ຟີລິບປິນເຂົ້າສູ່ພາວະໄພພິບັດຍ້ອນພາຍຸໃຕ້ຝຸ່ນ "ໄຮຢ້ຽນ"ອົງການສະຫະປະຊາຊາດສະໜອງເງິນຊ່ວຍເຫຼືອຈຳນວນ 25ລ້ານ ໂດລາເພື່ອໃຊ້ໃນການກູ້ໄພ
ຕາມຂ່າວＣＲＩ： ຕອນຄ່ຳວັນທີ11ພະຈິກນີ້, ຄະນະກຳມະການບັນເທົາໄພແຫ່ງຊາດຟີລິບປິນປະກາດວ່າ, ນັບມາຮອດປະຈຸບັນນີ້, ລົມພາຍຸໃຕ້ຝຸ່ນ ＂ໄຮຢ້ຽນ＂ໄດ້ເຮັດໃຫ້ປະຊາຊົນຟີລິບປິນຈຳນວນ 1774 ຄົນເສຍຊີວິດ, ມີ 82 ຄົນຫາຍສາບສູນແລະ 2487 ຄົນບາດເຈັບ. ທ່ານເບນິກໂນ ອາກີໂນສາມ, ປະທານາທິບໍດີຟີລິບປີນໄດ້ປະກາດສະຖານະການໄພພິບັດແຫ່ງຊາດ.
ຫວ່າງມໍ່ໆນີ້, ປະຊາຄົມໂລກໄດ້ທະຍອຍກັນໃຫ້ການຊ່ວຍເຫຼືອແກ່ຟີລິບປິນ. ມີ20ກວ່າປະເທດແລະເຂດແຄ້ວນໄດ້ສະໜອງຫຼືໃຫ້ຄຳໝັ້ນສັນຍາວ່າຈະໃຫ້ການຊ່ວຍເຫຼືອເປັນເງິນສົດ, ເຄື່ອງສົງເຄາະ, ພະນັກງານຊ່ວຍເຫຼືອແລະອື່ນໆ. ນອກນີ້, ອົງການສະຫະປະຊາຊາດ, ສະຫະພາບເອີຣົບ, ທະນາຄານໂລກແລະອົງການຈັດຕັ້ງສາກົນອື່ນໆກໍ່ໄດ້ໃຫ້ຄຳໝັ້ນສັນຍາວ່າຈະສະໜອງການຊ່ວຍເຫຼືອໃນຮູບແບບຕ່າງໆແກ່ຟີລິບປິນ.
ວັນທີ 11 ພະຈິກນີ້, ຫ້ອງການວຽກງານມະນຸດສະທຳຂອງອົງການສະຫະປະຊາຊາດໄດ້ປະກາດວ່າ, ກອງທຶນສຸກເສີນສູນກາງອົງການສະຫະປະຊາຊາດຈະຈັດສັນເງິນງວດທຳອິດໃນມູນຄ່າ 25 ລ້ານໂດລາເພື່ອໃຫ້ການຊ່ວຍເຫຼືອດ້ານມະນຸດສະທຳແກ່ເຂດປະສົບໄພຂອງຟີລິບປິນທີ່ໄດ້ຮັບຜົນກະທົບຈາກພະຍຸໄຕ້ຝຸ່ນ "ໄຮຢຽນ". ຕາມຂ່າວແຈ້ງວ່າ, ເງິນຊ່ວຍເຫຼືອກ້ອນນີ້ຈະນຳໃຊ້ເຂົ້າໃນການຊ່ວຍເຫຼືອສຸກເສີນໃຫ້ແກ່ຜູ້ປະສົບໄພຈາກພະຍຸໃຕ້ຝຸ່ນໃນດ້ານອາຫານ, ນ້ຳດື່ມ,ເຮືອນຢູ່ອາໄສແລະການປິ່ນປົວພະຍາດເຫຼົ່ານີ້ເປັນຕົ້ນ.
ໃນວັນດຽວກັນ, ທ່ານບານກີມູນ ເລຂາທິການໃຫຍ່ອົງການສະຫະປະຊາຊາດໄດ້ສົນທະນາຜ່ານທາງໂທລະສັບກັບທ່ານເດວ ໂຣຊາຣີໂອ ລັດຖະມົນຕີວ່າການກະຊວງການຕ່າງປະເທດຟີລິບປິນເພື່ອຢື້ຢາມຖາມຂ່າວຕໍ່ປະຊາຊົນຟີລິບປິນທີ່ປະສົບໄພທຳມະຊາດໃນຄັ້ງນີ້.
ທ່ານຈ່າງຮວາ, ໂຄສົກສະຖານທູດຈີນປະຈຳຟີລິບປິນກ່າວໃນວັນທີ11ພະຈິກນີ້ວ່າ, ປະຈຸບັນນີ້ສະຖານທູດຍັງບໍ່ທັນໄດ້ຮັບການລາຍງານກ່ຽວກັບການຈີນເສຍຊີວິດແລະບາດເຈັບຂອງພົນລະເມືອງຈີນເທື່ອ.
