ກອງປະຊຸມອາຊີຕາເວັນອອກຂອງເວທີປຶກສາຫາລືເສດຖະກິດໂລກເອົາໃຈໃສ່ບັນຫາການເຊື່ອມຈອດກັນຂອງອາຊີ
(GMT+08:00) 2012-06-01 17:05:33 cri
ຫົວຂໍ້ຂອງກອງປະຊຸມຄັ້ງນີ້ແມ່ນ "ການເຊື່ອມຈອດກັນສ້າງອະນາຄົດຂອງພາກພື້ນ",ຊຶ່ງມີຈຸດປະສົງເພື່ອປຶກສາຫາລືກ່ຽວກັບການທີ່ຈະເຮັດແນວໃດຊຸກຍູ້ໃຫ້ມີການຕິດຕໍ່ພົວພັນກັນ ລະຫວ່າງປະເທດອາຊີຕາເວັນອອກແລະລະຫວ່າງອາຊີຕາເວັນອອກກັບທົ່ວໂລກ,ສ້າງອະນາຄົດທີ່ກວ້າງຂວາງກວ່າເກົ່າໃຫ້ແກ່ການພັດທະນາເສດຖະກິດ,ສັງຄົມຂອງອາຊີຕາເວັນອອກ.ໃນພິທີໄຂ,ທ່ານຄລາວສ໌ ສະວັບ,ປະທານພິທີໄຂ,ຜູ່ລິເລີ່ມທັງເປັນປະທານຂອງເວທີປຶກ ສາຫາລືເສດຖະກິດໂລກກ່າວວ່າ:"ພວກເຮົາພວມຢູ່ໃນເວລາອັນພິເສດ ຄື:ເສດຖະກິດໂລກພວມຊຸດໂຊມລົງ, ພວກເຮົາມີຄວາມເປັນຫ່ວງເປັນໃຍຫຼາຍຕໍ່ອະນາຄົດ.ແຕ່ເມື່ອສຸມຄວາມສົນໃຈໃສ່ພາກພື້ນອາຊຽນ, ຈະເຫັນໄດ້ວ່າ ບ່ອນນີ້ເຕັມໄປດ້ວຍພະລັງແຮງ,ອັດຕາເຕີບໂຕຂອງເສດຖະກິດຫຼາຍກວ່າ5%."
ນີ້ແມ່ນເທື່ອທຳອິດທີ່ກອງປະຊຸມອາຊີຕາເວັນອອກຂອງເວທີປຶກສາຫາລືເສດຖະກິດໂລກເລືອກໄທເປັນສະຖານທີ່ຈັດກອງປະຊຸມ.ທ່ານນາງຍິ່ງລັກ ຊິນນະວັດ,ນາຍົກລັດຖະມົນຕີໄທໄດ້ເຂົ້າຮ່ວມພິທີໄຂກອງປະຊຸມແລະກ່າວຄຳປາໄສວ່າ,ປະຈຸບັນນີ້,ເສດຖະກິດໂລກພວມປະເຊີນກັບໂອກາດການພັດທະນາແລະສິ່ງທ້າທາຍພ້ອມກັນ,ການສືບຕໍ່ຊຸກຍູ້ຂະບວນການເຊື່ອມໂຍງເຂົ້າກັນຂອງພາກພື້ນແມ່ນຊ່ອງທາງທີ່ບັງເກີດຜົນທີ່ສາມາດຮັບມືກັບວິກິດການແລະການສ້າງໂອກາດ.
ທ່ານທອງສິງ ທຳມະວົງ,ນາຍົກລັດຖະມົນຕີລາວ,ທ່ານຫງວຽນຕັນຢຸງ,ນາຍົກລັດຖະມົນ ຕີຫວຽດນາມ,ທ່ານຊູຊີໂລ ບຳບັງ ຢຸດໂຮໂຢໂນ,ປະທານາທິບໍດີອິນໂດເນເຊຍກໍ່ໄດ້ກ່າວຄຳປາໄສໃນພິທີໄຂ.ທ່ານປັສ ການ ລາມີ,ຜູ່ອຳນວຍການໃຫຍ່ອົງການການຄ້າໂລກທີ່ມາເຂົ້າຮ່ວມກອງປະຊຸມຄັ້ງນີ້ໄດ້ສະແດງຄວາມເຫັນດີເຫັນພ້ອມຕໍ່ບັນດາປະເທດອາຊຽນທີ່ທຳຄວາມພະຍາຍາມເພື່ອຊຸກຍູ້ການເຊື່ອມຈອດກັນລະຫວ່າງປະເທດແລະລະຫວ່າງພາກພື້ນ,ໃນກອງປະຊຸມຂ່າວທີ່ຈັດຂຶ້ນພາຍຫຼັງພິທີໄຂກອງປະຊຸມສິ້ນສຸດລົງແລ້ວ,ທ່ານລາມີກ່າວວ່າ: "ນາຍົກລັດຖະມົນຕີຂອງໄທ,ປະທານາທິບໍດີອິນໂດເນເຊຍ,ນາຍົກລັດຖະມົນຕີຫວຽດນາມແລະນາຍົກລັດຖະມົນຕີລາວຫາກໍກ່າວລາຍງານກ່ຽວກັບວ່າຈະກໍ່ສ້າງພື້ນຖານໂຄງລ່າງຂອງປະເທດຕົນ,ເຮັດແນວໃດເພື່ອຊຸກຍູ້ການເຊື່ອມຈອດກັນໃນພາກພື້ນ,ຂ້າພະເຈົ້າເຫັນວ່າ, ວຽກງານນີ້ພວມດຳເນີນໄປຕາມທິດທີ່ຖືກຕ້ອງ."
