ປີ2011ເສດຖະກິດກະສິກຳຊົນນະບົດຈີນມີທ່ວງທ່າພັດທະນາທີ່ດີຂຶ້ນ
(GMT+08:00) 2012-03-09 15:55:03 cri
ວັນທີ9ມີນານີ້, ທ່ານຮານຊາງຟູ້, ລັດຖະມົນຕີວ່າການກະຊວງກະສິກຳຈີນກ່າວວ່າ, ປີ2011ລວມຍອດປະລິມານຜົນຜະລິດທັນຍາຫານແລະລາຍຮັບສະເລ່ຍຕາມຫົວຄົນຂອງຊາວກະສິກອນຈີນໄດ້ເພີ່ມຂຶ້ນ8ປີລຽນຕິດ, ເສດຖະກິດ ກະສິກຳຊົນນະບົດມີທ່າອ່ຽງພັດທະນາທີ່ດີ.
ໃນກອງປະຊຸມຂ່າວຂອງກອງປະຊຸມຄັ້ງທີ5ຂອງສະພາປະຊາຊົນແຫ່ງຊາດຈີນຊຸດທີ11, ທ່ານຮານຊາງຟູ້ກ່າວວ່າ, ປີ2011, ຍອດຜົນຜະລິດທັນຍາຫານຂອງຈີນໄດ້ບັນລຸເຖິງ571ລ້ານກວ່າໂຕນ, ເຊິ່ງເປັນຄັ້ງທຳອິດທີ່ເພີ່ມຂຶ້ນ8ປີລຽນຕິດໃນເຄິ່ງສັດຕະວັດມານີ້. ລາຍຮັບສະເລ່ຍຕາມຫົວຄົນຂອງຊາວກະສິກອນທົ່ວປະເທດຈີນມີເຖິງ6977ຢວນ, ເຊິ່ງໄດ້ຮັກສາຈັງຫວະເພີ່ມຂຶ້ນໄວສົມຄວນ8ປີລຽນຕິດ.
ທ່ານຮານຊາງຟູ້ກ່າວຕື່ມອີກວ່າ, ປີ2012ຈີນຈະຖືການພັດທະນາດ້ານການຜະລິດທັນຍາຫານຢ່າງໝັ້ນທ່ຽງເປັນວຽກງານສຳຄັນ, ເລັ່ງລັດຄວາມກ້າວໜ້າຂອງເຕັກນິກວິທະຍາສາດກະສິກຳ, ຊຸກຍູ້ການສ້າງກະສິກຳທັນສະໄໝຢ່າງຮອບດ້ານ, ໃຊ້ທຸກວິທີເພື່ອເຮັດໃຫ້ຜົນຜະລິດທັນຍາຫານຮັກສາຢູ່ໃນລະດັບຫຼາຍກວ່າ525ລ້ານໂຕນ, ຈັງຫວະການເພີ່ມຂຶ້ນດ້ານລາຍຮັບກະສິກຳໃຫ້ຮັກສາຢູ່ໃນລະດັບສູງກວ່າ7,5%.