ຈີນຍິນດີຮ່ວມກັນກັບສະຫະພາບເອີຣົບຊຸກຍູ້ການເຈລະຈາສັນຍາການລົງທຶນ
ວັນທີ 15 ພະຈິກນີ້ ຢູ່ທີ່ນະຄອນຫຼວງປັກກິ່ງ, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ເຈລະຈາກັບທ່ານມາກ ຣຸດ. ນາຍົກລັດຖະມົນຕີໂຮນລັງ. ທ່ານຫຼີເຄີ້ສຽງ ກ່າວວ່າ: ກອງປະຊຸມສຸດຍອດຈີນ-ເອີຣົບຄັ້ງທີ 16 ຈະຈັດຂຶ້ນໃນໄວໆນີ້, ຝ່າຍຈີນຍິນດີຮ່ວມກັນກັບຝ່າຍສະຫະພາບເອີຣົບເພື່ອວາງແຜນຂະຫຍາຍການພົວພັນລະຫວ່າງສອງຝ່າຍຈາກດ້ານຍຸດທະສາດແລະໄລຍະຍາວໄກ, ຊຸກຍູ້ການເຈລະຈາສັນຍາການລົງທຶນ, ຍົກລະດັບການຮ່ວມມືລະຫວ່າງສອງຝ່າຍໃຫ້ສູງຂຶ້ນ. ຫວັງວ່າໂຮນລັງໃນຖານະເປັນປະເທດສະມາຊິກສະຫະພາບເອີຣົບ ຈະເສີມຂະຫຍາຍບົດບາດຊຸກຍູ້ຢ່າງຕັ້ງໜ້າ.
ທ່ານຫຼີເຄີ້ສຽງ ກ່າວຕື່ມວ່າ: ຈີນແລະໂຮນລັງລ້ວນແຕ່ແມ່ນປະເທດທີ່ຕັ້ງໜ້າລິເລີ່ມ ການຄ້າເສລີສາກົນ. ປັດຈຸບັນນີ້, ການຟື້ນຕົວຂອງເສດຖະກິດໂລກຍັງປະເຊີນກັບຫຼາຍປັດໄຈທີ່ບໍ່ແນ່ນອນ, ຈີນແລະສະຫະພາບເອີຣົບຕ້ອງເພີ່ມທະວີການປະສານງານດ້ານນະໂຍບາຍເສດຖະກິດມະຫາພາກ, ຮ່ວມກັນອອກສຽງຄັດຄ້ານລັດທິປົກປ້ອງການຄ້າ, ເພື່ອຊຸກຍູ້ການຄ້າແລະການລົງທຶນເປັນແບບເສລີ ແລະ ມີຄວາມສະດວກກວ່າເກົ່າ. ທ່ານຫຼີເຄີ້ສຽງ ກ່າວຕໍ່ໄປວ່າ: ໃນຫຼາຍປີມານີ້, ການຮ່ວມມືລະຫວ່າງຈີນ-ໂຮນລັງໄດ້ຢູ່ແຖວໜ້າຂອງການຮ່ວມມືລະຫວ່າງຈີນກັບປະເທດສະຫະພາບເອີຣົບໂດຍຕະຫຼອດ, ສອງຝ່າຍຕ້ອງຮັກສາທ່ວງທ່ານີ້ໃຫ້ດີ, ຄົ້ນຄວ້າຄວາມສາມາດບົ່ມຊ້ອນທີ່ຕ່າງຝ່າຍຕ່າງມີຄວາມຍູ້ໜູນກັນໃນດ້ານຕ່າງໆ ເຊັ່ນ: ຕະຫຼາດ, ເຕັກໂນໂລຊີ, ບຸກຄະລາກອນ ແລະ ທຶນຮອນ, ເພີ່ມທະວີການຮ່ວມມືໃນຂົງເຂດຕ່າງໆ, ເຊັ່ນ: ຄວາມປອດໄພດ້ານສະບຽງອາຫານ, ການປະຢັດພະລັງງານ, ການອະນຸລັກສິ່ງແວດລ້ອມ, ວັດສະດຸໃໝ່, ພະລັງງານໃໝ່ ແລະອື່ນໆ, ເປີດກວ້າງການຮ່ວມມືດ້ານການເງິນ ແລະ ສິນເຊື່ອສີຂຽວລະຫວ່າງວິສາຫະກິດຂະໜາດນ້ອຍ.
ທ່ານມາກ ຣຸດ, ນາຍົກລັດຖະມົນຕີໂຮນລັງ ກ່າວວ່າ: ຝ່າຍໂຮນລັງເຫັນວ່າ, ການເລັ່ງລັດຊຸກຍູ້ການເຈລະຈາສັນຍາການລົງທຶນລະຫວ່າງເອີຣົບ-ຈີນ ແລະ ສ້າງເຂດການຄ້າເສລີເອີຣົບ-ຈີນ ມີຜົນດີຕໍ່ການພັດທະນາເສດຖະກິດຂອງສອງຝ່າຍ, ຫວັງວ່າກອງປະຊຸມສຸດຍອດເອີຣົບ-ຈີນຄັ້ງທີ 16 ຈະໄດ້ຮັບຜົນສຳເລັດ.
