ການສໍາຫລວດປະຊາມະຕິສະບັບຫລ້າສຸດສະແດງໃຫ້ເຫັນວ່າ ອັດຕາສະໜັບສະໜູນລັດຖະສະພາອາເມລິກາຫລຸດລົງຮອດອັດຕາຕໍ່າສຸດໃນປະຫວັດສາດ
ການສໍາຫລວດປະຊາມະຕິສະບັບໜຶ່ງທີ່ບໍລິສັດ The Gallup ທີ່ເປັນອົງການສໍາຫລວດປະຊາມະຕິທີ່ມີຊື່ສຽງຂອງອາເມລິກາເປີດເຜີຍໃນວັນທີ 12 ພະຈິກນີ້ສະແດງໃຫ້ເຫັນວ່າ, ອັດຕາສະໜັບສະໜູນລັດຖະສະພາອາເມລິກາໃນເດືອນນີ້ໄດ້ຫລຸດລົງຮອດ 9% ເຊິ່ງໄດ້ສ້າງສະຖິຕິຕໍ່າສຸດນັບແຕ່ບໍລິສັດ The Gallup ດໍາເນີນການສໍາຫລວດປະຊາມະຕິໃນລັກສະນະນີ້ເປັນຕົ້ນມາ.
ບໍລິສັດ The Gallup ເຫັນວ່າ, ສາເຫດຕົ້ນຕໍຂອງອັດຕາສະໜັບສະໜູນລັດຖະສະພາອາເມລິກາໃນເດືອນນີ້ຫລຸດລົງຮອດອັດຕາຕໍ່າສຸດໃນປະຫວັດສາດແມ່ນເຫດການປິດປະຕູຂອງລັດຖະບານອາເມລິກາໃນເດືອນແລ້ວນີ້. ເດືອນຕຸລາແລ້ວນີ້, ສອງພັກພາຍໃນລັດຖະສະພາອາເມລິກາ ຄືພັກປະຊາທິປະໄຕກັບພັກສາທາລະນະລັດໄດ້ເກີດການຂັດແຍ້ງກັນຢ່າງຮຸນແຮງໂດຍປິ່ນອ້ອມງົບປະມານການເງິນໃນສົກງົບປະມານ 2014 ແລະບັນຫາການປະຕິຮູບດ້ານສາທາລະນະສຸກຂອງທ່ານໂອບາມາ ເຊິ່ງໄດ້ເຮັດໃຫ້ໜ່ວຍງານທີ່ບໍ່ສໍາຄັນຂອງລັດຖະບານອາເມລິກາປິດປະຕູເຖິງ 16 ມື້ ແລະເຮັດໃຫ້ປະຊາຊົນອາເມລິກາເກີດຄວາມບໍ່ພໍໃຈຕໍ່ການຕໍ່ສູ້ດ້ານການເມືອງພາຍໃນລັດຖະສະພາ.
