ຜົນການແຂ່ງຂັນກິລາປະເພດຕ່າງໆໃນໂອລິມປິກລອນດອນໃນວັນທີ 11 ສິງຫາ
ຕາມຂ່າວCRI: ວັນທີ 11 ສິງຫານີ້ຕາມເວລາທ້ອງຖິ່ນ, ຍັງອີກ 2 ມື້ງານກິລາໂອລິມປິກລອນດອນກໍຈະສິ້ນສຸດການແຂ່ງຂັນແລ້ວ, ໃນມື້ນີ້ມີການຊິງໄຊທັງໝົດ 32 ຫຼຽນຄຳ, ເປັນມື້ທີ່ຊິງໄດ້ຫຼຽນຄຳຫຼາຍທີ່ສຸດຂອງງານກິລາໂອລິມປິກ.
ໃນການແຂ່ງຂັນກິລາມວຍສາກົນເພດຊາຍລຸ້ນ 49 ກິໂລຮອບຊິງຊະນະເລີດ, ທ້າວໂຈ່ວຊື້ມິງ, ນັກກິລາທີ່ມີຊື່ສຽງຂອງຈີນສາມາດປ້ອງກັນຫຼຽນຄຳໄວ້ໄດ້.
ໃນການແຂ່ງຂັນໂດດນ້ຳຈາກແທ່ນ 10 ແມັດເພດຊາຍດ່ຽວ, ທ້າວໂບເດຍ ເດສ໌ວິດ, ນັກກິລາທີ່ມີຊື່ສຽງຂອງອາເມລິກາຊິງໄດ້ຫຼຽນຄຳ, ທ້າວຊິ່ວໂປ່, ນັກກິລາຈີນຊິງໄດ້ຫຼຽນເງິນ, ທ້າວແດລິ ໂທມັສ໌, ນັກກິລາອັງກິດໄດ້ຫຼຽນທອງ. ຮອດນີ້ລາຍການໂດດນ້ຳຂອງງານກິລາໂອລິມປິກເທື່ອນີ້ໄດ້ສິ້ນສຸດລົງໝົດແລ້ວ, ທິມໂດດນ້ຳຂອງຈີນໄດ້ຫຼຽນຄຳ 6 ຫຼຽນໃນທັງໝົດ 8 ຫຼຽນຄຳຂອງງານກິລາໂອລິມປິກເທື່ອນີ້.
ໃນການແຂ່ງຂັນປັນຈັກຊີລັດສະໄໝໃໝ່ເພດຊາຍ, ລ້ວມມີລອຍນ້ຳ, ຍິງປືນ, ແລ່ນ, ຂີ່ມ້າ, ຟັນດາບ 5 ຢ່າງຢູ່ນຳກັນ, ທ້າວຊາວຈົ່ງຢົງ, ນັກກິລາຈີນຊິງໄດ້ຫຼຽນເງິນ, ນີ້ແມ່ນທິມຈີນໄດ້ຫຼຽນລາງວັນຫຼຽນທຳອິດໃນລາຍການດັ່ງກ່າວ. ທ້າວສະໂວໂບດາ ແດວິດ, ນັກກິລາສາທາລະນະລັດເຊັກຊິງໄດ້ຫຼຽນຄຳ.
ໃນການແຂ່ງຂັນແລ່ນຕໍ່ໄມ້ 4 ຄຸນ 100 ແມັດເພດຊາຍ, ທິມຈາໄມກາສາມາດປ້ອງກັນຫຼຽນຄຳໄວ້ໄດ້ແລະໄດ້ມ້າງສະຖິຕິໂລກດ້ວຍ 36,84 ວິນາທີ, ທິມອາເມລິກາໄດ້ຫຼຽນເງິນ, ທິມຕຼີນີແດັດແລະໂຕບາໂກໄດ້ຫຼຽນທອງ.
ໃນການແຂ່ງຂັນເຕະບານເພດຊາຍຮອບຊິງຊະນະເລີດ, ທິມແມັກຊິກໄດ້ເອົາຊະນະທິມເບຼຊິນດ້ວຍ 2 ປະຕູຕໍ່ 1 ແລ້ວໄດ້ຫຼຽນຄຳ.
ໃນການແຂ່ງຂັນບານສົ່ງເພດຍິງ, ທິມເບຼຊິນໄດ້ຫຼຽນຄຳ, ທິມອາເມລິກາໄດ້ຫຼຽນເງິນແລະທິມສ.ເກົາຫຼີໄດ້ຫຼຽນທອງ.
ໃນການແຂ່ງຂັນບານບ້ວງເພດຍິງ, ທິມອາເມລິກາໄດ້ຫຼຽນຄຳ, ທິມຝລັ່ງໄດ້ຫຼຽນເງິນ, ທິມອົສຕຼາລີໄດ້ຫຼຽນທອງ.
ມາຮອດວັນທີ 11 ສິງຫານີ້, ລາຍການແຂ່ງຂັນສ່ວນຫຼາຍຂອງງານກິລາໂອລິມປິກເທື່ອນີ້ໄດ້ສິ້ນສຸດລົງແລ້ວ, ປະຈຸບັນມີ 84 ປະເທດໄດ້ຫຼຽນລາງວັນ, ໃນນັ້ນມີ 53 ປະເທດໄດ້ຫຼຽນຄຳ. ອາເມລິກາເປັນອັນດັບທີໜຶ່ງ, ຈີນແມ່ນອັນດັບທີສອງ, ອັງກິດເປັນອັນດັບທີ 3, ຣັດເຊຍເປັນທີສີ່, ສ.ເກົາຫຼີເປັນທີ 5ແລະເຢຍລະມັນເປັນທີ 6.
