ຈີນຄອງຄອຍໃຫ້ລາວເຂົ້າເປັນສະມາຊິກຂອງອົງການການຄ້າໂລກ--ສຳພາດທ່ານນາງປູ້ຈ້ຽນກົວ,ເອກອັກຄະລັດຖະທູດຈີນປະຈຳລາວ
(GMT+08:00) 2012-08-07 15:29:04 cri
ນາງມໍ້ສຽວລີງ,ນັກຂ່າວCRIສຳພາດທ່ານນາງປູຈ້ຽນກົວ
ປະຈຸບັນນີ້,ການເຈລະຈາສອງຝ່າຍລະຫວ່າງສປປລາວກັບສະມາຊິກWTOທີ່ກ່ຽວ ຂ້ອງໄດ້ສຳເລັດໝົດແລ້ວ,ການເຈລະຈາຫຼາຍຝ່າຍພວມດຳເນີນໄປເປັນຢ່າງດີ.ການເຈລະຈາກ່ຽວກັບການເຂົ້າເປັນສະມາຊິກອົງການການຄ້າໂລກຂອງລາວໄດ້ເຂົ້າສູ່ໄລຍະສຸດທ້າຍ.ຫວ່າງມໍ່ໆມານີ້,ລັດຖະບານລາວໄດ້ອະນຸມັດບົດລາຍງານວຽກງານການກະກຽມໃຫ້ແກ່ການເຂົ້າເປັນສະມາຊິກWTO.ລາວມີຄວາມຫວັງທີ່ຈະໄດ້ເຂົ້າເປັນສະມາຊິກທາງການທີ157ຂອງWTOກ່ອນການໄຂກອງປະຊຸມສຸດຍອດອາເຊັມຄັ້ງທີ9ຢູ່ນະຄອນຫຼວງວຽງຈັນໃນເດືອນພະຈິກປີນີ້.
ທ່ານນາງປູ້ຈ້ຽນກົວຊີ້ອອກວ່າ: "ລາວເຂົ້າເປັນສະມາຊິກອົງການການຄ້າໂລກຈະມີຜົນດີຕໍ່ການເຂົ້າຮ່ວມເສດຖະກິດໂລກາພິວັດຢ່າງກວ້າງຂວາງແລະເລິກເຊິ່ງກວ່າເກົ່າ,ດຶງດູດການລົງທຶນຈາກຕ່າງປະເທດ,ຊຸກຍູ້ການຄ້າກັບຕ່າງປະເທດ,ມີຜົນດີຕໍ່ສປປລາວໃນການຊຸກຍູ້ພາລະກິດການໄຂປະຕູສູ່ພາຍນອກແລະປ່ຽນແປງໃໝ່,ເຮັດໃຫ້ຈັງຫວະການພັດທະນາຂອງເສດຖະກິດແລະສັງ ຄົມລາວເລັ່ງໄວຂຶ້ນ,ຊຶ່ງຈະບັນລຸເປົ້າໝາຍການພັດທະນາຂອງລັດຖະບານລາວຢ່າງສຳເລັດຜົນ.ນອກນີ້, ລາວເຂົ້າເປັນສະມາຊິກຂອງWTOຈະສ້າງຄວາມມີຊີວິດຊີວາອັນໃໝ່ເຂົ້າໃນເສດຖະກິດຂອງພາກພື້ນ ກໍຄືຂອງໂລກ,ເປັນການປະກອບສ່ວນອັນຕັ້ງໜ້າເຂົ້າໃນການເຊື່ອມໂຍງເຂົ້າກັນຂອງເສດຖະກິດອາຊຽນ."
ລາວຮ້ອງຂໍເຂົ້າເປັນສະມາຊິກອົງການການຄ້າໂລກເມື່ອປີ1997.ຕະຫຼອດ15ປີຜ່ານມາ,ລາວໄດ້ດຳເນີນການເຈລະຈາຫຼາຍຄັ້ງແລະທຸກຍາກກັບບັນດາສະມາຊິກທີ່ກ່ຽວຂ້ອງຂອງອົງການນີ້ກ່ຽວກັບບັນຫາຕ່າງໆ ເຊັ່ນ:ພາສີແລະເງື່ອນໄຂໃນການອະນຸມັດໃຫ້ເຂົ້າສູ່ຕະຫຼາດ,ໄດ້ຕອບສະໜອງຄວາມຮຽກຮ້ອງຕ້ອງການເກືອບພັນລາຍຂອງຝ່າຍຕ່າງໆເກືອບພັນລາຍການ.ລາວຍັງໄດ້ດັດແກ້ກົດໝາຍການຄ້າຂອງລາວ,ເພື່ອສອດຄ່ອງກັບຫຼັກການແລະຄວາມຮຽກຮ້ອງຕ້ອງການຂອງWTO.
ທ່ານນາງປູຈ້ຽນກົວກ່າວຕື່ມວ່າ:"ໃນຖານະເປັນປະເທດບ້ານໃກ້ເຮືອນຄຽງທີ່ດີ,ເພື່ອນມິດທີ່ດີ,ສະຫາຍທີ່ດີແລະຄູ່ຮ່ວມມືທີ່ດີ,ແຕ່ໃດມາ,ຈີນໄດ້ສະໜັບສະໜູນຄວາມພະຍາຍາມຂອງລັດຖະບານແລະປະຊາຊົນລາວເພື່ອບັນລຸການພັດທະນາເສດຖະກິດແລະສັງຄົມແຫ່ງຊາດມາໂດຍຕະຫຼອດ,ສະໜັບສະໜູນສປປລາວໃນການຍົກສູງຖານະບົດບາດຂອງຕົນໃນເວທີສາກົນ,ແລະໄດ້ເສີມຂະຫຍາຍບົດບາດຊຸກຍູ້ໃນຂະບວນ ການທີ່ລາວຮ້ອງຂໍເຂົ້າເປັນສະມາຊິກອົງການການຄ້າໂລກ."
ທ່ານເອກອັກຄະລັດຖະທູດປູ້ຈ້ຽນກົວກ່າວຕື່ມວ່າ:ດ້ານໜຶ່ງ,ຈີນໄດ້ຕັ້ງໜ້າເສີມຂະຫຍາຍບົດບາດຂອງຕົນໃນດ້ານຫຼາຍຝ່າຍ,ເລັ່ງລັດຂະບວນການທີ່ລາວເຂົ້າເປັນສະມາຊິກອົງການການຄ້າໂລກ.ອີງຕາມຫຼັກການສັນຍາສອງຝ່າຍກ່ຽວກັບການເຂົ້າເປັນສະມາຊິກອົງການການຄ້າໂລກທີ່ຈີນເຊັນກັບປະເທດທີ່ດ້ອຍພັດທະນາທີ່ສຸດ,ຈີນໄດ້ເຮັດໃຫ້ຂັ້ນຕອນການເຈລະຈາກັບລາວກ່ຽວກັບການອະນຸມັດເຂົ້າຕະຫຼາດໃຫ້ກະທັດຮັດຂຶ້ນຢ່າງຫຼວງຫຼາຍ.ຈີນກາຍເປັນໜຶ່ງໃນບັນດາປະເທດທີ່ເຊັນສັນຍາສອງຝ່າຍກັບລາວໄວກ່ອນໝູ່.ໃນກອງປະຊຸມວຽກງານເຂົ້າເປັນສະມາຊິກອົງການການຄ້າໂລກທຸກຄັ້ງທີ່ຜ່ານມາ,ຈີນກ່າວເນັ້ນວ່າປະເທດສະມາຊິກຄວນປະຕິບັດຕາມຫຼັກການກ່ຽວກັບປະເທດທີ່ດ້ອຍພັດທະນາທີ່ສຸດເຂົ້າເປັນສະມາຊິກອົງການການຄ້າໂລກ2002,ຮຽກຮ້ອງໃຫ້ເອີຣົບແລະອາເມລິກາພິຈາລະນາເຖິງສະພາບຕົວຈິງໃນດ້ານການພັດທະນາທາງເສດຖະກິດແລະສັງຄົມຂອງລາວ,ຫຼຸດຄວາມຮຽກຮ້ອງທີ່ກ່ຽວຂ້ອງຕໍ່ລາວໃຫ້ໜ້ອຍ.ຈີນຍັງໄດ້ຕັ້ງໜ້າຊຸກຍູ້ໃຫ້ປະເທດສະມາຊິກອື່ນໆສຳເລັດການເຈລະຈາກັບລາວໂດຍໄວເທົ່າທີ່ຈະໄວໄດ້.
ນັບແຕ່ການເຈລະຈາເຂົ້າສູ່ໄລຍະສຳຄັນໃນປີ2009ມານີ້,ທ່ານທູດຈ່າງຊ້ຽງເສິນ ແລະທ່ານເອກອັກຄະລັດຖະທູດອີ້ສຽວຈຸນຂອງຄະນະຜູ່ແທນຖາວອນຂອງຈີນປະຈຳອົງການການຄ້າໂລກໄດ້ດຳລົງຕຳແໜ່ງເປັນປະທານຂອງໜ່ວຍງານກ່ຽວກັບການເຂົ້າຮ່ວມອົງການການຄ້າໂລກຕາມລຳດັບ.ພາຍໃຕ້ການຊຸກຍູ້ຂອງປະທານຝ່າຍຈີນ,ຂະບວນການເຂົ້າເປັນສະມາຊິກອົງການການຄ້າໂລກຂອງລາວໄດ້ເລັ່ງລັດໄວຂຶ້ນຢ່າງຈະແຈ້ງ.ປີ2011,ການເຈລະຈາສອງຝ່າຍລະຫວ່າງລາວກັບບາງປະເທດໄດ້ປະສົບອຸປະສັກ,ທ່ານທູດອີ້ສຽວຈຸນໃນຖານະເປັນປະທານໜ່ວຍງານກ່ຽວກັບການເຂົ້າຮ່ວມອົງການການຄ້າໂລກໄດ້ປະກອບສ້າງຕັ້ງໜ່ວຍງານປະສານງານຂອງປະທານ3ຝ່າຍເພື່ອໄກ່ເກ່ຍຢ່າງຕັ້ງໜ້າ,ແກ້ໄຂຄວາມຫຍຸ້ງຍາກ,ຊຸກຍູ້ໃຫ້ການເຈລະຈາສຳເລັດຜົນໃນທີ່ສຸດ.ອົງການWTOຍ້ອງຍໍໃນລະດັບສູງຕໍ່ປະທານຝ່າຍຈີນທີ່ເສີມຂະຫຍາຍບົດບາດອັນສຳຄັນ,ແລະຖືລາວເປັນແບບຢ່າງຂອງຂະບວນການປະທານນຳພາເຂົ້າເປັນສະມາຊິກWTO,ແລະຕັ້ງໜ້າແນະນຳບົດຮຽນນີ້ໃຫ້ປະເທດສະມາຊິກອື່ນໆ.
ອີກດ້ານໜຶ່ງ,ອີງຕາມຄວາມຮຽກຮ້ອງຕ້ອງການຂອງລາວຈີນໄດ້ໃຫ້ການຊ່ວຍເຫຼືອແກ່ລາວເພື່ອເສີມສ້າງຄວາມສາມາດ.ເລີ່ມແຕ່ປີ2004ເປັນຕົ້ນມາ,ຈີນໄດ້ຈັດຊຸດຝຶກອົບຮົມໃຫ້ລາວກ່ຽວກັບການເຂົ້າເປັນສະມາຊິກWTOແລະການຄ້າສອງຝ່າຍ,ເຊື້ອເຊີນເຈົ້າໜ້າທີ່ທີ່ກ່ຽວຂ້ອງຂອງລາວໄປຄົ້ນຄວ້າຮ່ຳຮຽນຢູ່ຈີນ.ຈີນຍັງໄດ້ຈັດວາງໃຫ້ເຈົ້າໜ້າທີ່ພາກສ່ວນເສດຖະກິດການຄ້າຂອງສອງປະເທດແລກປ່ຽນບົດຮຽນໃນການເຂົ້າເປັນສະມາຊິກWTO.ປີ2012,ທ່ານທູດອີ້ສຽວຈຸນໄດ້ໄປຢ້ຽມຢາມລາວເພື່ອແລກປ່ຽນບົດຮຽນກັບພາກສ່ວນຕ່າງໆທີ່ກ່ຽວຂ້ອງຂອງລາວເຊັ່ນກະຊວງອຸດສາຫະກຳການຄ້າແລະກະຊວງການເງິນເພື່ອແນະນຳບົດຮຽນຂອງຈີນໃນດ້ານການເຂົ້າເປັນສະມາຊິກWTOແລະບົດຮຽນດ້ານການພັດທະນາເສດຖະກິດ.ທ່ານທອງສິງທຳມະວົງ,ນາຍົກລັດຖະມົນຕີລາວໄດ້ຕ້ອນຮັບທ່ານທູດອີ້ສຽວຈຸນ,ທ່ານນາຍົກທອງສິງທຳມະວົງກ່າວຂອບໃຈນຳລັດຖະບານຈີນທີ່ໃຫ້ການສະໜັບສະໜູນແລະການຊ່ວຍເຫຼືອ,ຫວັງວ່າຈີນຈະສືບຕໍ່ເສີມຂະຫຍາຍບົດບາດຂອງຕົນ,ຊ່ວຍຊຸກຍູ້ໃຫ້ລາວເຂົ້າເປັນສະມາຊິກອົງການການຄ້າໂລກໂດຍໄວ.
ທ່ານນາງປູ້ຈ້ຽນໂກວກ່າວຢ້ຳວ່າ:"ໃນໄລຍະສຸດທ້າຍທີ່ລາວຮ້ອງຂໍເຂົ້າເປັນສະມາຊິກອົງການການຄ້າໂລກ,ຈີນຈະໃຫ້ການສະໜັບສະໜູນແລະການຊ່ວຍເຫຼືອແກ່ປະເທດລາວຄືທີ່ປະຕິບັດຜ່ານມາ.ຈີນຄອງຄອຍວ່າລາວຈະສຳເລັດການເຂົ້າເປັນສະມາຊິກWTOຢ່າງເປັນທາງການກ່ອນກອງປະຊຸມສຸດຍອດອາຊີເອີຣົບຫຼືອາເຊັມຄັ້ງທີ9ໄຂຂຶ້ນ,ຈີນຍິນດີຮ່ວມກັບລາວຢູ່ພາຍໃຕ້ກົນໄກການຄ້າຫຼາຍຝ່າຍຂອງWTO,ສະໜັບສະໜູນເຊິ່ງກັນແລະກັນ,ຮ່ວມມືກັນກ້າວໄປໜ້າ,ຕັ້ງໜ້າດຳເນີນການຮ່ວມມືຕົວຈິງຢ່າງມີໄມຕີຈິດມິດຕະພາບແລະຕ່າງຝ່າຍຕ່າງໄດ້ຮັບຜົນປະໂຫຍດ,ປະກອບສ່ວນເຂົ້າໃນການພັດທະນາເສດຖະກິດແລະຄວາມຈະເລີນຮຸ່ງເຮືອງຂອງປະເທດຕົນ,ພາກພື້ນແຫ່ງນີ້ກໍ່ຄືຂອງໂລກ."
