ນັກວິເຄາະອາຊີອາຄະເນກ່າວວ່າການພັດທະນາເສດຖະກິດຈີນຢ່າງໝັ້ນທ່ຽງເປັນການປະກອບສ່ວນຕໍ່ການພັດທະນາແລະຄວາມຈະເລີນຮຸ່ງເຮືອງຂອງພາກພື້ນກໍ່ຄືຂອງໂລກ
(GMT+08:00) 2012-03-12 15:34:10 cri
ແຕ່ການຈັດກອງປະຊຸມຄັ້ງທີ5ຂອງສະພາປະຊາຊົນແຫ່ງຊາດຈີນຊຸດທີ11, ທ່ານເວິ່ນເຈ່ຍປາວ, ນາຍົກລັດຖະມົນຕີຈີນປະກາດບົດລາຍງານວຽກງານລັດຖະບານເປັນຕົ້ນມາ, ນັກວິເຄາະຂອງອາຊີອາຄະເນໄດ້ຕີລາຄາຢ່າງຕັ້ງໜ້າຕໍ່ບົດລາຍງານດັ່ງກ່າວ,ແລະເຫັນວ່າການພັດທະນາເສດຖະກິດຢ່າງໝັ້ນທ່ຽງຂອງຈີນໄດ້ປະກອບສ່ວນຢ່າງຕັ້ງໜ້າຕໍ່ການພັດທະນາແລະຄວາມຈະເລີນຮຸ່ງເຮືອງຂອງພາກພື້ນກໍ່ຄືຂອງໂລກ.
ທ່ານສີຄູນ ບຸນວິໄລ, ຮອງຫົວໜ້າຫ້ອງການຄະນະກຳມະການຮ່ວມມືລາວຈີນ, ເລຂາທິການສະມາຄົມມິດຕະພາບລາວຈີນກ່າວວ່າ, ບົດລາຍງານວຽກງານລັດຖະບານທີ່ປະກາດໂດຍທ່ານເວິ່ນເຈ່ຍປາວ, ໄດ້ສະແດງໃຫ້ເຫັນເຖິງຜົນງານອັນພົ້ນເດັ່ນທີ່ລັດຖະບານຈີນໄດ້ຮັບພາຍໃຕ້ສະພາບການສາກົນທີ່ເຕັມໄປດ້ວຍໂອກາດແລະສິ່ງທ້າທາຍ. ທ່ານກ່າວວ່າ, ເທື່ອນີ້ລັດຖະບານຈີນໄດ້ຫຼຸດເປົ້າໝາຍແຫ່ງການເຕີບໂຕດ້ານເສດຖະກິດລົງເປັນ7,5%, ນີ້ສະແດງໃຫ້ເຫັນວ່າລັດຖະບານຈີນໄດ້ຮັບຮູ້ບັນຫາທີ່ເກີດຂຶ້ນໃນການພັດທະນາເສດຖະກິດຢ່າງວ່ອງໄວ, ແລ້ວຫັນໄປສູ່ການເນັ້ນໜັກທາງດານຄວາມມີສະຖຽນລະພາບແລະຄຸນນະພາບ.
ທ່ານດຣ.ໄຕຕຳກຽວຈາກມະຫາວິທະຍາໄລຮ່າໂນ້ຍຂອງຫວຽດນາມກ່າວວ່າ, ຄຽງຄູ່ກັບຈີນເລັ່ງລັດຫັນປ່ຽນຮູບການພັດທະນາເສດຖະກິດແລະປັບປຸງໂຄງປະກອບເສດຖະກິດ, ການພັດທະນາຂອງເສດຖະກິດຈີນຈະໝັ້ນທ່ຽງກວ່າເກົ່າ. ພາຍໃຕ້ສະພາບການທີ່ຜົນກະທົບຈາກວິກິດການການເງິນສາກົນຍັງບໍ່ທັນຫາຍໄປ, ເສດຖະກິດຈີນພັດທະນາຢ່າງໝັ້ນທ່ຽງກວ່າເກົ່າໄດ້ສ້າງຄວາມໝັ້ນໃຈຕໍ່ການຟື້ນຟູເສດຖະກິດໂລກຄືນໃໝ່ໂດຍໄວ.
ທ່ານອູລຽງມິນໂອ, ອັດຄະລັດຖະທູດມຽນມາປະຈຳຈີນກ່າວວ່າ, ຈີນເປັນປະເທດທີ່ມີກຳລັງວັງຊາຫຼາຍທີ່ສຸດໃນໂລກ, ຈີນໄດ້ກຳນົດເສັ້ນທາງການພັດທະນາທີ່ມີສີສັນພິເສດຂອງຈີນ, ແລະສອດຄ່ອງກັບຄວາມເປັນຈິງຂອງຕົນ.