ນັກວິຊາການວິເຄາະເນື້ອໃນສໍາຄັນກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນ：ຊຸກຍູ້ການຫັນເປັນທັນສະໄໝຂອງລະບົບບໍລິຫານປະເທດ ການສ້າງຕັ້ງລະບົບຮັກສາສິ່ງແວດລ້ອມຕ້ອງປະຕິບັດຢ່າງທັນທີ
ວັນທີ 12 ພະຈິກນີ້, ໃນເວລາວິເຄາະເນື້ອໃນຈິດໃຈຂອງກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນຕາມຄໍາເຊື້ອເຊີນ, ທ່ານຊົ້ງເຊີ້ໝິງ, ສ.ຈ. ພະແນກສຶກສາແລະຄົ້ນຄວ້າສາທາລະນະບໍລິຫານສະຖາບັນການບໍລິຫານແຫ່ງຊາດຈີນຊີ້ອອກວ່າ, ການປະຕິຮູບດ້ານລະບົບການບໍລິຫານແມ່ນເນື້ຶອໃນສໍາຄັນຂອງການປະຕິຮູບດ້ານລະບອບການເມືອງ, ການປະຕິຮູບດ້ານລະບົບການຮັກສາແລະບໍລິຫານສິ່ງແວດລ້ອມຕ້ອງປະຕິບັດຢ່າງທັນທີ.
ທ່ານ ຊົ້ງເຊີ້ໝິງກ່າວວ່າ, ການຮັກສາຄວາມສັກສິດຂອງລັດຖະທໍາມະນູນແລະກົດໝາຍທີ່ສະເໜີໃນກອງປະຊຸມຄົບຄະນະຄັ້ງທີ 3 ສະໄໝທີ 18 ໄດ້ຮັບປະກັນການປະຕິບັດສິດພິພາກສາ ແລະສິດໄອຍະການ, ປັບປຸງລະບົບຕຸລາການຮັບປະກັນສິດທິມະນຸດ, ເປັນຈຸດພົ້ນເດັ່ນໃນການປະຕິຮູບດ້ານລະບົບການເມືອງໃນກອງປະຊຸມຄົບຄະນະຄັ້ງທີ 3 ສະໄໝທີ 18. ສ່ວນການປະຕິຮູບດ້ານລະບົບການບໍລິຫານເປັນເນື້ອໃນສໍາຄັນຂອງການປະຕິຮູບດ້ານໂຄງປະກອບການເມືອງ. ຈຸດພົ້ນເດັ່ນຂອງການປະຕິຮູບດ້ານໂຄງປະກອບການບໍລິຫານແມ່ນດໍາເນີນການບໍລິຫານລັດຖະບານຢ່າງມີປະສິດທິຜົນ, ຊຸກຍູ້ການຫັນເປັນທັນສະໄໝຂອງໂຄງປະກອບບໍລິຫານປະເທດແລະຄວາມສາມາດດ້ານການບໍລິຫານ.
ທ່ານຊົ້ງເຊີ້ໝິງເຫັນວ່າ, ທໍາອິດຕ້ອງຫັນປ່ຽນພາລະບົດບາດຂອງລັດຖະບານຢ່າງແທ້ຈິງ, ຫັນປ່ຽນພາລະໜ້າທີ່ຂອງລັດຖະບານໃຫ້ສາມາດຮັກສາຄວາມຍຸຕິທໍາແລະຄວາມເປັນທໍາຂອງສັງຄົມໃຫ້ດີກວ່າເກົ່າ, ສ້າງສະພາບແວດລ້ອມດ້ານການພັດທະນາທີ່ດີກວ່າເກົ່າ, ອໍານວຍການບໍລິຫານສາທາລະນະທີ່ດີກວ່າເກົ່າ. ຕໍ່ການປະດິດສ້າງຮູບການບໍລິຫານ, ທ່ານຊົ້ງເຊີ້ໝິງເຫັນວ່າ, ກົດໝາຍກໍານົດພາລະບົດບາດ, ກົດໝາຍກົດນົດການກະທໍາ, ກົດໝາຍກໍານົດລະບຽບການແລະກົດໝາຍກໍານົດຄວາມຮັບຜິດຊອບຂອງອໍານາດເປັນໜ້າທີ່ສໍາຄັນຂອງການປະຕິຮູບດ້ານໂຄງປະກອບການບໍລິຫານຂອງຈີນ. ທ່ານຊົ້ງເຊີ້ໝິງເຫັນວ່າ, ການບໍລິຫານຂອງລັດຖະບານຈີນກໍາລັງກ້າວຈາກສາທາລະນະບໍລິຫານຕັ້ງເດີມຫັນເປັນສາທາລະນະຄຸ້ມຄອງເທື່ອລະກ້າວ.
ເມື່ອເວົ້າເຖິງການສ້າງຕັ້ງລະບົບສິວິໄລດ້ານຊີວະພາບອັນຄົບຖ້ວນເພື່ອຮັກສາຊີວະພາບແລະສິ່ງແວດລ້ອມໂດຍລະບົບ, ທ່ານຊົ້ງເຊີ້ໝິງກ່າວວ່າ, ເພື່ອຮັກສາຊີວະພາບແລະສິ່ງແວດລ້ອມໃຫ້ດີກວ່າເກົ່າແລະປັບປຸງລະບົບຮັກສາແລະຄຸ້ມຄອງຊີວະພາບແລະສິ່ງແວດລ້ອມ, ການສ້າງຕັ້ງລະບົບຮັກສາສິ່ງແວດລ້ອມຕ້ອງປະຕິບັດຢ່າງທັນທີ. ການຮັກສາຊີວະພາບແລະສິ່ງແວດລ້ອມເປັນບັນຫາດ້ານການເມືອງ, ເປັນບັນຫາດ້ານຊີວິການເປັນຢູ່ຂອງປະຊາຊົນ, ເປັນບັນຫາດ້ານເຕັກນິກວິທະຍາສາດ.
ທ່ານຊົ້ງເຊີ້ໝິງເຫັນວ່າ, ການປະຕິຮູບດ້ານລະບົບຄຸ້ມຄອງແລະຮັກສາຊີວະພາບຕ້ອງໃຊ້ນະໂຍບາຍຫລາຍຢ່າງ, ໃນນັ້ນ, ມີ 2 ຈຸດແມ່ນສໍາຄັນທີ່ສຸດ, ທີໜຶ່ງ, ລະບົບນິຕິບັນຍັດກໍຕ້ອງປັບປຸງໄປພ້ອມກັນ, ທີສອງ, ລັດຖະບານຕ້ອງຈັດວາງຢ່າງເອກະພາບແລະປະສານສົມທົບສັງລວມ.
ວັນທີ 12 ພະຈິກນີ້, ກອງປະຊຸມຄົບຄະນະຄັ້ງທີ 3 ສະໄໝທີ 18 ຂອງພັກກອມມູນິດຈີນໄດ້ອັດລົງແລ້ວ. ກອງປະຊຸມຄັ້ງນີ້ໄດ້ພິຈາລະນາແລະຮັບຮອງ ຂໍ້ຕົກລົງກ່ຽວກັບບັນຫາສໍາຄັນໃນການລົງເລິກການປະຕິຮູບຂອງສູນກາງພັກກອມມູນິດຈີນ.
