ລັດຖະມົນຕີວ່າການກະຊວງປ້ອງກັນປະເທດຈີນກ່າວຢ້ຳວ່າ,ຈີນເດັດດ່ຽວຄັດຄ້ານອາເມລິກາກ່າວຄຳທີ່ວ່າ "ສັນຍາປ້ອງກັນຄວາມໝັ້ນຄົງລະຫວ່າງອາເມລິກາຍີ່ປຸ່ນ"ໃຊ້ໃນບັນຫາເກາະຕ້ຽວອີໄດ້
ທ່ານລຽງກວ່າງເລ້ຍຈັດພິທີຕ້ອນຮັບເພື່ອເປັນກຽດໃຫ້ແກ່ທ່ານປາເນັດຕາ
ຕອນເຊົ້າວັນທີ18ກັນຍານີ້,ຢູ່ຕຶກ "1ສິງຫາ"ທີ່ປັກກິ່ງ,ທ່ານລຽງກວ່າງເລ້ຍ,ທີ່ປຶກສາແຫ່ງລັດ,ທັງເປັນລັດຖະມົນຕີວ່າການກະຊວງປ້ອງກັນປະເທດຈີນໄດ້ພົບປະເຈລະຈາກັບທ່ານເລອອນ ປາເນັດຕາ,ລັດຖະມົນຕີວ່າການກະຊວງປ້ອງກັນປະເທດອາເມລິກາທີ່ກຳລັງຢ້ຽມຢາມຈີນ.
ທ່ານລຽງກວາງເລ້ຍໄດ້ກ່າວຢ້ຳເຖິງຈຸດຢືນຂອງຈີນໃນບັນຫາເກາະຕ້ຽວອີ.ທ່ານຊີ້ອອກວ່າ,ບັນຫາເກາະຕ້ຽວອີເຄັ່ງຕຶງຂຶ້ນຕື່ມອີກ,ແມ່ນຍ້ອນຄວາມຜິດຂອງຝ່າຍຍີ່ປຸ່ນ.ລັດຖະບານຈີນມີຄວາມຕັດສິນໃຈແລະມີຈິດໃຈອັນໝັ້ນໜຽວບໍ່ປ່ຽນແປງຕໍ່ການປ້ອງກັນສິດອະ ທິປະໄຕເໜືອເກາະຕ້ຽວອີ.ຈີນເດັດດ່ຽວຄັດຄ້ານອາເມລິກາກ່າວຄຳທີ່ວ່າ "ສັນຍາປ້ອງກັນຄວາມໝັ້ນຄົງລະຫວ່າງອາເມລິກາຍີ່ປຸ່ນ"ນັ້ນສາມາດນຳມາໃຊ້ໃນບັນຫາເກາະຕ້ຽວອີ,ຫວັງວ່າອາເມລິກາຈະພິຈາລະນາເຖິງສັນຕິພາບແລະສະຖຽນລະພາບຂອງພາກພື້ນ,ປະຕິບັດຕໍ່ຄຳໝັ້ນສັນຍາຂອງຕົນທີ່ວ່າ "ຈະບໍ່ເຂົ້າຂ້າງຝ່າຍໃດໃນບັນຫາກ່ຽວກັບສິດອະທິປະໄຕຂອງເກາະຕ້ຽວອີ."
ທ່ານປາເນັດຕາກ່າວຢ້ຳວ່າ,ອາເມລິກາບໍ່ເຂົ້າຂ້າງຝ່າຍໃດໃນບັນຫາທະເລຈີນໃຕ້ແລະບັນ ຫາເກາະຕ້ຽວອີ,ຫວັງວ່າປະເທດທີ່ກ່ຽວຂ້ອງຈະແກ້ໄຂຄວາມຂັດແຍ່ງກັນໂດຍສັນຕິ.
ຫຼັງການເຈລະຈາກັນ,ທ່ານລຽງກວ່າງເລ້ຍແລະທ່ານປາເນັດຕາໄດ້ຖະແຫຼງຂ່າວຮ່ວມ
ພາຍຫຼັງການເຈລະຈາສິ້ນສຸດລົງ,ທ່ານລຽງກວ່າງເລ້ຍແລະທ່ານປາເນັດຕາໄດ້ຖະແຫຼງຂ່າວຮ່ວມກັນ.ທ່ານລຽງກວ່າງເລ້ຍຊີ້ອອກວ່າ,ພາຍໃຕ້ຂອບທີ່ສ້າງການພົວພັນຄູ່ຮ່ວມມືຈີນອາເມລິກາ,ຈີນອາເມລິກາຄວນຕັ້ງໜ້າຊຸກຍູ້ການຂະຫຍາຍການພົວພັນທາງການທະຫານແບບໃໝ່ທີ່"ສະເໝີພາບກັນເພື່ອໃຫ້ຕ່າງຝ່າຍຕ່າງມີຜົນປະໂຫຍດ,ຮ່ວມມືກັນເພື່ອຈະໄດ້ຮັບຜົນປະໂຫຍດທັງສອງຝ່າຍ",ເພີ່ມທະວີການເຈລະຈາແລະແລກປ່ຽນ,ເພີ່ມຄວາມເຂົ້າໃຈແລະຄວາມໄວ້ເນື້ອເຊື່ອໃຈກັນ,ລົງເລິກການແລກປ່ຽນແລະຮ່ວມມື,ຍົກສູງການພົວ ພັນລະຫວ່າງສອງກອງທັບໃຫ້ຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.ທ່ານປາເນັດຕາກ່າວວ່າ,ການພົວພັນທີ່ດີລະຫວ່າງອາເມລິກາກັບຈີນບໍ່ພຽງແຕ່ມີຜົນດີຕໍ່ສອງປະເທດແລະປະຊາຊົນທັງສອງຊາດເທົ່ານັ້ນ,ຍັງມີຜົນດີຕໍ່ສັນຕິພາບ,ສະຖຽນລະ ພາບແລະຄວາມຈະເລີນຮຸ່ງເຮືອງຂອງພາກພື້ນອາຊີປາຊິຟິກ.ອາເມລິກາສຸມກຳລັງເຂົ້າໃນການສ້າງການພົວພັນທີ່ໝັ້ນທ່ຽງແລະມີລັກສະນະສ້າງສັນກັບຈີນ,ນີ້ແມ່ນເງື່ອນໄຂສຳ ຄັນແຫ່ງການປົກປັກຮັກສາສັນຕິພາບຂອງໂລກໃນສະຕະວັດທີ21.ອາເມລິກາຊຸກຍູ້ໃຫ້ບັນດາປະເທດອາຊີປາຊິຟິກເພີ່ມທະວີການແລກປ່ຽນກັບຈີນ,ແລະເຊື້ອເຊີນຈີນໃຫ້ເຂົ້າຮ່ວມ"ການຊ້ອມຮົບອ້ອມມະຫາສະໝຸດປາຊິຟິກ"ປີ2014.
