ສະ​ຖາ​ບັນ​ຂົງຈື້​ຈັດງານ​ບາສີ​ສູ່ຂວັນ​​ເພື່ອສົ່ງ​ຜູ້​ອໍານວຍ​ການ​ສະ​ຖາ​ບັນ​ຂົງຈື້ຝ່າຍ​ຈີນ

(GMT+08:00) 2012-04-10 10:41:09     cri


ຕາມຂ່າວ CRI: ​ວັນ​ທີ 9 ​ເມສາ ​2012 ນີ້ທີ່​ມະຫາວິທະຍາ​ໄລ​ແຫ່ງ​ຊາດລາວ ໄດ້​ມີ​ງານ​ບາສີ​ສູ່​ຂວັນ​ໃຫ້​ແກ່ທ່ານ ສຈ ​ຖາວຫົງ ຜູ້​ອໍານວຍ​ການ​ສະ​ຖາ​ບັນ​ຂົງຈື້ຝ່າຍ​ຈີນ ທີ່​ຈະ​ໝົດ​ວາລະ​ໃນ​ໄວໆ​ນີ້​ແລະ​ຈະ​ເດີນທາງ​ກັບ​ຄືນ​ ສປ ​ຈີນ​. ​ໂດຍ​ການ​ໃຫ້​ກຽດ​ເຂົ້າ​ຮ່​ວມມີ: ​ທ່ານ ຮສ ລໍາ​ໄມ ພິພັກຂະ​ວົງ ຮອງ​ອະທິການ​ບໍດີມະຫາວິທະຍາ​ໄລ​ແຫ່ງ​ຊາດ, ທ່ານ ສຈ ດຣ ສົມ​ສີ ຍໍ​ວັນ​ໄຊ ຮອງ​ອະທິການ​ບໍດີ​ມະຫາວິທະຍາ​ໄລ​ແຫ່ງ​ຊາດ, ທ່າ​ນ ຄໍາ​ຮຸ່ງ ​ແສນ​ມະນີ ຜູ້​ອໍານວຍ​ການ​ສະ​ຖາ​ບັນ​ຂົງຈື້ຝ່າຍ​ລາວ, ມີ​ຄູ​ອາຈານ​ຈາກ​ສະ​ຖາ​ບັນ​ຂົງຈື້​​ແລະ​ມະຫາວິທະຍາ​ໄລ​ແຫ່ງ​ຊາດ, ພ້ອມ​ດ້ວຍ​ນັກຮຽນນັກ​ສຶກສາ​ເຂົ້າ​ຮ່ວມ.

ທ່ານ ສຈ ​ຖາວຫົງ ​​ແມ່ນ​ຜູ້​ອໍາ​ນວຍ​ການ​ສະ​ຖາ​ບັນ​ຂົງຈື້ຜູ້​ທໍາ​ອິດ​ທີ່​ໄດ້​ນໍາພາ​ການ​ສ້າງ​ຕັ້ງ​ສະ​ຖາ​ບັນ​ຂົງ​ຈື້​ຢູ່​ທີ່​ມະ​ຫາ​ວິ​ທະ​ຍາ​ໄລ​ແຫ່ງ​ຊາດ​ລາວ​ຕັ້ງ​ແຕ່​ປີ 2010 ​ເປັນ​ຕົ້ນ​ມາ, ​ເປັນ​ຜູ້​ນໍາ​ພາ​ແລະ​​ໃກ້​ຊິດ​ຕິດ​​ແທດ​​ໃນ​ການ​ສິດ​ສອນ​ພາ​ສາ​ຈີນ​ໃຫ້​ກັບ​ນັກຮຽນ-ນັກ​ສຶກສາລາ​ວ​ແລະ​ເປັນ​ຜູ້​ນໍາພາ​ໃນ​ການ​ສ້າງ​ຕັ້ງ​ສູນ​ສອບ​ເສັງ​ລະດັບ​ມາດ​ຕະ​ຖານ​ພາສາ​ຈີນ, ​ເຊິ່ງ​ເປັນ​ສູນ​ສອບ​ເສັງ​ພາສາ​ຈີນ​ແຫ່ງ​ທໍາ​ອິດ​ໃນ​ປະ​ເທດ​ລາວ, ຕະ​ຫຼອດ​ໄລຍະ 2 ປີ ທີ່​ຜ່ານ​ມາ​, ທ່ານນາງ ສຈ ຖາວ​ຫົງ ​ໄດ້​ມີ​ຜົນ​ງານ​ຫຼາຍ​ດ້ານ​ໂດຍ​ສະ​ເພາະ​​ໄດ້​ປະ​ກອບ​ສ່ວນ​ເຂົ້າ​ໃນ​ສາຍ​ພົວ​ພັນ​ມິດ​ຕະ​ພາບ​ລະ​ຫວ່າງ​ສອງ​ຊາດ​ລາວ-ຈີນ, ​ຍ້ອນ​ຜົນ​ງານ​ດັ່ງ​ກ່າວ​ທ່ານ​ຈື່ງ​ໄດ້​ຮັບ​ຫຼຽນ​ກາ​ມິດ​ຕະ​ພາບ​ທີ່​ທາງ​ພັກ​-ລັດຖະບານ​ລາວ​ມອບ​ໃຫ້, ​ມາ​ຮອດ​ປີ 2012 ນີ້ ຖື​ວ່າ​ທ່ານ ສຈ ​ນາງ ເຖົາ​ຫົງ ​ໄດ້​ໝົດ​ວາລະ​ການ​ປະຕິບັດ​ໜ້າ​ທີ່​ວຽກ​ງານ​ຢູ່​ລາວ​ແລະ​ຈະ​ເດີນທາງ​ກັບ​ເມືອ ສປ ຈີນ ​ໃນ​ໄວໆ​ນີ້.