ນັກວິຊາການໄທຕີລາຄາສູງຕໍ່ບົດລາຍງານວຽກງານຂອງລັດຖະບານຈີນ
(GMT+08:00) 2012-03-08 16:21:45 cri
ພາຍຫຼັງທ່ານເວິ່ນເຈ່ຍປາວ ນາຍົກລັດຖະມົນຕີຈີນໄດ້ລາຍງານວຽກງານຂອງລັດຖະບານຢູ່ທີ່ພິທີໄຂກອງປະຊຸມຄັ້ງທີ5ຂອງສະພາປະຊາຊົນແຫ່ງຊາດຈີນຊຸດທີ11ໃນວັນທີ5ມີນານີ້ແລ້ວ,ສື່ມວນຊົນແລະນັກວິຊາການປະເທດຕ່າງໆໄດ້ຕີລາຄາຢ່າງຕັ້ງໜ້າຕໍ່ບົດລາຍງານ.ຊ່ຽວຊານກ່ຽວກັບບັນຫາຈີນສອງທ່ານຂອງໄທຄືສາສະດາຈານອະເນກ ເຫຼົ່າທຳມະທັດ ຫົວໜ້າສະຖາບັນຄຸ້ມຄອງບໍລິຫານຂອງມະຫາວິທະຍາໄລຣັງສິດໄທແລະຮອງສາສະດາຈານ ພອນໄຊ ຕະກູນວະຣານົນ ຫົວໜ້າສະຖາບັນສັງຄົມສາດແລະມະນຸດສາດຂອງມະຫາວິທະຍາໄລທຳມະສາດໄທໄດ້ຕ້ອນຮັບການເຂົ້າສຳພາດຂອງນັກຂ່າວCRI,ທ່ານທັງສອງໄດ້ຕີລາຄາສູງຕໍ່ບົດລາຍງານວຽກງານຂອງລັດຖະບານຈີນ.
ສາສະດາຈານອະເນກ ເຫຼົ່າທຳມະທັດ ຫົວໜ້າສະຖາບັນຄຸ້ມຄອງບໍລິຫານມະຫາວິທະຍາໄລຣັງສິດໄທຊີ້ອອກວ່າ:"ນີ້ແມ່ນບົດລາຍງານວຽກງານລັດຖະບານທີ່ດີເດັ່ນທີ່ສຸດ,ມີເນື້ອໃນລະອຽດແລະຄົບຖ້ວນ,ເບິ່ງກວ້າງມອງໄກ,ບໍ່ພຽງແຕ່ໄດ້ບັນລະຍາຍຜົນງານຂອງລັດຖະບານເທົ່ານັ້ນ,ຍັງໄດ້ຊີ້ໃຫ້ເຫັນຂໍ້ບົກຜ່ອງທີ່ມີຢູ່ໃນປະຈຸບັນຢ່າງຈິງໃຈທີ່ສຸດ.ພ້ອມນີ້ບົດລາຍງນດັ່ງກ່າວຍັງໄດ້ເນັ້ນໜັກການແກ້ໄຂບັນຫາຕົວຈິງ,ສະເໜີບັນຫາທີ່ຕ້ອງເອົາໃຈໃສ່ໃນໄລຍະຂະບວນການພັດທະນາເສດຖະກິດແລະໄດ້ສະເໜີຕົວເລກລະອຽດ. ລັດຖະບານທີ່ມີຄວາມຮັບຜິດຊອບຕໍ່ປະຊາຊົນແລະສັງຄົມກໍ່ຄວນເປັນເຊັ່ນນີ້."
ສາສະດາຈານອະເນກ ເຫຼົ່າທຳມະທັດ ຍັງກ່າວຕື່ມອີກວ່າ: "ບົດລາຍງານໄດ້ໃຫ້ຂໍ້ມູນອັນຈະແຈ້ງຢ່າງຫຼວງຫຼາຍຕໍ່ຊາວໂລກ,ຕົວຢ່າງເຊັ່ນຈີນຈະເຮັດໃຫ້ການເຕີບໂຕທາງດ້ານເສດຖະກິດມີຄວາມໝັ້ນທ່ຽງ,ຍຶດໝັ້ນເປີດກວ້າງຄວາມຕ້ອງການພາຍໃນ,ເຮັດໃຫ້ຄວາມຕ້ອງພາຍນອກມີຄວາມໝັ້ນທ່ຽງ,ອອກແຮງພັດທະນາເສດຖະກິດຕົວຈິງ,ພະຍາຍາມຜ່ານຜ່າຄວາມຫຍຸ້ງຍາກທີ່ໄດ້ຮັບຜົນສະທ້ອນຈາກປັດໄຈຕ່າງໆນາໆທີ່ບໍ່ໝັ້ນທ່ຽງແລະບໍ່ແນ່ນອນຂອງທັງພາຍໃນແລະຕ່າງປະເທດ.ທັງໝົດເຫຼົ່ານີ້ເວົ້າສຳລັບຈີນ,ໄທກໍ່ຄືທົ່ວໂລກແລ້ວລ້ວນແຕ່ມີຄວາມໝາຍອັນຕັ້ງໜ້າທີ່ສຸດ,ສາມາດຊຸກຍູ້ໃຫ້ພາກພື້ນແຫ່ງນີ້ມີຄວາມຈະເລີນຮຸ່ງເຮືອງແລະການພັດທະນາ."
ຮອງສາສະດາຈານ ພອນໄຊ ຕະກູນວະຣານົນ ຫົວໜ້າສະຖາບັນສັງຄົມສາດແລະມະນຸດສາດຂອງມະຫາວິທະຍາໄລທຳມະສາດໄທກ່າວວ່າ,ບົດລາຍງານໄດ້ເນັ້ນໜັກການພັດທະນາແບບຍືນຍົງແລະສະໝ່ຳສະເໝີຊຶ່ງເປັນສິ່ງໜຶ່ງໃນການຊຸກຍູ້ໃຫ້ມີໃຫ້ກຳລັງໃຈຫຼາຍ.ທ່ານກ່າວວ່າ:"ບົດລາຍງານບໍ່ພຽງແຕ່ໄດ້ເນັ້ນໜັກການພັດທະນາແບບຍືນຍົງຂອງເສດຖະກິດ,ຍັງເອົາໃຈໃສ່ນຳຄວາມສະໝ່ຳສະເໝີຂອງອົງປະກອບເສດຖະກິດແລະຄວາມສະໝ່ຳສະເໝີຂອງການແບ່ງປັນລາຍໄດ້,ຫຼຸດຜ່ອນການອາໄສແຕ່ການສົ່ງອອກສິນຄ້າໃຫ້ໜ້ອຍລົງ,ເປີດກວ້າງຄວາມຕ້ອງການພາຍໃນ,ໄດ້ສ້າງກົນໄກທີ່ຍົກສູງລະດັບຊີວິດການເປັນຢູ່ຂອງປະຊາຊົນ,ເຮັດໃຫ້ປະຊາຊົນສາມາດຊົມໃຊ້ຜົນປະໂຫຍດຕົວຈິງໂດຍກົງທີ່ໄດ້ມາຈາກການພັດທະນາທາງດ້ານເສດຖະກິດ."