ເຈດຈຳນົງຂອງຍີ່ປຸ່ນທີ່ຢາກປະຕິເສດບໍ່ຮັບຮອງຈີນມີອະທິປະໄຕຕໍ່ເກາະຕ້ຽວອີນັ້ນແມ່ນບໍ່ສາມາດບັນລຸຜົນເປັນຈິງໄດ້
(GMT+08:00) 2012-10-13 13:30:44 cri
ວັນທີ 12 ຕຸລານີ້, ຢູ່ທີ່ນະຄອນຫລວງມົສກູ, ທ່ານຊຸຍທຽນຄາຍ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນ, ອະດີດເອກອັກຄະລັດຖະທູດຈີນປະຈຳຍີ່ປຸ່ນກ່າວວ່າ, ເຈດຈຳນົງຂອງຍີ່ປຸ່ນທີ່ຢາກປະຕິເສດບໍ່ຮັບຮອງຈີນມີອະທິປະໄຕຕໍ່ເກາະຕ້ຽວອີນັ້ນລ້ວນແຕ່ແມ່ນເຈດຈຳນົງຂອງຍີ່ປຸ່ນແຕ່ຝ່າຍດຽວ. ທ່ານຮຽກຮ້ອງເຈົ້າຫນ້າທີ່ຍີ່ປຸ່ນຈົ່ງຮັບຮູ້ປະຫວັດສາດແລະເລື່ອງຄວາມເປັນຈິງຢ່າງຖືກຕ້ອງ.
ຫວ່າງມໍ່ໆນີ້, ເຈົ້າຫນ້າທີ່ລະດັບສູງຂອງຍີ່ປຸ່ນຈຳນວນຫນຶ່ງປະຕິເສດບໍ່ຮັບຮອງຄວາມຮັບຮູ້ຄືກັນກ່ຽວກັບບັນຫາເກາະຕ້ຽວອີທີ່"ໂຈະຄວາມຂັດແຍ່ງກັນໄວ້"ທີ່ອະດີດຜູ່ນຳຂອງສອງປະເທດຕົກລົງກັນໃນແຕ່ກ່ອນ.ຕໍ່ເລື່ອງນີ້, ທ່ານຊຸຍທຽນຄາຍທີ່ເຄີຍດຳລົງຕຳແຫນ່ງເປັນເອກອັກຄະລັດຖະທູດຈີນປະຈຳຍີ່ປຸ່ນກ່າວວ່າ, ຍີ່ປຸ່ນປະຕິເສດບໍ່ຮັບຮອງຄວາມຮັບຮູ້ຄືກັນຂອງຜູ່ນຳລຸ່ນກ່ອນຂອງສອງຝ່າຍແມ່ນເປັນການປະຫມາດເລື່ອງຄວາມເປັນຈິງໃນປະຫວັດສາດ.
ທ່ານຊຸຍທຽນຄາຍກ່າວວ່າ, ຍ້ອນມີສະຕິປັນຍາແລະການເຫັນກວ້າງມອງໄກຂອງຜູ່ນຳລຸ່ນເກົ່າທັງສອງປະເທດ, ຈິ່ງເຮັດໃຫ້ການພົວພັນລະຫວ່າງຈີນກັບຍີ່ປຸ່ນມີການຂະຫຍາຍຕົວເປັນຢ່າງດີເປັນເວລາ 40 ປີມາ.ໃຕ້ສະຖານະການປັດຈຸບັນ, ການກໍ່ຍຸແຍແລະປະຕິເສດບໍ່ຣັບເອົາຄວາມຂັດແຍ່ງກັນທີ່ໄດ້ມີຢູ່ແລ້ວ, ບໍ່ພຽງແຕ່ຈະທຳລາຍການພົວພັນລະຫວ່າງສອງຝ່າຍທໍ່ນັ້ນ, ຍັງບໍ່ມີຜົນດີຕໍ່ຜົນປະໂຫຍດຍາວໄກຂອງຍີ່ປຸ່ນ.ທ່ານຫວັງວ່າ, ຍີ່ປຸ່ນຈະຮັບຮອງປະຫວັດສາດແລະເລື່ອງຄວາມເປັນຈິງຢ່າງຖືກຕ້ອງ, ປຶກສາຫລືກັບຈີນຢ່າງຈິງຈັງ,ເພື່ອຊອກຫາວິທີທີ່ດີໃນການແກ້ໄຂບັນຫານີ້.
