ຕອນບ່າຍວັນທີ11ມີນານີ້, ກອງປະຊຸມເທື່ອທີ5ຂອງສະພາປະຊາຊົນແຫ່ງຊາດຈີນຊຸດທີ11ໄດ້ຈັດກອງປະຊຸມຄົບຄະນະເທື່ອທີ4ຢູ່ຫໍສະພາປະຊາຊົນແຫ່ງຊາດ, ໂດຍໄດ້ຮັບຟັງແລະພິຈາລະນາບົດລາຍງານວຽກງານຂອງສານປະຊາຊົນສູງສຸດແລະບົດລາຍງານວຽກງານຂອງອົງການໄອຍະການປະຊາຊົນສູງສຸດ.
ທ່ານຫວາງເຊີ້ງຈິ້ນ, ປະທານສານປະຊາຊົນສູງສຸດໄດ້ສະຫຼຸບວຽກງານຂອງປີກາຍແລະແຜນການໃນປີ2012ນີ້, ທ່ານຫວາງເຊີ້ງຈິ້ນກ່າວວ່າ, ໃນປີ2012ນີ້ຈະພະຍາຍາມປະຕິບັດພາລະບົດບາດການໄຕ່ສ່ວນ, ເພື່ອຕອບສະໜອງດ້ານຕຸລາການໃຫ້ມີຄວາມຮັບປະກັນທີ່ເຂັ້ມແຂງກວ່າເກົ່າໃຫ້ແກ່ການພັດທະນາເສດ ຖະກິດສັງຄົມ; ລົງເລິກການປະຕິຮູບດ້ານຕຸລາການ, ພະຍາຍາມເຮັດໃຫ້ຜົນສຳເລັດແຫ່ງການປະຕິຮູບນຳເອົາຜົນປະໂຫຍດຕົວຈິງໃຫ້ແກ່ປະຊາຊົນ; ອອກແຮງເພີ່ມທະວີການພັດທະນາຖັນແຖວບຸກຄະລາກອນ, ຍົກຄຸນສົມບັດລວມຂອງຖັນແຖວພະນັກງານສານສູງສຸດໃຫ້ສູງຂຶ້ນຕື່ມອີກ; ອອກແຮງປັບປຸງກົນໄກການຮັບເອົາການຕິດຕາມກວດຕາ, ຊຸກຍູ້ຄວາມຍຸດຕິທຳດ້ານຕຸລາການ.
ທ່ານຊາວຈ້ຽນໝີງ, ອະທິໄອຍະການຂອງອົງການໄອຍະການປະຊາຊົນສູງສຸດກ່າວວ່າ, ປີ2012ນີ້ ອົງການໄອຍະການຈະເພີ່ມທະວີການສືບສວນແລະປ້ອງກັນການກະທຳຜິດດ້ານຖານະຕຳແໜ່ງ; ເພີ່ມທະວີແລະປັບປຸງການຕິດຕາມກວດກາຕໍ່ການຟ້ອງຮ້ອງຕື່ມອີກ; ເພີ່ມທະວີການພັດທະນາຖັນແຖວພະນັກງານ ອົງການໄອຍະການແລະການພັດທະນາພື້ນຖານຂັ້ນຮາກຖານຢ່າງຮອບດ້ານ; ຮັບເອົາການຕິດຕາມກວດກາຈາກສະພາປະຊາຊົນ, ການຕິດຕາມກວດກາປະຊາ ທິປະໄຕແລະການຕິດຕາມກວດກາຈາກສັງຄົມດ້ວຍຄວາມຕັ້ງໜ້າຫຼາຍກວ່າເກົ່າ.