ຮອງຫົວໜ້າສະຖາບັນຄົ້ນຄວ້າຍຸດທະສາດສາກົນຂອງໂຮງຮຽນພັກສູນກາງຈີນຕີຄວາມໝາຍຕໍ່ແຜນການປະຕິຮູບຮອບດ້ານແລະການປະຕິຮູບໂຄງປະກອບເສດຖະກິດ
ກອງປະຊຸມຄົບຄະນະຂອງຄະນະກຳມະການສູນກາງພັກກອມມູນິດຈີນຄັ້ງທີ 3 ສະໄໝທີ 18 ໄດ້ອັດລົງແລ້ວໃນວັນທີ 12 ພະຈິກນີ້. ໃນກອງປະຊຸມຄັ້ງນີ້ໄດ້ຮັບຟັງ ແລະ ພິຈາລະນາບົດລາຍງານວຽກງານທີ່ສະເໜີໂດຍທ່ານສີຈິ້ນຜິງ, ເລຂາທິການໃຫຍ່ສູນກາງພັກກອມມູນິດຈີນ ໂດຍໄດ້ຮັບການມອບໝາຍຈາກກົມການເມືອງສູນກາງພັກກອມມູນິດຈີນ, ໄດ້ພິຈາລະນາແລະຮັບຮອງເອົາ "ຂໍ້ຕົກລົງຂອງສູນກາງພັກກອມມູນິດຈີນກ່ຽວກັບບາງບັນຫາສຳຄັນໃນການລົງເລິກການປະຕິຮູບຢ່າງຮອບດ້ານ". ທ່ານໂຈ່ວທ່ຽນຢົງ, ຮອງຫົວໜ້າສະຖາບັນຄົ້ນຄວ້າຍຸດທະສາດສາກົນຂອງໂຮງຮຽນພັກສູນກາງຈີນ ໄດ້ຕີຄວາມໝາຍຕໍ່ຈິດໃຈຂອງ ກອງປະຊຸມຄົບຄະນະຂອງຄະນະກຳມະການສູນກາງພັກກອມມູນິດຈີນຄັ້ງທີ 3 ສະໄໝທີ 18.
ໃນເວລາກ່າວເຖິງແຜນການປະຕິຮູບຢ່າງຮອບດ້ານທີ່ໄດ້ສະເໜີອອກໃນກອງປະຊຸມ ຄັ້ງນີ້, ທ່ານໂຈ່ວທ່ຽນຢົງ ກ່າວວ່າ, ແຜນການນີ້ມີຈຸດຮຸ່ງໃສ 3 ຈຸດ ແລະຂໍ້ຫຍຸ້ງຍາກ 3 ຂໍ້. ຈຸດຮຸ່ງໃສທີໜຶ່ງແມ່ນເປັນແບບຮອບດ້ານ, ສັງລວມ ແລະ ປະສານກົມກຽວກັນ. ສອງ ເປັນແຜນປະຕິຮູບໄລຍະຍາວ, ຄືໄລຍະ 10 ປີ, ຫຼືວ່າຢ່າງໜ້ອຍເປັນໄລຍະ 7 ປີ. ສາມແມ່ນການປະຕິຮູບເທື່ອນີ້ໄດ້ປະສົບບັນຫາຍິ່ງມີຄວາມສັບສົນກວ່າ, ຍາກກວ່າ, ຕ້ອງມີການບຸກທະລຸໃນບາງດ້ານ.
ກ່ຽວກັບຂໍ້ຫຍຸ້ງຍາກທີ່ຕ້ອງການປະສານງານນັ້ນ, ທ່ານໂຈ່ວທ່ຽນຢົງ ກ່າວວ່າ: ຂໍ້ທຳອິດແມ່ນກຳລັງກີດຂວາງຕໍ່ການປະຕິຮູບ, ເຊັ່ນ: ທ່ານເລຂາທິການໃຫຍ່ ແລະ ທ່ານນາຍົກລັດຖະມົນຕີໄດ້ກ່າວໃນຫຼາຍກໍລະນີວ່າ ຕ້ອງທຳລາຍບາງຮົ້ວປ້ອງກັນຜົນປະໂຫຍດ. ຂໍ້ຫຍຸ້ງຍາກທີສອງ ກໍແມ່ນເທື່ອນີ້ໄດ້ກ່າວເຖິງຕ້ອງຍົກລະດັບການໄຂປະຕູສູ່ພາຍນອກຂຶ້ນຮອດລະດັບສູງກວ່າເກົ່າ, ຕ້ອງເຊື່ອມຈອດກັບໂຄງປະກອບສາກົນຈຳນວນໜຶ່ງ. ຂໍ້ຫຍຸ້ງຍາກທີສາມ ກໍຄືແນວຄວາມຄິດຂອງປະຊາຊົນທີ່ມີຕໍ່ການປະຕິຮູບ, ແນວຄິດຂອງປະຊາຊົນໄດ້ຮັບການປົດປ່ອຍຫຼືບໍ່, ໃນບົດຖະແຫຼງການຂອງກອງປະຊຸມໃນຄັ້ງນີ້ ກໍໄດ້ສະເໜີວ່າຕ້ອງກ້າຫານຕື່ມອີກ, ເວົ້າໃນດ້ານນີ້ແລ້ວກໍຕ້ອງມີທັດສະນະ ແລະ ຈິດສຳນຶກຂຶ້ນມາພ້ອມ, ກໍຕ້ອງມີຄວາມຮັບຮູ້ເປັນເອກະສັນກັນຕໍ່ບົດຖະແຫຼງການຂອງກອງປະຊຸມ ແລະ ຂໍ້ຕົກລົງຂອງສູນກາງ.
ໃນເວລາກ່າວເຖິງການປະຕິຮູບໂຄງປະກອບເສດຖະກິດ, ທ່ານໂຈ່ວ ທ່ຽນຢົງ ຊີ້ອອກວ່າ: ສິ່ງທີ່ເປັນໃຈກາງແມ່ນຕ້ອງແກ້ໄຂການພົວພັນລະຫວ່າງລັດຖະບານກັບຕະຫຼາດໃຫ້ດີ, ຕ້ອງໃຫ້ຕະຫຼາດເສີມຂະຫຍາຍບົດບາດໃຫຍ່ຫຼວງກວ່າເກົ່າອີກ. ທ່ານໂຈ່ວ ທ່ຽນຢົງ ກ່າວຕໍ່ໄປວ່າ: ເທື່ອນີ້ມີການບຸກທະລຸໃນບາງດ້ານ, ໜຶ່ງແມ່ນສະເໜີ "ຄວາມມີຊີວິດຊີວາ" ຕໍ່ເສດຖະກິດພາກລັດ, ເຊິ່ງເປັນການແຕກຕ່າງກັນກັບແຕ່ກ່ອນ. ສອງ, ໄດ້ສະເໜີວ່າ ຕ້ອງກະຕຸ້ນຄວາມມີຊີວິດຊີວາແລະຫົວຄິດປະດິດສ້າງຂອງພາກສ່ວນເສດຖະກິດທີ່ບໍ່ແມ່ນຂອງລັດ. ນອກນີ້ ຍັງໄດ້ສະເໜີລະບຽບການປົກປ້ອງສິດຕໍ່ຊັບສົມບັດ ແລະ ເສດຖະກິດກຳມະສິດປະສົມ. ໃນບົດຖະແຫຼງການຂອງກອງປະຊຸມ ໄດ້ສະເໜີເປັນຄັ້ງທຳອິດກ່ຽວກັບເສດຖະກິດກຳມະສິດປະສົມ, ນັ້ນກໍຄື: ໃນຕໍ່ໜ້າ ເສດຖະກິດພາກລັດກໍອາດຈະມີຫຸ້ນສ່ວນຂອງພາກເອກະຊົນ. ນອກນີ້, ຕະຫຼາດທີ່ດິນທີ່ໃຊ້ໃນການກໍ່ສ້າງທີ່ເປັນເອກະພາບກັນລະຫວ່າງຕົວເມືອງກັບຊົນນະບົດ, ການດັດສົມຄວບຄຸມມະຫາພາກຕາມຫຼັກວິທະຍາສາດ ແລະ ການທີ່ຕ້ອງມີລະບົບເປີດປະຕູສູ່ພາຍນອກຢ່າງກວ້າງຂວາງກວ່າເກົ່າ ທີ່ໄດ້ສະເໜີອອກໃນກອງປະຊຸມຄັ້ງນີ້ ກໍລ້ວນແຕ່ມີເນື້ອໃນສຳຄັນຫຼາຍ.
