ປະທານປະເທດຈີນພົບປະກັບອະດີດປະທານາທິບໍດີອາເມລິກາ
ວັນທີ 18 ພະຈິກນີ້, ທ່ານສີຈິ້ນຜິງ, ປະທານປະເທດຈີນໄດ້ພົບປະກັບທ່ານບິນ ກລິນຕັນປະທານາທິບໍດີອາເມລິກາ ຢູ່ນະຄອນຫລວງປັກກິ່ງຂອງຈີນ.
ທ່ານປະທານສີຈິ້ນຜິງໄດ້ສະແດງຄວາມຊົມເຊີຍຕໍ່ທ່ານກລິນຕັນທີ່ໄດ້ທໍາຄວາມພະຍາຍາມຢ່າງຕັ້ງໜ້າເພື່ອຊຸກຍູ້ການພັດທະນາການພົວພັນຈີນ-ອາເມລິກາໃນໄລຍະດໍາລົງຕໍາແໜ່ງປະທານາທິບໍດີອາເມລິກາ ແລະໄດ້ດໍາເນີນການຮ່ວມມືທີ່ມີປະສິດທິຜົນກັບຈີນໃນຂົງເຂດຕ່າງໆ ເຊັ່ນການຫລຸດຜ່ອນຄວາມທຸກຍາກ, ການກຸສົນ, ການປ້ອງກັນພະຍາດໂດຍສະເພາະແມ່ນການປ້ອງກັນພະຍາດເອດ ແລະອື່ນໆພາຍຫລັງທີ່ທ່ານໄດ້ພົ້ນອອກຈາກຕໍາແໜ່ງ. ທ່ານສີຈິ້ນຜິງໄດ້ຊີ້ອອກວ່າ, ການພັດທະນາຂອງການພົວພັນຈີນ-ອາເມລິກາຕ້ອງການການສະໜັບສະໜູນແລະການເຂົ້າຮ່ວມຢ່າງຕັ້ງໜ້າຂອງບຸກຄົນວົງການຕ່າງໆຂອງສອງປະເທດ. ຫວັງວ່າທ່ານກລິນຕັນແລະກອງທຶນກລິນຕັນຈະສືບຕໍ່ປະກອບສ່ວນເຂົ້າໃນການພົວພັນຈີນ-ອາເມລິກາ ເພື່ອຊຸກຍູ້ຄົນຫລາຍກວ່າເກົ່າປະກອບສ່ວນເຂົ້າໃນວຽກງານການຮ່ວມມືໄມຕີຈິດມິດຕະພາບຈີນ-ອາເມລິກາ.
ທ່ານກລິນຕັນກ່າວວ່າ, ອາເມລິກາກັບຈີນຄວນເພີ່ມທະວີການຮ່ວມມື, ຮ່ວມກັນຮັບມືກັບສິ່ງທ້າທາຍຕ່າງໆໃນທົ່ວໂລກ ເພື່ອສ້າງອະນາຄົດອັນດີງາມໃຫ້ແກ່ປະຊາຊົນສອງຊາດ. ຍິນດີສືບຕໍ່ຊຸກຍູ້ການຮ່ວມມືລະຫວ່າງອາເມລິກາກັບຈີນໃນຂົງເຂດຕ່າງໆເຊັ່ນສາທາລະນະສຸກ, ພະລັງງານໃໝ່, ການປ່ຽນແປງຂອງດິນຟ້າອາກາດ ແລະອື່ນໆ ແລະດໍາເນີນການຮ່ວມມືກັບຈີນໃນພາກພື້ນຕ່າງໆເຊັ່ນອາຟຼິກາເປັນຕົ້ນ ເພື່ອຊຸກຍູ້ຄວາມຜາສຸກຂອງມວນມະນຸດແລະການພັດທະນາແບບຍືນຍົງຂອງໂລກ.
