວາມສ່ຽງທີ່ຈະ"ຢຸດຈັ້ງແບບກະທັນຫັນ"ເທົ່ານັ້ນ, ແຕ່ຍັງຈະຮັກສາທ່າອ່ຽງທີ່ເພີ່ມຂຶ້ນຢ່າງໝັ້ນທ່ຽງໃນໄລຍະຍາວສົມຄວນ."
ໃນໜຶ່ງປີມານີ້ ການທີ່ຈີນໄດ້ຮັບໝາກຜົນທາງດ້ານເສດຖະກິດຢ່າງບໍ່ງ່າຍ ນັ້ນ, ດ້ານໜຶ່ງແມ່ນຍ້ອນສະພາບແວດລ້ອມພາຍນອກທີ່ຄ່ອຍໆດີຂຶ້ນ, ອີກດ້ານໜຶ່ງ ແມ່ນແຍກອອກຈາກນະໂຍບາຍເສດຖະກິດທີ່ໜັກແໜ້ນທີ່ນຳອອກປະຕິບັດໃນປີນີ້ນັ້ນບໍ່ໄດ້.
ໂດຍປະເຊີນໜ້າກັບສະພາບແວດລ້ອມທີ່ສັບສົນທັງພາຍໃນແລະຕ່າງປະເທດ, ໃນຕົ້ນປີນີ້ມາ, ລັດໄດ້ໃຊ້ມາດຕະການທີ່ທັງເຮັດໃຫ້ເສດຖະກິດໃນປັດຈຸບັນມີຄວາມໝັ້ນທ່ຽງ ທັງມີຜົນປະໂຫຍດຕໍ່ໄລຍະຍາວໄກ. ພາຍໃຕ້ສະພາບທີ່ການເງິນມີລາຍໄດ້ເພີ່ມຂຶ້ນແມ່ນເລື່ອງທີ່ເຄັ່ງຕຶງ ແລະສະພາບເງິນຄ່ອງໃນຕະຫຼາດຄ່ອຍໆຮຸນແຮງຂຶ້ນ, ນະໂຍບາຍມະຫາພາກທັງບໍ່ໄດ້ເພີ່ມຂຸມການເງິນ, ທັງບໍ່ໄດ້ໃຊ້ນະໂຍບາຍຜ່ອນຜັນເງິນຕາ, ໂດຍໄດ້ຮັກສາຄວາມໝັ້ນທ່ຽງຂອງນະໂຍບາຍດ້ານການເງິນແລະເງິນຕາ. ພ້ອມກັນນັ້ນ ໄດ້ນຳອອກປະຕິບັດມາດຕະການທີ່ເຮັດໃຫ້ການພິຈາລະນາອະນຸມັດດ້ານການບໍລິຫານມີຄວາມກະທັດຮັດ ແລະປ່ອຍສິດໃຫ້ວິສາຫະກິດ, ອັນໄດ້ປຸກລະດົມການລົງທຶນຂອງປະຊາຊົນແລະຄວາມມີຊີວິດຊີວາຂອງວິສາຫະກິດຢ່າງບັງເກີດຜົນ.
ພາຍໃຕ້ການຊຸກຍູ້ຂອງມາດຕະການຕ່າງໆ, ມີວີແວວສະແດງໃຫ້ເຫັນວ່າ, ເສດຖະກິດຂອງຈີນໄດ້ມີກຳລັງພັດທະນາທີ່ແຂງແຮງຂຶ້ນຕື່ມອີກ, ການບໍລິໂພກໄດ້ເສີມຂະຫຍາຍບົດບາດທີ່ສຳຄັນກວ່າເກົ່າຕໍ່ການພັດທະນາເສດຖະກິດ; ຄວາມໄວເພີ່ມຂຶ້ນຂອງອຸດສາຫະກຳເຕັກນິກສູງໃນທົ່ວປະເທດໄດ້ສືບຕໍ່ໄວກວ່າອຸດສາຫະ ກຳທີ່ມີລາຍໄດ້ຫຼາຍກວ່າ 5 ລ້ານຢວນຕໍ່ປີ, ການສິ້ນເປືອງພະລັງງານຂອງ GDP ແຕ່ລະຫົວໜ່ວຍໃນທົ່ວປະເທດສືບຕໍ່ຫຼຸດໜ້ອຍລົງເມື່ອທຽບກັບໄລຍະດຽວກັນຂອງປີກາຍນີ້; ອັດຕາສ່ວນຂອງຂະແໜງການບໍລິການໃນລວມຍອດຜະລິດຕະພັນພາຍໃນໄດ້ສູງຂຶ້ນເລັກນ້ອຍ.