ທ່ານເວີ່ນເຈຍປາວກ່າວວ່າ: ຕ້ອງເຮັດໃຫ້ການບັນລຸຮັ່ງມີຂຶ້ນຮ່ວມກັນຢູ່ບົນພື້ນຖານຂອງລະບອບ
(GMT+08:00) 2012-03-14 18:31:02 cri
ຕາມຂ່າວCRI: ໃນກອງປະຊຸມຖະແຫຼງຂ່າວຂອງກອງປະຊຸມຄັ້ງທີ5ຂອງຄະນະກຳມະການສະພາຜູ້ແທນປະຊາຊົນແຫ່ງຊາດຈີນຊຸດທີ11ທີ່ຈັດຂຶ້ນໃນວັນທີ14ມີນານີ້ຢູ່ນະຄອນຫຼວງປັກກິ່ງ, ທ່ານເວີ່ນເຈຍປາວ, ນາຍົກລັດຖະມົນ ຕີຈີນກ່າວໃນເວລາຕອບຄຳຖາມຂອງນັກຂ່າວກ່ຽວກັບການຜ່ອນຄາຍຄວາມຜິດໂຕນກັນດ້ານການແບ່ງປັນລາຍຮັບຕໍ່ນັກຂ່າວວ່າ, ຕ້ອງເອົາໃຈໃສ່ການປະຕິຮູບດ້ານການເງິນແລະລະບອບການແບ່ງປັນລາຍຮັບ, ເຮັດໃຫ້ການບັນລຸຄວາມຮັ່ງມີຂຶ້ນຮ່ວມກັນບົນພື້ນຖານຂອງລະບອບ.
ທ່ານເວີ່ນເຈຍປາວກ່າວວ່າ, "ກ່ຽວກັບບັນຫາການຜ່ອນຄາຍຄວາມຜິດໂຕນກັນດ້ານການແບ່ງປັນລາຍຮັບ, ຂ້າພະເຈົ້າຢາກລົງມືໃນ4ດ້ານຄື້: ຍົກສູງລາຍຮັບຂອງປະຊາຊົນໃນຕົວເມືອງແລະຊົນນະບົດ, ຍົກສູງລະດັບເງິນເດືອນຕ່ຳສຸດ, ເຮັດໃຫ້ລາຍຮັບຂອງປະຊາຊົນໃນຕົວເມືອງແລະຊົນນະບົດ ສອດຄ່ອງກັບການເຕີບໂຕດ້ານເສດຖະກິດແລະການເພີ່ມຂຶ້ນດ້ານອັດຕາການຜະລິດການອອກແຮງງານ; ປັບປຸງການແບ່ງປັນດ້ານລາຍຮັບ. ຕ້ອງກຳນົດລາຍຮັບຂອງຜູ້ທີ່ມີລາຍຮັບສູງ, ໂດຍສະເພາະແມ່ນລາຍຮັບຂອງຜູ້ບໍລິຫານຂັ້ນສູງຂອງລັດວິສາຫະກິດແລະວິສາຫະກິດທະນາຄານຂອງລັດ, ຕ້ອງເພີ່ມທະວີອັດຕາສ່ວນຂອງລາຍຮັບລະດັບກາງ; ສ້າງຕັ້ງລະບົບ ປະກັນສັງຄົມທີ່ຄົບຖ້ວນ;ປົກປ້ອງລາຍຮັບທີ່ຊອບຕາມກົດໝາຍແລະຍົກເລີກລາຍຮັບທີ່ບໍ່ຊອບຕາມກົດໝາຍ."
ທ່ານເວີ່ນເຈຍປາວກ່າວວ່າ, "ຂ້າພະເຈົ້າເຫັນວ່າໃນການແບ່ງປັນລາຍຮັບ, ໂດຍສະເພາະແມ່ນຕ້ອງກໍາແໜ້ນ3ດ້ານ, ຄື: ກ່ອນອື່ນໝົດ, ຕ້ອງສ້າງເງື່ອນໄຂຄວາມສະເໝີພາບດ້ານການສຶກສາຮ່ຳຮຽນ, ການປະກອບອາຊີບແລະການປະກອບທຸລະກິດແກ່ໝົດທຸກຄົນ, ເຮັດໃຫ້ເຂົາເຈົ້າເລີ່ມຈາກລະດັບດຽວກັນ. ຖັດຈາກນັ້ນ, ຕ້ອງເອົາໃຈໃສ່ຊີວິດການເປັນຢູ່ຂອງກຸມຄົນດ້ອຍໂອກາດ. ຖ້າວ່າສະພາບຊີວິດການເປັນຢູ່ຂອງກຸ່ມຄົນດ້ອຍໂອກາດຂອງປະເທດໜຶ່ງສາມາດໄດ້ຮັບການປັບປຸງໃຫ້ດີຂຶ້ນ, ຊີວິດການເປັນຢູ່ຂອງປະຊາຊົນທັງໝົດພາຍໃນປະເທດນັ້ນກໍ່ຈະໄດ້ຮັບການປັບປຸງໃຫ້ດີຂຶ້ນ. ສຸດທ້າຍ, ຕ້ອງເອົາໃຈໃສ່ການປະຕິຮູບດ້ານການເງິນແລະລະບອບການແບ່ງປັນລາຍຮັບ, ເຮັດໃຫ້ການບັນລຸຄວາມຮັ່ງມີຂຶ້ນບົນພື້ນຖານຂອງລະບອບ."