ສປຊ ກ່າວວ່າ ການກູ້ໄພຂອງຟິລິບປິນຕ້ອງເລັ່ງລັດໄວຂຶ້ນອີກ
ໜັງສືພິມ "ຫຼຽນເຫີຈາວປ້າວ" ຂອງສິງກະໂປ ລາຍງານວ່າ: ໃນກອງປະຊຸມຂ່າວທີ່ຈັດຂຶ້ນຢູ່ນະຄອນຫຼວງມະນີລາຂອງຟິລິບປິນໃນວັນທີ 14 ພະຈິກນີ້, ທ່ານວາເລຣີ ອາໂມສ, ຮອງເລຂາທິການໃຫຍ່ອົງການສະຫະປະຊາຊາດທີ່ຮັບຜິດຊອບວຽກງານສິດທິມະນຸດ ໄດ້ຮັບຮອງວ່າ, ການເຄື່ອນໄຫວກູ້ໄພຂອງຟິລິບປິນດຳເນີນຊ້າໂພດ.
ທ່ານອາໂມສ ກ່າວວ່າ: ຍ້ອນເຂດປະສົບໄພລົມພາຍຸເປັນບໍລິເວນກວ້າງຂວາງ, ການຂົນສົ່ງເຄື່ອງສົງເຄາະມີຄວາມຫຍຸ້ງຍາກ, ທີມຊ່ວຍເຫຼືອກູ້ໄພຍັງບໍ່ສາມາດເຂົ້າໄປເຖິງເຂດປະສົບໄພໃນຫຼາຍບ່ອນໄດ້ເທື່ອ. ຫວັງວ່າສະພາບນີ້ຈະສາມາດມີການປ່ຽນແປງໄດ້ຢ່າງເດັ່ນຊັດພາຍໃນ 48 ຊົ່ວໂມງຂ້າງໜ້ານີ້.
ຂ່າວແຈ້ງວ່າ, ໄພພິບັດຈາກລົມພາຍຸໄຕ້ຝຸ່ນເທື່ອນີ້ໄດ້ຜ່ານໄປເປັນເວລາ 7 ມື້ແລ້ວ, ແຕ່ປະຊາຊົນຜູ້ປະສົບໄພຈຳນວນຫຼາຍກໍຍັງບໍ່ທັນໄດ້ຮັບການຊ່ວຍເຫຼືອເທື່ອ, ຮອດວັນທີ 14 ຫາກໍເລີ່ມເກັບມ້ຽນແລະຝັງສົບຜູ້ເສຍຊີວິດໃນໄພ. ລັດຖະບານຟິລິບປິນທີ່ນຳພາໂດຍປະທານາທິບໍດີອາກີໂນສາມ ໄດ້ປະເຊີນກັບຄວາມກົດດັນແລະຄຳຕຳນິນັບມື້ນັບແຮງ. ມາຮອດວັນທີ 14 ພະຈິກນີ້, ຈຳນວນຜູ້ເສຍຊີວິດທີ່ລັດຖະບານຟິລິບປິນປະກາດນັ້ນແມ່ນ 2357 ຄົນ, ແຕ່ຈຳນວນຜູ້ເສຍຊີວິດຍັງອາດຈະເພີ່ມຂຶ້ນອີກຢ່າງເດັ່ນຊັດ. ພະນັກງານອົງການສະຫະປະຊາຊາດ ແລະ ເຈົ້າໜ້າທີ່ຟິລິບປິນຄາດຄະເນວ່າ, ຜູ້ເສຍຊີວິດໃນໄພພິບັດເທື່ອນີ້ອາດຈະມີເກືອບໜຶ່ງໝື່ນຄົນ.
