ໂຄສົກກະຊວງການຕ່າງປະເທດຈີນກ່າວໂຕ້ຕອບຖ້ອຍຄວາມອັນຜິດພາດຂອງນັກຫຼິ້ນການເມືອງຍີ່ປຸ່ນໃນບັນຫາເກາະຕ້ຽວອີ
ວັນທີ 30 ກັນຍານີ້, ຢູ່ທີ່ນະຄອນຫຼວງປັກກິ່ງ, ທ່ານຫົງເຫຼິຍ, ໂຄສົກກະຊວງການຕ່າງປະເທດຈີນໄດ້ຕອບຄຳຖາມຂອງນັກຂ່າວວ່າ, ຖ້ອຍຄວາມຂອງທ່ານເຊອີຈີ ເມເອຮາຣາ, ນັກຫຼິ້ນການເມືອງຂອງຍີ່ປຸ່ນກ່ຽວກັບບັນຫາເກາະຕ້ຽວອີນັ້ນ ແມ່ນຜິດພາດທີ່ສຸດ.
ຂ່າວແຈ້ງວ່າ, ຫວ່າງມໍ່ໆມານີ້, ທ່ານເລອີຈີ ເມເອຮາຣາ, ອະດີດປະທານສະມາຄົມການປະສານງານການເມືອງ ພັກປະຊາທິປະໄຕຍີ່ປຸ່ນກ່າວວ່າ, ຈີນປະທ້ວງຍີ່ປຸ່ນໃຊ້ກົນອຸບາຍຍຶດເອົາເກາະຕ້ຽວອີ ແມ່ນ "ບິດເບືອນຄວາມຈິງ". ຕໍ່ເລື່ອງນີ້, ທ່ານຫົງເຫຼິຍ ກ່າວວ່າ, ຢູ່ພາຍໃນປະເທດຍີ່ປຸ່ນມັກຈະມີບາງຄົນ ຈົນກະທັ້ງນັກຫຼິ້ນການເມືອງບາງຄົນ ບໍ່ກ້າປະເຊີນກັບປະຫວັດສາດ, ແລະຢາກຫຼົບຫຼີກປະຫວັດສາດ. ສະນັ້ນ, ທ່ານເຊອີຈີ ມີຖ້ອຍຄວາມຄືແນວນີ້ແມ່ນເຮັດໃຫ້ຄົນບໍ່ຮູ້ສຶກແປກປະຫຼາດແຕ່ຢ່າງໃດ.
ທ່ານຫົງເຫຼິຍ ກ່າວວ່າ, ເກາະຕ້ຽວອີ ແລະ ເກາະດອນຕ່າງໆທີ່ຢູ່ບໍລິເວນເກາະຕ້ຽວອີ ແມ່ນດິນແດນຂອງຈີນມາແຕ່ປະຫວັດສາດ, ນີ້ແມ່ນເລື່ອງຈິງທີ່ຈະແຈ້ງທີ່ສຸດ. ວັນທີ 10 ກັນຍາທີ່ຜ່ານມານີ້, ລັດຖະບານຍີ່ປຸ່ນໄດ້ທຳການຕົກລົງອັນຜິດພາດຢ່າງບັງອາດ ທີ່ "ຊື້ເອົາ" ເກາະຕ້ຽວອີ, ນີ້ໄດ້ລ່ວງລ້ຳສິດອະທິປະໄຕທາງດ້ານດິນແດນຂອງຈີນຢ່າງຮ້າຍແຮງ, ເຮັດໃຫ້ປະຊາຊົນຈີນທົ່ວປະເທດຮູ້ສຶກຄຽດແຄ້ນທີ່ສຸດ, ກໍໄດ້ທຳລາຍການພົວພັນລະຫວ່າງຈີນຍີ່ປຸ່ນຢ່າງໜັກໜ່ວງ. ຈີນເຕືອນຢ່າງຮຸນແຮງໃຫ້ຍີ່ປຸ່ນປະເຊີນໜ້າກັບເລື່ອງຈິງໃນບັນຫາຄວາມຂັດແຍ່ງກັນກ່ຽວກັບເກາະຕ້ຽວອີ, ຮັບຮູ້ຄວາມໜັກໜ່ວງຂອງສະພາບການໃນປັດຈຸບັນ, ໃຊ້ມາດຕະການໃນທັນທີເພື່ອແກ້ໄຂຄວາມຜິດພາດຂອງຕົນ, ພ້ອມກັນກັບຝ່າຍຈີນແກ້ໄຂບັນຫາໂດຍຜ່ານການປຶກສາຫາລືແລະເຈລະຈາກັນ. ຈີນຫວັງວ່າບຸກຄົນຊົງຄຸນວຸດທິໃນວົງການຕ່າງໆຂອງຍີ່ປຸ່ນຖືພາກສ່ວນລວມຂອງການພົວພັນລະຫວ່າງສອງປະເທດເປັນສຳຄັນ, ໃຊ້ການກະທຳອັນຕັ້ງໜ້າ, ຊຸກຍູ້ການຜ່ານຜ່າຄວາມຫຍຸ້ງຍາກໃນປັດຈຸບັນ, ເຮັດໃຫ້ການພົວພັນລະຫວ່າງສອງປະເທດກັບຄືນສູ່ສະພາບປົກກະຕິ.
