ອຸດສາຫະກຳພິມຈຳໜ່າຍຈີນ-ອາຊຽນຈາກອານາລອກພັດທະນາໄປສູ່ຍຸກດີຈິຕອນ
ງານວາງສະແດງແລະຈຳໜ່າຍປຶ້ມຈີນປີ 2013 ກຳລັງດຳເນີນຢູ່ຈາກາຕາ ນະຄອນຫຼວງອິນໂດເນເຊຍ. ໃນໄລຍະ 5 ປີມານີ້, ກົມໃຫຍ່ຖະແຫຼງຂ່າວສານ ພິມຈຳໜ່າຍ ວິທະຍຸ ໂທລະພາບແລະຮູບເງົາແຫ່ງຊາດຈີນໄດ້ມອບສິດໃຫ້ເຂດກວາງຊີຈີນ ຈັດງານວາງສະແດງ ແລະ ຈຳໜ່າຍປຶ້ມຈີນ ກໍ່ຄືງານເຈລະຈາການຄ້າລິກຂະສິດຢູ່ຫວຽດນາມ, ກຳປູເຈຍ ແລະ ອິນໂດເນເຊຍ, ງານວາງສະແດງແລະຈຳໜ່າຍດັ່ງກ່າວໄດ້ຮັບຄວາມຊົມເຊີນຢ່າງສຸດອົກສຸດໃຈແລະ ການສະໜັບສະໜູນອັນແຂງແຮງຈາກວົງການພິມຈຳໜ່າຍຂອງຈີນ ແລະ ປະເທດທີ່ກ່ຽວຂ້ອງຂອງອາຊຽນ, ຄ່ອຍໆກາຍເປັນ "ຍີ່ຫໍ້ສຳຄັນ" ຂອງຈີນໃນການດຳເນີນການແລກປ່ຽນດ້ານວັດທະນະທຳກັບຕ່າງປະເທດ. ສອງຝ່າຍກຳລັງຊອກຄົ້ນເສັ້ນທາງທີ່ເຮັດໃຫ້ອຸດສາຫະກຳພິມຈຳໜ່າຍແບບເກົ່າພັດທະນາໄປສູ່ຍຸກດີຈິຕອນ.
ຈີນໄດ້ພູມີພາກຕິດຕໍ່ກັບປະເທດອາຊຽນ, ມີເຊື້ອສາຍໃກ້ຊິດກັນ, ວັດທະນະທຳກໍ່ຄ້າຍຄືກັນ, ນັບແຕ່ສະໄໝບູຮານເປັນຕົ້ນມາ, ການແລກປ່ຽນ ແລະ ການຮ່ວມມືດ້ານວັດທະນະທຳລະຫວ່າງສອງຝ່າຍກໍ່ໄດ້ດຳເນີນເລື້ອຍໆມາ. ຄຽງຄູ່ກັບເສດຖະກິດພາກພື້ນເຊື່ອມໂຍງເຂົ້າກັນ ແລະ ການກໍ່ສ້າງເຂດການຄ້າເສລີຈີນ-ອາຊຽນໄດ້ຮັບຄວາມຄືບໜ້າເລື້ອຍໆ, ການໄປມາຫາສູ່ດ້ານເສດຖະກິດການຄ້າລະຫວ່າງສອງຝ່າຍນັບມື້ນັບສະໜິດແໜ້ນຂຶ້ນ, ໂດຍສະເພາະການແລກປ່ຽນ ແລະ ການຮ່ວມມືດ້ານວັດທະນະທຳຍິ່ງມີຊີວິດຊີວາຂຶ້ນກວ່າເກົ່າ. ການເພິ່ມທະວີການແລກປ່ຽນ ແລະ ການຮ່ວມມືໃນວົງການພິມຈຳໜ່າຍລະຫວ່າງຈີນ ກັບ ປະເທດອາຊຽນ, ສະແດງໃຫ້ເຫັນທ່ວງທ່າໃໝ່ທີ່ອຸດສາຫະກຳພິມຈຳໜ່າຍໄດ້ຫັນເປັນແບບສາກົນ, ສ່ອງແສງໃຫ້ເຫັນຄວາມປາຖະໜາຮ່ວມຂອງປະຊາຊົນຈີນ ແລະ ປະຊາຊົນບັນດາປະເທດອາຊຽນ.
