ສິ່ງທີ່ເຈົ້າສະຫຼະໃຫ້ຜູ້ອື່ນ, ຈະກັບມາຫາເຈົ້າໃນທີ່ສຸດ
(GMT+08:00) 2014-06-30 10:34:10 cri
ມີຊາວນາຜູ້ໜຶ່ງ, ແນວພັນສາລີທີ່ລາວປູກ ໄດ້ຮັບລາງວັນຜະລິດຕະພັນດີເລີດກວ່າໝູ່ໃນທຸກປີ. ຫຼັງຈາກໄດ້ຮັບລາງວັນແລ້ວ, ລາວກໍ່ຈະເອົາແນວພັນທີ່ໄດ້ຮັບລາງວັນນັ້ນ, ແຈກຢາຍໃຫ້ຊາວນາຜູ້ອື່ນໂດຍບໍ່ເຫັນແກ່ຕົວ.
ມີຄົນຖາມລາວວ່າ, ເປັນຫຍັງລາວຈຶ່ງເອື້ອເຟື້ອເພື່ອແຜ່ປານນີ້?
ລາວຕອບວ່າ: ຂ້ອຍດີຕໍ່ຜູ້ອື່ນ, ທີ່ຈິງແລ້ວ ກໍ່ແມ່ນດີຕໍ່ຕົວເອງ. ລົມພັດເກສອນດອກໄມ້ໄປທຸກບ່ອນ, ຖ້າວ່າແນວພັນທີ່ຄົນບ້ານໃກ້ເຮືອນຄຽງປູກນັ້ນບໍ່ດີ, ໃນເວລາເກສອນແຜ່ຂະຫຍາຍ, ກໍ່ຈະກະທົບເຖິງຄຸນນະພາບສາລີຂ້ອຍ. ສະນັ້ນ, ຂ້ອຍດີໃຈຫຼາຍທີ່ສາມາດປູກແນວພັນດີເລີດຄືກັນພ້ອມກັບຊາວນາຄົນອື່ນ.
ຄວາມເວົ້າຂອງລາວ, ຟັງແລ້ວຄືວ່າງ່າຍໆ, ແຕ່ພັດມີເຫດຜົນເລິກເຊິ່ງ, ສິ່ງທີ່ເຈົ້າເຮັດເພື່ອຜູ້ອື່ນ, ໃນທີ່ສຸດ, ກໍ່ແມ່ນເຮັດເພື່ອຕົວເອງ.
ສະນັ້ນ, ຖ້າເຈົ້າຫວັງຢາກໄດ້ຮັບຜົນປະໂຫຍດ, ເຈົ້າຕ້ອງໃຫ້ຜູ້ອື່ນໄດ້ຮັບຜົນປະໂຫຍດກ່ອນ.
ຄືກັນກັບຊາວນາຜູ້ນັ້ນ, ຖ້າເຈົ້າສາມາດໄດ້ຮັບແນວພັນດີເລີດກວ່າໝູ່, ເຈົ້າກໍ່ຕ້ອງຢາຍແນວພັນທີ່ດີເລີດນັ້ນໃຫ້ຜູ້ອື່ນກ່ອນ.
ຖ້າເຈົ້າຫວັງຢາກໄດ້ຮັບຄວາມຮັກຈາກຄົນອື່ນ, ເຈົ້າຕ້ອງຮັກຜູ້ອື່ນກ່ອນ.
ຖ້າເຈົ້າຫວັງຢາກໃຫ້ຜູ້ອື່ນເອົາໃຈໃສ່, ເຈົ້າຕ້ອງເອົາໃຈໃສ່ຜູ້ອື່ນກ່ອນ.
ຖ້າເຈົ້າຫວັງຢາກໃຫ້ຜູ້ອື່ນດີຕໍ່ເຈົ້າ, ເຈົ້າກໍ່ຕ້ອງດີຕໍ່ຜູ້ອື່ນກ່ອນ.
ນີ້ແມ່ນຫຼັກສູດທີ່ຮັບປະກັນທີ່ສຸດ, ເໝາະສົມສຳລັບທຸກສະພາບການ.
ຖ້າເຈົ້າຫວັງຢາກໄດ້ເພື່ອນທີ່ຈິງໃຈ, ເຈົ້າຕ້ອງຈິງໃຈຕໍ່ເພື່ອນມິດກ່ອນ, ແລ້ວເຈົ້າກໍ່ຈະປະກົດເຫັນວ່າ, ເພື່ອນມິດກໍ່ເລີ່ມຈິງໃຈຕໍ່ເຈົ້າ.
ຖ້າເຈົ້າຫວັງຢາກໄດ້ຮັບຄວາມດີໃຈ, ເຈົ້າກໍ່ຕ້ອງນຳເອົາຄວາມດີໃຈໃຫ້ຜູ້ອື່ນ, ບໍ່ດົນ, ເຈົ້າຈະປະກົດເຫັນວ່າ, ຕົວເອງນັບມື້ນັບດີໃຈຂຶ້ນ.
ສິ່ງດີທີ່ສຸດທີ່ເຮົາສາມາດເຮັດໃຫ້ຕົວເອງ, ກໍ່ແມ່ນເຮັດສິ່ງດີໆໃຫ້ຜູ້ອື່ນ.
ສິ່ງທີ່ຕົວເອງຢາກໄດ້ຮັບ, ເຮັດເພື່ອຜູ້ອື່ນກ່ອນ. ຢ່າຄຶດນຳຜົນຕອບແທນຫຼາຍເກີນໄປ, ປະຕິບັດຕໍ່ທຸກຄົນໃນຊີວິດຕົວເອງດ້ວຍຈິດໃຈກວ້າງຂວາງ, ແລ້ວເຈົ້າຈະໄດ້ຮັບຄວາມສຸກໃນໃຈຄວາມມ່ວນຊື່ນທີ່ປະເສີດກວ່າໝູ່ຢ່າງທຳມະຊາດ. ເຮັດໃຈບຸນກັບຜູ້ອື່ນ, ກໍ່ເໝືອນດັ່ງເຮັດນາແຫ່ງຄວາມສຸກໃຫ້ຕົວເອງ, ເຮົາປູກແນວພັນແຫ່ງຄວາມໃຈບຸນໃນມື້ນີ້, ກໍ່ຈະໄດ້ຮັບຜົນບຸນໃນມື້ໜ້າຢ່າງແນ່ນອນ.
