ຄຽງຄູ່ກັບກອງປະຊຸມສອງສະພາຂອງຈີນໄດ້ໄຂຂຶ້ນ, ລກໄດ້ເລັງສາຍຕາໄປສູ່ຈີນ. ໃນບົດລາຍງານວຽກງານລັດຖະບານຂອງທ່ານເວີນເຈຍປາວ ນາຍົກລັດຖະມົນຕີຈີນ ໄດ້ປັບຄາດໝາຍການເຕີບໂຕເສດຖະກິດໃຫ້ລົງເປັນ 7,5% ເປັນຄັ້ງທຳອິດໃນ 8 ປີມານີ້, ແລະກ່າວເນັ້ນວ່າຈະອອກແຮງເປີດກວ້າງຄວາມຕ້ອງການດ້ານບໍລິໂພກ, ເລັ່ງລັດກໍ່ສ້າງກົນໄກໄລຍະຍາວທີ່ເປີດກວ້າງການບໍລິໂພກ. ນີ້ໄດ້ເຮັດໃຫ້ບຸກຄົນວົງການການເມືອງ ແລະ ການຄ້າຂອງຕ່າງປະເທດສົນໃຈຫຼາຍ,ແລະລົງພິມບົດຄວາມໃນຄໍລຳສຳຄັນຂອງໜັງສືພິມຕ່າງປະເທດຕ່າງໆຢ່າງວ່ອງໄວ.
"ໜັງສືພິມວໍຕຣີດລາຍວັນ"ພິມບົດຄວາມຂຽນວ່າ, ຈີນປັບປຸງຕົວເລກເປົ້າໝາຍການເຕີບໂຕຂອງເສດຖະກິດຂອງປີນີ້ໃຫ້ລົງເປັນ 7,5% ໝາຍຄວາມວ່າຈີນຈະບໍ່ກະຕຸ້ນເສດຖະກິດໂດຍຜ່ານການລົງທຶນທີ່ຖືລັດເປັນການຊີ້ນຳ, ຫາກແມ່ນປ່ຽນແປງຮູບການພັດທະນາເສດຖະກິດ, ເປີດກວ້າງຄວາມຕ້ອງການຂອງພາຍໃນປະເທດ.
ບົດຄວາມຂອງຂ່າວສານບຼູມເບີກຂຽນວ່າ, ຈີນໄດ້ປັບຄາດໝາຍການເຕີບໂຕຂອງGDPຢູ່ໃນລະດັບ 7,5% ນີ້ສະແດງໃຫ້ເຫັນວ່າ ຈີນໄດ້ຈາກການເອົາໃຈໃສ່ນຳຈັງຫວະການເຕີບໂຕຂອງເສດຖະກິດ ປ່ຽນໄປການເອົາໃຈໃສ່ນຳຄຸນນະພາບແຫ່ງການພັດທະນາເສດຖະກິດ ແລະ ການຍົກສູງປະສິດທິພາບ.
"ວາລະສານການຄ້າລາຍສັບປະດາອາເມລິກາ"ໄດ້ລົງພິມບົດວິຈານວ່າ, ຫຼາຍປີມານີ້,ຈັງຫວະເຕີບໂຕເສດຖະກິດຂອງຈີນສູງກວ່າ 8% ໂດຍຕະຫຼອດ, ເທື່ອນີ້ ປະກາດໃຫ້ຈັງຫວະເຕີບໂຕເສດຖະກິດປີ2012 ຢູ່ໃນລະດັບ 7,5%, ພາຍໃຕ້ສະພາບການທີ່ວິກິດການໜີ້ສິນເອີລົບຮ້າຍແຮງຕື່ມອີກ, ການທີ່ຈີນປັບຈັງຫວະເຕີບໂຕເສດຖະກິດໃຫ້ຕ່ຳລົງນັ້ນໄດ້ສະແດງໃຫ້ເຫັນວ່າ ຈີນຈະເອົາໃຈໃສ່ນຳການປ່ຽນແປງຮູບການຂອງການພັດທະນາເສດຖະກິດຫຼາຍກວ່າເກົ່າ, ແລະຍິ່ງເອົາໃຈໃສ່ນຳຄຸນນະພາບ ແລະ ປະສິດທິພາບ.
"ໜັງສືພິມອານຣາມ"ເອຢິບ ແລະຂ່າວສານຕາເວັນອອກກາງເຊິ່ງເປັນສື່ມວນຊົນສຳຄັນຂອງເຂດຕາເວັນອອກກາງລ້ວນແຕ່ເອົາໃຈໃສ່ນຳກອງປະຊຸມສອງສະພາຂອງຈີນ, ແລະຫວັງວ່າ ພາຍໃຕ້ສະພາບການທົ່ວໄປທີ່ສະຖານະການການເມືອງຂອງອາຊີຕາເວັນຕົກແລະອາຟຼິກາເໜືອປັ່ນປ່ວນຢ່າງໜັກໜ່ວງ, ບາງປະເທດປະເຊີນໜ້າກັບສິ່ງທ້າທາຍໃໝ່ດ້ານການປະຕິຮູບ ແລະ ການພັດທະນານັ້ນ, ຖອດຖອນບົດຮຽນຂອງຈີນໃນບັນຫາການພັດທະນາເສດຖະກິດ ແລະ ຮັກສາຊີວິດການເປັນຢູ່ຂອງປະຊາຊົນ, ເພື່ອສະແຫວງຫາວິທີແກ້ໄຂວິກິດການ ແລະ ຜ່ອນຄາຍແຮງກົດດັນຂອງປະເທດຕົນ.
ໃນຫຼາຍມື້ມານີ້, ຂ່າວຕ່າງໆກ່ຽວກັບກອງປະຊຸມສອງສະພາຂອງຈີນໄດ້ລົງພິມໃນຄໍລຳສຳຄັນຂອງໜັງສືພິມຣັດເຊຍຢ່າງຫຼວງຫຼາຍ. ຊ່ອງຂ່າວ24ຂອງໂທລະພາບຣັດເຊຍໄດ້ປ່ຽນຂ່າວໃໝ່ກ່ຽວກັບກອງປະຊຸມສອງສະພາຂອງຈີນເລື້ອຍໆ, ຂ່າວສານຕາສ ແລະ ຂ່າວສານອິນເທີແຟກສ໌ໄດ້ເອົາໃຈໃສ່ນຳບົດລາຍງານວຽກງານລັດຖະບານຂອງທ່ານນາຍົກເວີນເຈຍປາວ, ໂດຍສະເພາະແມ່ນຫົວຂໍ້ຕ່າງໆ ເຊັ່ນ, ການຄາດຄະເນຈັງຫວະການເຕີບໂຕຂອງເສດຖະກິດ, ໄພເງິນເຟີ້ ແລະ ການພັດທະນາຕະຫຼາດເຮືອນຢູ່ແລະທີ່ດິນເປັນຕົ້ນ.
© China Radio International.CRI. All Rights Reserved. 16A Shijingshan Road, Beijing, China. 100040 |