ຍີ່ປຸ່ນຈັບຕົວນັກເຄື່ອນໄຫວປ້ອງກັນເກາະຕ້ຽວຢູຂອງຈີນຢ່າງຜິດກົດໝາຍ,ຈີນຮຽກຮ້ອງໃຫ້ຍີ່ປຸ່ນຮັບປະກັນໃນຄວາມປອດໄພຂອງເຂົາເຈົ້າ
(GMT+08:00) 2012-08-16 16:58:51 cri
ນັກເຄື່ອນໄຫວປ້ອງກັນເກາະຕ້ຽວຢູ5ຄົນຖືກສົ່ງໄປຮອດທ່າເຮືອນາຮາແຫ່ງໃໝ່
ວັນທີ15ສິງຫານີ້,ນັກເຄື່ອນໄຫວປ້ອງກັນເກາະຕ້ຽວຢູຈາກຮົງກົງຈີນຈຳນວນ14ຄົນຖືກກົມປ້ອງກັນຄວາມສະຫງົບທາງທະເລຂອງຍີ່ປຸ່ນໄດ້ຈັບຕົວໃນຂໍ້ກ່າວຫາທີ່ວ່າ: ເຂົ້າແດນຍີ່ປຸ່ນຢ່າງຜິດກົດໝາຍ.ໃນມື້ດຽວກັນ,ທ່ານຊິນກ່າງ,ໂຄສົກກະຊວງການຕ່າງປະເທດຈີນກ່າວວ່າ,ຈີນພວມເອົາໃຈໃສ່ຕິດຕາມເລື່ອງນີ້ຢ່າງໃກ້ຊິດ,ຮຽກຮ້ອງໃຫ້ຍີ່ປຸ່ນຢ່າເຮັດເລື່ອງໃດໆທີ່ຈະເປັນໄພຂົ່ມຂູ່ເຖິງຄວາມປອດໄພທາງດ້ານຊີວິດແລະຊັບສິນຂອງປະຊາຊົນຈີນ.
ຕາມສະມາຄົມກະຈາຍສຽງຍີ່ປຸ່ນລາຍງານວ່າ,ນັກເຄື່ອນໄຫວປ້ອງກັນເກາະຕ້ຽວຢູຂອງຈີນທັງ 14ຄົນນີ້ຈະຖືກສົ່ງໄປຍັງເທດສະບານນາຮາຂອງເມືອງໂອກິນາວະ.
ໃນມື້ດຽວກັນ,ທ່ານໂຢຊິຣິໂກະ ໂນດະ,ນາຍົກລັດຖະມົນຕີຍີ່ປຸ່ນກ່າວວ່າ,ຈະແກ້ໄຂເຫດການນີ້ຢ່າງເຂັ້ມງວດຕາມກົດໝາຍຂອງຍີ່ປຸ່ນ.
ເກາະຕ້ຽວຢູແມ່ນດິນແດນຂອງຈີນມາຕັ້ງແຕ່ບູຮານນະການ,ຕັ້ງຢູ່ເຂດທະເລຈີນຕາເວັນອອກ. ເມື່ອຍີ່ປຸ່ນກັບອາເມລິກາເຊັນ"ສັນຍາສົ່ງໂອກິນາວະຄືນໃຫ້ແກ່ຍີ່ປຸ່ນ"ໃນປີ1971,ໄດ້ຈັດເອົາເກາະຕ້ຽວຢູແລະເກາະດອນຕ່າງໆທີ່ຂຶ້ນກັບເກາະນີ້ເຂົ້າໃນ"ເຂດທີ່ສົ່ງຄືນໃຫ້ຍີ່ປຸ່ນ"ໄປພ້ອມກັນ.ນັບຈາກນັ້ນເປັນຕົ້ນມາ,ກະຊວງການຕ່າງປະເທດຈີນໄດ້ອອກຖະແຫຼງການ,ກ່າວປະນາມຢ່າງຮຸນແຮງຕໍ່ລັດຖະບານອາເມລິກາແລະຍີ່ປຸ່ນທີ່ຈັດເອົາເກາະຕ້ຽວຢູແລະເກາະດອນທີ່ຂຶ້ນກັບເກາະຕ້ຽວຢູຂອງຈີນເຂົ້າໃນ"ເຂດທີ່ສົ່ງຄືນໃຫ້ຍີ່ປຸ່ນ",ໂດຍຖະແຫຼງການຊີ້ອອກຢ່າງເຄັ່ງຂຶມວ່າ "ນີ້ເປັນການລ່ວງລ້ຳອະທິປະໄຕແລະຜືນແຜ່ນດິນຂອງຈີນຢ່າງບັງອາດ,ປະຊາຊົນຈີນຈະບໍ່ຍອມໃຫ້ເຮັດຄືແນວນີ້ຢ່າງເດັດຂາດ."
