ການປະຕິຮູບຮອບທີ2ຂອງມຽນມາຈະຖືການພັດທະນາເສດຖະກິດເປັນສຳຄັນ
(GMT+08:00) 2012-06-28 16:03:36 cri
ໃນອາທິດແລ້ວນີ້, ທ່ານເທັນເຊັນ, ປະທານາທິບໍດີມຽນມາໄດ້ກ່າວຄຳປາໄສກ່ຽວກັບແຜນການ5ປີແຫ່ງການພັດທະນາເສດຖະກິດສັງຄົມແຫ່ງຊາດໂດຍກ່າວວ່າ, ລັດຖະບານໄດ້ກຳນົດອັດຕາເຕີບໂຕດ້ານເສດຖະກິດສະເລ່ຍຕໍ່ປີໃນສົກງົບປະມານ5ປີຕໍ່ໜ້າເຊິ່ງເລີ່ມຈາກສົກປີການເງິນ2011ຫາ2012ນັ້ນເປັນ7,7%, ມຽນມາຈະເລີ່ມປະຕິບັດການປະຕິຮູບຮອບທີ2, ສ່ວນການພັດທະນາເສດຖະກິດສັງຄົມແຫ່ງຊາດຈະເປັນໃຈກາງຂອງການປະຕິຮູບຮອບທີ2. ທ່ານເທັນເຊັນກ່າວວ່າ, ການຄ້າແລະການລົງທຶນແມ່ນກຳລັງແຮງອັນສຳຄັນໃນການພັດທະນາເສດຖະກິດແຫ່ງຊາດ. ໃນດ້ານການລົງທຶນ, ບໍ່ພຽງແຕ່ຕ້ອງການການລົງທຶນຈາກລັດຖະບານແລະທຶນເອກະຊົນພາຍໃນປະເທດເທົ່ານັ້ນ, ຍັງຕ້ອງການການຊ່ວຍເຫຼືອດ້ານເງິນທຶນແລະເຕັກໂນໂລຊີຈາກຕ່າງປະເທດຫຼາຍກວ່າເກົ່າ.
ພ້ອມກັນນັ້ນ, ກອງປະຊຸມສຸດຍອດການລົງທຶນມຽນມາໃໝ່ປີ2012ໄດ້ຈັດຂຶ້ນຢູ່ຢາງກຸງ, ມີຜູ້ແທນ300ກວ່າຄົນທີ່ມາຈາກວົງການການເມືອງແລະການຄ້າຂອງ20ກວ່າປະເທດໄດ້ເຂົ້າຮ່ວມກອງປະຊຸມ. ທິດຂະຫຍາຍຕົວດ້ານການລົງທຶນໃນການພັດທະນາເສດຖະກິດໃນອະນາຄົດຂອງມຽນມາ, ໄດ້ດຶງດູດຄວາມສົນໃຈຢ່າງກວ້າງຂວາງຈາກຜູ້ເຂົ້າຮ່ວມກອງປະຊຸມ. ບໍລິສັດໂຄຄາໂຄລາຂອງອາເມລິກາກ່າວວ່າ, ເມື່ອລັດຖະບານອາເມລິກາອະນຸມັດແລ້ວ, ບໍລິສັດໂຄຄາໂຄລາກໍ່ຈະເລີ່ມຈຳໜ່າຍໂດຍກົງເປັນຄັ້ງທຳອິດຢູ່ມຽນມາໃນເກືອບ60ປີມານີ້. ທ່ານຈອນໄຣສ, ຮອງຜູ້ວ່າການບໍລິສັດGEຂອງອາເມລິກາກ່າວວ່າ, ບໍລິສັດGEພວມເຈລະຈາກັບລັດຖະບານມຽນມາກ່ຽວກັບການຮ່ວມມືໃນດ້ານພື້ນຖານໂຄງລ່າງ.