ສະພາປະຊາຊົນແຫ່ງຊາດຈີນພິຈາລະນາວຽກງານຂອງລັດຖະບານ, ໃນປີ2012ແມ່ນສະແຫວງຫາຄວາມກ້າວໜ້າໃນສະຖຽນລະພາບ
(GMT+08:00) 2012-03-05 16:56:57 cri
ຕອນເຊົ້າວັນທີ5ມີນານີ້, ສະພາປະຊາຊົນແຫ່ງຊາດຈີນ, ອົງການອຳນາດສູງສຸດຂອງຈີນໄດ້ຈັດກອງປະຊຸມປະຈຳປີຢູ່ນະຄອນຫຼວງປັກກິ່ງ. ການສະແຫວງຫາຄວາມກ້າວໜ້າໃນສະຖຽນລະພາບໄດ້ກາຍເປັນທິດທາງລວມໃນການພັດທະນາເສດຖະກິດແລະສັງຄົມຂອງຈີນໃນປີ2012.
ໃນບົດລາຍງານວຽກງານລັດຖະບານທີ່ປະກາດໂດຍທ່ານເວິ່ນເຈ່ຍປາວ, ນາຍົກລັດຖະມົນຕີຈີນ, ຈັງຫວະເຕີບໂຕຂອງGDPໄດ້ປັບຈາກ8%ໃນປີກາຍນີ້ໃຫ້ລົງເປັນ7,5%, ນີ້ກໍ່ແມ່ນຄັ້ງທຳອິດທີ່ລັດຖະບານຊຸດນີ້ປັບຕົວເລກຄາດໝາຍດັ່ງກາວໃຫ້ຕ່ຳກວ່າ8%ໃນວາລະດຳລົງຕຳແໜ່ງ5ປີມານີ້. ທ່ານເວິ່ນເຈ່ຍປາວອະທິບາຍວ່າ,
ເປົ້າໝາຍການເຕີບໂຕຂອງGDPໄດ້ປັບໃຫ້ຕໍ່າລົງໜ້ອຍໜຶ່ງ, ແມ່ນເພື່ອຊີ້ນຳພາກສ່ວນຕ່າງໆສຸມໃສ່ການເລັ່ງລັດປ່ຽນແປງຮູບການພັດທະນາເສດຖະກິດ, ຍົກສູງຄຸນນະພາບແລະປະສິດທິຜົນຂອງການພັດທະນາເສດຖະກິດຢ່າງຕິດແທດຕົວຈິງ, ເພື່ອບັນລຸການພັດທະນາໃນໄລຍະຍາວນານກວ່າເກົ່າ, ລະດັບສູງກວ່າເກົ່າແລະມີຄຸນນະພາບທີ່ດີກວ່າເກົ່າ.
ໃນບົດລາຍງານ, ທ່ານເວິ່ນເຈ່ຍປາວຍັງໄດ້ອະທິບາຍທິດທາງການເຮັດວຽກຢ່າງຈະແຈ້ງໃນປີນີ້. ທ່ານກ່າວວ່າ,
ຖ້າຢາກເຮັດວຽກຂອງປີນີ້ໃຫ້ດີຢ່າງຮອບດ້ານ, ຕ້ອງຍຶດໝັ້ນເນັ້ນໜັກຫົວຂໍ້ຫຼັກ, ຈັດຕັ້ງປະຕິບັດໃຫ້ທົ່ວເຖິງ, ວາງແຜນການຢ່າງເປັນເອກະພາບກັນ, ກ້າວໄປໜ້າຢ່າງກົມກຽວກັນ, ຖືເອົາການຮັກສາຄວາມໝັ້ນທ່ຽງຂອງການເຕີບໂຕ, ຄວບຄຸມລາຄາສິນຄ້າ, ປັບປຸງໂຄງປະກອບ, ນຳເອົາຜົນປະໂຫຍດໃຫ້ແກ່ຊີວິດການເປັນຢູ່ຂອງປະຊາຊົນ, ຊຸກຍູ້ການປະຕິຮູບ, ສົ່ງເສີມຄວາມກົມກຽວກັນໃຫ້ເຊື່ອມໂຍງເຂົ້າກັນເປັນຢ່າງດີ.
ຫາງສຽງທົ່ວໄປເຫັນວ່າ, ແນວຄິດດັ່ງກ່າວໄດ້ສະແດງໃຫ້ເຫັນທິດທາງລວມທີ່"ສະແຫວງຫາຄວາມກ້າວໜ້າໃນສະຖຽນລະພາບ". ປະຈຸບັນ, ເສດຖະກິດໂລກພວມຊຸດໂຊມລົງ, ຄວາມບໍ່ໝັ້ນທ່ຽງແລະຄວາມບໍ່ແນ່ນອນໃນການຟື້ນຕົວກໍ່ເພີ່ມຂຶ້ນ, ພ້ອມກັນນັ້ນ, ວິສາຫະກິດຂະໜາດກາງແລະນ້ອຍຂອງຈີນມີຄວາມຫຍຸ້ງຍາກຫຼາຍຂຶ້ນໃນການດຳເນີນທຸລະກິດ, ຈັງຫວະການເຕີບໂຕດ້ານເສດຖະກິດກໍ່ມີທ່າອ່ຽງຫຼຸດຕ່ຳລົງອີກ. ພາຍໃຕ້ສະພາບການດັ່ງກາວ, ການເຕີບໂຕດ້ານເສດຖະກິດຂອງຈີນມີຄວາມຈຳເປັນທີ່ຕ້ອງຮັກສາຄວາມໝັ້ນທ່ຽງ. ນອກນນີ້, ບົດລາຍງານຍັງສະເໜີອອກມາວ່າ, ການຮັກສາຄວາມໝັ້ນທ່ຽງພື້ນຖານຂອງລະດັບລາຄາສິນຄ້າ, ຊຸກຍູ້ການພັດທະນາກະສິກຳຢ່າງໝັ້ນທ່ຽງ, ໃຫ້ຊາວກະສິກອນມີລາຍໄດ້ເພີ່ມຂຶ້ນຢ່າງຕໍ່ເນື່ອງ, ສືບຕໍ່ປະຕິບັດນະໂຍບາຍການເງິນທີ່ຕັ້ງໜ້າແລະນະໂຍບາຍເງິນຕາທີ່ໝັ້ນທ່ຽງ, ທັງໝົດເຫຼົ່ານີ້ລ້ວນແຕ່ສະແດງໃຫ້ເຫັນຄວາມໝາຍຕົວຈິງຂອງສະຖຽນລະພາບ.
ການຮັກສາສະຖຽນລະພາບແມ່ນເພື່ອສະແຫວງຫາຄວາມກ້າວໜ້າ. ບົດລາຍງານຍັງກ່າວຕື່ມອີກວ່າ, ຄວນເລັ່ງລັດການປ່ຽນແປງຮູບການພັດທະນາເສດຖະກິດ, ຮັບປະກັນແລະປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນຢ່າງແທ້ຈິງ, ຊຸກຍູ້ການພັດທະນາແລະຄວາມຈະເລີນຮຸ່ງເຮືອງຂອງວັດທະນະທຳ, ລົງເລິກຊຸກຍູ້ການປະຕິຮູບໃນຂົງເຂດທີ່ສຳຄັນ, ເຊິ່ງໄດ້ລວມທັງຂົງເຂດທີ່ລັດຖະບານຈີນຈະມີການປະດິດສ້າງໃໝ່ໃນປີນີ້, ໃນນັ້ນ, ເນື້ອໃນກ່ຽວກັບການປະຕິຮູບໄດ້ເພີ່ມຂຶ້ນຢ່າງຫຼວງຫຼາຍເມື່ອທຽບກັບຫຼາຍປີຜ່ານມາ, ທັງໄດ້ແບ່ງເປັນຫຼາຍປະເພດແລະເປັນລະບຽບ. ໃນນັ້ນພວກເຮົາກໍ່ສາມາດສັງເກດເຫັນໄດ້ວ່າ, ລັດຖະບານຈີນຫວັງຢາກຜ່ານຈາກການປະຕິຮູບເພື່ອຊຸກຍູ້ການພັດທະນາ, ແລະແກ້ໄຂບັນຫາຫຍຸ້ງຍາກຕ່າງໆຂອງສັງຄົມຈີນໃນປະຈຸບັນ.