​ປ່ຽນ​ຕົວ​ເອງ​ກ່ອນ

(GMT+08:00) 2014-07-28 11:06:32     cri

ຜູ້​ທີ່​ລອຍ​ນ້ຳ​ບໍ່​ເປັນ​ນັ້ນ, ​ປ່ຽນ​ສະ​ລອຍ​ນ້ຳ​ຕະຫຼອດກໍ່​ບໍ່ຫ່ອນ​ຈະ​ຊ່ວຍ​ໃຫ້​ລາວ​ລອຍ​ເປັນ, ຜູ້​ທີ່​ບໍ່ຮູ້​ຖະໜອມ​ຫວງ​ແຫນ​ຄວາມ​ຮັກ, ປ່ຽນ​​ແຟນຕະຫຼອດກໍ່​ແກ້​ໄຂ​ບັນຫາ​ບໍ່​ໄດ້, ຜູ້​ທີ່​ບໍ່ມີ​ຄວາມ​ສາມາດ​ໃນ​ການ​ເຮັດ​ວຽກ, ປ່ຽນ​ວຽກ​ຕະຫຼອດກໍ່​ບໍ່ຫ່ອນ​ຈະ​ຍົກ​ຄວາມ​ສາມາດຂຶ້ນ​​ໄດ້, ຜູ້​ທີ່​ບໍ່​ຮູ້​ເບີ່​ງ​ແຍ​ງ​ແລະບໍ່​ມີ​ຄວາມ​ຮັບຜິດຊອບ​ຕໍ່​ຄອບຄົວ​ຕົນ, ຈະ​ປະ​ຜົວ​ເມຍ​ເທື່ອ​ແລ້ວ​ເທື່ອ​ອີກ​ກໍ່​ບໍ່ຫ່ອນ​ຈະ​ແກ້​ໄຂ​ບັນຫາ​ໄດ້, ຜູ້​ທີ່​ບໍ່​ຮູ້ຫຼັກການ​ໃນ​ການ​ເຮັດ​ວຽກ, ບໍ່ຫ່ອນ​ຈະ​ໄດ້​ຮັບ​ຜົນສຳ​ເລັດ, ຜູ້​ທີ່​ບໍ່​ຮູ້​ຮັກສາ​ສຸຂະພາບ​ຂອງ​ຕົນ, ຈະ​ກິນ​ຢາຫຼາຍ​ເທົ່າ​ໃດ, ​ອຸປະກອນການ​ແພດ​ຈະ​ດີ​ເທົ່າ​​ໃດ, ກໍ່​ບໍ່ຫ່ອນ​ຈະ​ໃຫ້​ລາວ​ມີສຸຂະພາບ​ທີ່​ແຂງ​ແຮງ​ໄດ້.

ຖ້າ​ຢາກ​ປ່ຽນ​ແປງ​ສະພາບ​ຕົວ​ຈິງ, ຕ້ອງ​ປ່ຽນ​ຕົວ​ເອງ​ກ່ອນ. ​ເຈົ້າ​ເອງ​ປ່ຽນ​ແລ້ວ, ທຸກ​ເລື່ອງ​ກໍ່​ຈະ​ປ່ຽນ. ຊີວິດ​ຂອງ​ເຈົ້າ ​ແມ່ນ​ເຈົ້າ​ເອງ​ປະດິດ​ສ້າງ​ຂຶ້ນ, ທຸກ​ສິ່ງທີ່​ຂຶ້ນ​ກັບ​ເຈົ້າ ກໍ່​ແມ່ນ​ເຈົ້າ​​ເອງສ້າງ​ອອກ​ມາ​ແລະ​ແລກປ່ຽນ​ມາ. ຈິດ​ໃຈ​ຂອງ​ເຈົ້າ​ເປັນ​ແນວ​​ໃດ, ຊີວິດ​ຂອງ​ເຈົ້າ​ກໍ່​ຈະ​ເປັນ​ແນວ​ນັ້ນ!

ການ​ຈົ່ມ​ວ່າ​ຕະຫຼອດ​​ເປັນ​ເລື່ອງ​ງ່າຍ, ການ​ຕີ​ລາຄາ​ຕໍ່​ຜູ້​ອື່ນຫຼືຍຸຸກສະ​ໄໝ​ກໍ່​ແມ່ນ​​ເລື່ອງ​ງ່າຍ, ​​ແຕ່​ທຳ​ຄວາມ​ພະຍາຍາມ​ເພື່ອ​ປ���ຽນ​ຕົວ​ເອງ​ແລະ​ໂລກ​ພາຍ​ນອກ​ຈັກ​ໜ້ອຍ​ໜຶ່ງ ກໍ່​ເປັນ​ເລື່ອງ​ຍາກ. ​ແຕ່​ວ່າ, ​ເຖິງ​ຈະ​ເປັນຄວາມ​ພະຍາຍາມ​ໜ້ອຍ​ດຽວ ກໍ່​ມີ​ຄວາມ​ໝາຍ​ສຳຄັນ​ກວ່າ​ການ​ຕີ​ລາຄາ​ຕໍ່​ຍຸກ​ສະ​ໄໝ​ໜຶ່ງ.

ຖ້າ​ທ່ານ​ຄຶດ​ວ່າ ​ໂລກ​ນີ້​ບໍ່​ດີ, ​ກໍ່​ທຳ​ຄວາມ​ພະຍາຍາມ​ເພື່ອ​ເຮັດ​ໃຫ້​ມັນ​ດີ​ຂຶ້ນ, ຖ້າ​ທ່ານ​ຄຶດ​ວ່າ ​ໂລກ​ນີ້​ຍັງ​ຂາດ​ຫຍັງ, ກໍ່​​ໄປ​ສ້າງ​ສິ່ງ​ນັ້ນ​​ອອກ​ມາ​ໃຫ້​ໂລກ​ນີ້. ນີ້​ກໍ່​ແມ່ນຄະຕິ​ເຕືອນ​ໃຈ​ຂອງ​ວິ​ໄລ​ວັນ​ເອງ, ​ແບ່ງປັນ​ກັບ​ຜູ້​ຟັງ​ທັງຫຼາຍ, ຫວັງ​ວ່າ​ຈະ​ມີ​ປະ​ໂຫຍ​ດຕໍ່​ທ່ານ​ບໍ່ຫຼາຍກໍ່​ໜ້ອຍ!