ກອງປະຊຸມພາກປະຊາຊົນອາຊີເອີຣົບຄັ້ງທີ9ໄຂຂື້ນທີ່ນະຄອນຫຼວງວຽງຈັນ
(GMT+08:00) 2012-10-16 19:05:34 cri
ທ່ານດຣ.ທອງລຸນ ສີສຸລິດ, ຮອງນາຍົກລັດຖະມົນຕີ,ລັດຖະມົນຕີ
ວ່າການກະຊວງການຕ່າງປະເທດກ່າວເປີດກອງປະຊຸມ
ຕາມຂ່າວCRI: ຕອນບ່າຍວັນທີ16ຕຸລານີ້, ຢູ່ຫໍວັດທະນະທຳແຫ່ງຊາດທີ່ນະຄອນຫຼວງວຽງຈັນໄດ້ຈັດພິທີເປີດກອງປະຊຸມພາກປະຊາຊົນອາຊີເອີຣົບຄັ້ງທີ9 ຫຼື AEPF 9.ໃນພິທີດັ່ງກ່າວ, ທ່ານດຣ.ທອງລຸນ ສີສຸລິດ, ຮອງນາຍົກລັດຖະມົນຕີ,ລັດຖະມົນຕີວ່າການກະຊວງການຕ່າງປະເທດໄດ້ກ່າວເປີດກອງປະຊຸມ.ທ່ານກ່າວວ່າ, ກອງປະຊຸມພາກປະຊາຊົນອາຊີເອີຣົບຄັ້ງທີ9ຈະເປັນໂອກາດສຳຄັນອັນໜຶ່ງທີ່ຈະໄດ້ມີການແລກປ່ຽນກັນທາງດ້ານສະຕິປັນຍາ, ແນວຄວາມຄິດ ແລະບົດຮຽນດ້ານຕ່າງໆ ແນໃສ່ນຳເອົາຜົນທາງບວກ ເຂົ້າໃນການພັດທະນາຮອບດ້ານຂອງແຕ່ລະປະເທດໃນສອງພາກພື້ນ, ອັນຈະເປັນການຕອບສະໜອງກັບຄວາມຮຽກຮ້ອງຕ້ອງການແລະຄວາມມຸ້ງມາດປາຖະໜາອັນຊອບທຳຂອງປະຊາຊົນ. ອີກດ້ານໜຶ່ງ, ກອງປະຊຸມຄັ້ງນີ້ຈະເປັນຂີດໝາຍແຫ່ງການເຕົ້າໂຮມຄວາມສາມັກຄີຂອງປະຊາຊົນສອງພາກພື້ນ, ແນໃສ່ເຮັດໃຫ້ປະຊາຊົນສອງພາກພື້ນ ມີຄວາມເຂົ້າໃຈກັນ, ມີມິດໄມຕີຕໍ່ກັນ ແລະມີຄວາມໃກ້ຊິດສະໜິດສະໜົມກັນ, ເຂົ້າໃຈຄວາມມຸ່ງມາດປາຖະໜາ, ເຂົ້າໃຈເງື່ອນໄຂສະພາບແວດລ້ອມ, ຈຸດພິເສດຂອງປະຫວັດສາດ, ຂະນົບທຳນຽມແລະວັດທະນະທຳທີ່ມີເອກະລັກຂອງກັນແລະກັນຫຼາຍຂຶ້ນ.
ເນື້ອໃນໃຈຄວາມຂອງກອງປະຊຸມຄັ້ງນີ້ແມ່ນແນໃສ່: ຮັດແໜ້ນຄວາມສາມັກຄີຂອງປະຊາຊົນ ເພື່ອຕ້ານກັບຄວາມທຸກຍາກ, ຕ້ານຄວາມບໍ່ຍຸດຕິທຳ, ຄວາມບໍ່ສະເໝີພາບແລະເພື່ອການພັດທະນາແບບຍືນຍົງ, ແນໃສ່ສ້າງລັດຂອງປະຊາຊົນ ເພື່ອປະຊາຊົນແລະໂດຍປະຊາຊົນ.
ຄະນະຜູ້ແທນຈາກວົງການຕ່າງໆຂອງສອງທະວີບອາຊີແລະເອີຣົບລວມປະມານ800ຄົນໄດ້ເຂົ້າຮ່ວມກອງປະຊຸມຄັ້ງນີ້, ໃນກອງປະຊຸມທີ່ຈະດຳເນີນເປັນເວລາ 4 ວັນ ຄືແຕ່ວັນທີ 16 ຫາ 19 ຕຸລານີ້, ຈະປຶກສາຫາລືກ່ຽວກັບ 4 ຫົວຂໍ້ໃຫຍ່ແລະ 36 ຫົວຂໍ້ຍ່ອຍ.
