ກອງທັບຈີນຈະຕິດຕາມການຜັນແປຂອງສະພາບການເກາະຕ້ຽວອີຢ່າງໃກ້ຊິດແລະຈະສະຫງວນສິດໃນການໃຊ້ມາດຕະການທີ່ກ່ຽວຂ້ອງ
ວັນທີ11ກັນຍານີ້,ທ່ານເກິງຢ້ຽນເຊິ່ງ ໂຄສົກກະຊວງປ້ອງກັນປະເທດຈີນກ່າວວ່າ,ກອງທັບຈີນຄັດຄ້ານຢ່າງເດັດດ່ຽວແລະປະທ້ວງຢ່າງຮຸນແຮງຕໍ່ຍີ່ປຸ່ນທີ່ໃຊ້ການກະທຳອັນທີ່ເອີ້ນວ່າຊື້ເກາະຕ້ຽວອີພ້ອມດ້ວຍເກາະດອນຕ່າງໆທີ່ຢູ່ບໍລິເວນໃກ້ຄຽງ.ກອງທັບຈີນພວມຕິດຕາມຄວາມຄືບໜ້າຂອງບັນຫາເກາະຕ້ຽວອີຢ່າງໃກ້ຊິດແລະຈະສະຫງວນສິດໃນການໃຊ້ມາດຕະການທີ່ກ່ຽວຂ້ອງ.
ທ່ານເກິງຢ້ຽນເຊິ່ງກ່າວວ່າ,ວັນທີ10ກັນຍານີ້,ລັດຖະບານຍີ່ປຸ່ນບໍ່ສົນໃຈນຳການຄັດຄ້ານຢ່າງຮຸນແຮງຂອງຈີນ,ປະກາດຢ່າງບັງອາດວ່າຈະຊື້ເກາະຕ້ຽວອີພ້ອມດ້ວຍເກາະນານສ້ຽວແລະເກາະເປີຍສ້ຽວທີ່ຂຶ້ນກັບເກາະຕ້ຽວອີຂອງຈີນ,ການເຄື່ອນໄຫວທີ່ເຮັດໃຫ້ເກາະຕ້ຽວອີກາຍເປັນຊັບສິນຂອງລັດ,ນີ້ໄດ້ເປັນການລ່ວງລ້ຳສິດອຳນາດອະທິປະໄຕແລະຜືນແຜ່ນດິນອັນຄົບຖ້ວນຂອງຈີນຢ່າງຮ້າຍແຮງ.ກອງທັບຈີນຄັດຄ້ານຢ່າງເດັດດ່ຽວແລະປະທ້ວງຢ່າງຮຸນແຮງຕໍ່ການກະທຳດັ່ງກ່າວ.
ທ່ານເກິງຢ້ຽນເຊິ່ງກ່າວວ່າ,ນັບແຕ່ຕົ້ນປີນີ້ມາ,ລັດຖະບານຍີ່ປຸ່ນປ່ອຍປະໃຫ້ອິດທິກຳລັງຝ່າຍຂາວສ້າງເລື່ອງຊື້ເກາະຕ້ຽວອີ,ຈົນວ່າລັດຖະບານຍີ່ປຸ່ນອອກໜ້າຊື້ເກາະດ້ວຍຕົນເອງ,ນີ້ໄດ້ທຳລາຍສະພາບການພັດທະນາການພົວພັນລະຫວ່າງຈີນຍີ່ປຸ່ນຢ່າງຮ້າຍແຮງ.ປີນີ້,ຍີ່ປຸ່ນໄດ້ເພີ່ມກຳລັງອາວຸດດ້ວຍຂໍ້ອ້າງຕ່າງໆນາໆ,ເຮັດໃຫ້ສະຖານະການໃນພາກພື້ນນີ້ເຄັ່ງຕຶງຂຶ້ນເລື້ອຍໆ,ສ້າງເລື່ອງກ່ຽວກັບບັນຫາເກາະຕ້ຽວອີຢ່າງລຽນຕິດ,ຊຶ່ງເລື່ອງນີ້ເປັນເຫດໃຫ້ປະເທດໃກ້ຄຽງຂອງຍີ່ປຸ່ນແລະປະຊາຄົມໂລກລະວັງຕົວໃນລະດັບສູງ.
ທ່ານເກິງຢ້ຽນເຊິ່ງກ່າວເນັ້ນວ່າ:ລັດຖະບານແລະກອງທັບຈີນມີຄວາມຕັດສິນໃຈຢ່າງເດັດດ່ຽວໃນການປົກປ້ອງສິດອຳນາດອະທິປະໄຕແລະຜືນແຜ່ນດິນອັນຄົບຖ້ວນຂອງຊາດ,ແລະກຳລັງຕິດຕາມຄວາມຄືບໜ້າຂອງສະພາບການເກາະຕ້ຽວອີຢ່າງໃກ້ຊິດ,ແລະສະຫງວນສິດໃນການໃຊ້ມາດຕະການທີ່ກ່ຽວຂ້ອງ.
