ຄວາມຮັກແມ່ນຫຍັງ?
(GMT+08:00) 2014-05-12 17:03:20 cri
ຄວາມຮັກເປັນຫົວຂໍ້ທີ່ມະນຸດເຮົາຮຽນມາຫຼາຍພັນປີ ແຕ່ພັດບໍ່ເຄີຍມີໃຜສາມາດສະຫຼຸບໄດ້ໝົດ, ແຕ່ຄວາມງາມຂອງຄວາມຮັກກໍ່ຢູ່ບ່ອນວ່າ: ມັນບໍລິສຸດ, ແຕ່ກໍ່ສັບສົນ, ມັນເຮັດໃຫ້ຮູ້ສຶກມ່ວນຊື່ນ, ແຕ່ກໍ່ພາໃຫ້ເຈັບແໜ້ນແຄນໃຈ, ມັນເປັນແຫຼ່ງກຳເນີດແຫ່ງໂລກນີ້, ແຕ່ກໍ່ມີກຳລັງແຫ່ງການທຳລາຍຫຼາຍ…
ຄວາມຮັກແມ່ນຫຍັງ? ທຸກຄົນຈະມີຄຳຕອບທີ່ຕ່າງກັນຕໍ່ຄຳຖາມນີ້, ເພາະຄວາມຮັກມີຄວາມໝາຍຕ່າງກັນຕໍ່ທຸກຄົນ. ບາງຄົນເຫັນວ່າ, ຄວາມຮັກແມ່ນຄວາມຮຽກຮ້ອງຕ້ອງການ ຢາກໄດ້ຮັບຫຼາຍສິ່ງຫຼາຍຢ່າງຈາກຄົນຮັກ, ບາງຄົນເຫັນວ່າ, ຄວາມຮັກໝາຍເຖິງການທີ່ຍອມເສຍສະຫຼະທຸກສິ່ງທຸກຢ່າງໃຫ້ຄົນທີ່ຕົນຮັກ, ບາງຄົນເຫັນວ່າ, ຄວາມຮັກ ໝາຍເຖິງສອງຄົນຢາກຢູ່ນຳກັນຕະຫຼອດຊີວິດ.
ສຳລັບຜູ້ສາວໄວຄະນອງ, ຄວາມຮັກເໝືອນດັ່ງໂຊໂກລາ, ມີລົດຫວານຊື່ນຫຼາຍ ທີ່ປົນກັບລົດຂົມຂື່ນໜ້ອຍໜຶ່ງ.
ສຳລັບຜູ້ຍິງໄວກາງຄົນທີ່ແຕ່ງງານແລ້ວ, ຄວາມຮັກຄືກັນກັບນ້ຳລ້າໆທີ່ຈືດຈາງ, ກິນແລ້ວບໍ່ມີລົດຊາດຫຍັງ, ແຕ່ຂາດມັນກໍ່ບໍ່ໄດ້.
ສຳລັບຜູ້ເຖົ້າໄວຊະລາ, ຄວາມຮັກໝາຍເຖິງຜົວເມຍສອງຄົນເກາະແຂນກັນ, ເບີ່ງແຍງກັນ, ເອົາໃຈໃສ່ກັນ, ດຳລົງຊີວິດຢ່າງມີຄວາມສະຫງົບ.
ຄວາມຮັກທີ່ແທ້ຈິງແມ່ນຫຍັງ? ແມ່ນຮັກຄົນນັ້ນ ແລະຖະໜອມຫວງແຫນຄົນນັ້ນ ເໝືອນກັບວ່າ ຄົນນັ້ນແມ່ນເພັດນິນຈິນດາທີ່ລ້ຳຄ່າ. ຍອມສະຫຼະທຸກສິ່ງທຸກຢ່າງເພື່ອເຂົາ ແຕ່ບໍ່ຢາກໄດ້ຄ່າຕອບແທນຫຍັງ, ຖ້າຄົນນັ້ນຍີ້ມໃສ່ເຮົາໜ້ອຍໜຶ່ງ ກໍ່ຈະຕື້ນຕັນໃຈຫຼາຍທີ່ສຸດ. ນີ້ລະ, ຄືຄວາມຮັກ.
