ຮອງນາຍົກລາວຊົມງານວາງສະແດງຮູບພາບກ່ຽວກັບມິດຕະພາບຈີນລາວ
ຕາມຂ່າວCRI: ວັນທີ 11 ພະຈິກນີ້, ໃນພິທີໄຂງານຕະຫຼາດນັດບຸນທາດຫຼວງ ຊຶ່ງເປັນວັນບຸນປະເພນີຂອງລາວທີ່ຈັດຂຶ້ນຢູ່ນະຄອນຫຼວງວຽງຈັນຂອງລາວ, ທ່ານອາຊາງ ລາວລີ, ກຳມະການກົມການເມືອງສູນກາງພັກ,ຮອງນາຍົກລັດຖະມົນຕີຂອງລາວພ້ອມດ້ວຍຜູ້ນຳທ່ານອື່ນໆໃນລັດຖະບານໄປຊົມງານວາງສະແດງຮູບພາບມິດຕະພາບຈີນລາວ.
ງານວາງສະແດງຮູບພາບມິດຕະພາບຈີນລາວແມ່ນຈັດໂດຍສະຖານທູດຈີນປະຈຳລາວ, ສະຖາບັນຂົງຈື້ຂອງມະຫາວິທະຍາໄລແຫ່ງຊາດລາວເປັນຜູ້ຮັບເໝົາຈັດງານວາງສະແດງແຕ່ວັນທີ 11-13 ພະຈິກນີ້. ງານວາງສະແດງຄັ້ງນີ້ມີສາມຫົວຂໍ້ຄື: ການຮ່ວມມືທາງການຕ່າງປະເທດລະຫວ່າງຈີນກັບລາວ, ການແລກປ່ຽນທາງດ້ານວັດທະນະທຳແລະການສຶກສາ, ແລະກິດຈະກຳຕ່າງໆເພື່ອເຜີຍແຜ່ວັດທະນະທຳການສຶກສາຂອງສະຖາບັນຂົງຈື້, ຕົ້ນຕໍແມ່ນຮູບພາບ, ພາບສະໄລ, ຟິມໂຄສະນາວັດທະນະທຳ ແລະເຄື່ອງອື່ນໆ. ໃນຂະນະໂຄສະນາວັດທະນະທຳອັນເປັນມູນເຊື້ອທີ່ອຸດົມສົມບູນຂອງຈີນ, ກໍສະແດງໃຫ້ເຫັນສະເໜ່ຂອງຈີນຍຸກປັດຈຸບັນ.
