ຈຳນວນຜູ້ເສຍຊີວິດໃນພາຍຸໄຕ້ຝຸ່ນທີ່ຟິລິບປິນເພິ່ນຂຶ້ນເປັນ 4460 ຄົນ ການຄົມມະນາຄົມເປັນອຳມະພາດພາໃຫ້ການຊ່ວຍເຫຼືອກູ້ໄພຄືບໜ້າຊັກຊ້າ
ຮອດວັນທີ 15 ພະຈິກນີ້, ພາຍຸໄຕ້ຝຸ່ນ "ໄຮຢ້ຽນ" ພັດຖະຫຼົ່ມຟິລິບປິນໄດ້ຜ່ານໄປ 7 ວັນແລ້ວ, ມາຮອດປັດຈຸບັນ, ຜູ້ເສຍຊີວິດໃນໄພພິບັດຄັ້ງນີ້ໄດ້ມີເຖິງ 4460 ຄົນ, ຫຼາຍກວ່າ 3800 ຄົນບາດເຈັບ, ມີ 110 ກວ່າລ້ານຄົນໄດ້ຜົນກະທົບຈາກໄພ, ປະມານ 6 ແສນ 7 ໝື່ນຄົນບໍ່ມີບ່ອນຢູ່ອາໄສ. ປັດຈຸບັນນີ້, ເຂດປະສົບໄພຍັງຢູ່ໃນສະພາບຫຍຸ້ງຍາກລຳບາກທີ່ສຸດ, ແຕ່ຄຽງຄູ່ກັບການຄົມມະນາຄົມຂົນສົ່ງໄດ້ຄ່ອຍໆຟື້ນຟູຂຶ້ນ, ການຊ່ວຍເຫຼືອກູ້ໄພກໍມີຄວາມຄືບໜ້າຢ່າງຊັກຊ້າ.
ວັນທີ 15 ພະຈິກນີ້, ທ່ານຣີຊາດ ກໍເດນ, ປະທານສະພາກາແດງຟິລິບປິນ ກ່າວວ່າ: ເທື່ອນີ້ແມ່ນໄພພິບັດທີ່ໃຫຍ່ທີ່ສຸດໃນປະຫວັດຟິລິບປິນ, ເຊິ່ງບໍ່ມີໃຜສາມາດຄາດຄະເນຜົນກະທົບໄດ້, ຍ້ອນວ່າເຂດປະສົບໄພແມ່ນເຂດໝູ່ເກາະ, ສະນັ້ນໄດ້ທຳລາຍການຄົມມະນາຄົມລະຫວ່າງເກາະດອນຕ່າງໆຢ່າງໜັກໜ່ວງທີ່ສຸດ, ແຕ່ລັດຖະບານແລະສະພາກາແດງຟິລິບປິນ ກຳລັງທຳຄວາມພະຍາຍາມຈົນສຸດຄວາມສາມາດເພື່ອສົ່ງເຄື່ອງສົງເຄາະຕ່າງໆໄປໃຫ້ຜູ້ປະສົບໄພທຸກຄົນໃນເຂດປະສົບໄພໂດຍໄວເທົ່າທີ່ຈະໄວໄດ້, ສ້າງເຮືອນຢູ່ອາໄສຊົ່ວຄາວໃຫ້ເຂົາເຈົ້າ, ສະໜອງອາຫານ, ນ້ຳດື່ມ ແລະ ເຄື່ອງໃຊ້ປະຈຳວັນອື່ນໆໃຫ້ເຂົາເຈົ້າ, ເກັບມ້ຽນສົບຂອງຜູ້ເສຍຊີວິດ.
ນອກນີ້, ກອງທັບຟິລິບປິນ ກໍໃຊ້ຍົນທະຫານ ແລະ ຍົນເຮລີກົບແຕຢ່າງຫຼວງຫຼາຍ, ເພື່ອສົ່ງເຄື່ອງສົງເຄາະເຂົ້າໄປໃນເຂດປະສົບໄພ ແລະ ຍົກຍ້າຍຜູ້ປະສົບໄພໄປບ່ອນອື່ນ.
