ກອງປະຊຸມຄະນະກຳມະການແມ່ຍິງອາຊຽນຄັ້ງທີ 11 ພາຍໃຕ້ຫົວຂໍ້"ການສົ່ງເສີມບົດບາດຍິງ-ຊາຍ ແລະ ການເປັນຄູ່ຮ່ວມມືຂອງແມ່ຍິງອາຊຽນ ເພື່ອສິ່ງແວດລ້ອມແບບຍືນຍົງ" ໄດ້ດຳເນີນໄປໃນຕອນເຊົ້າວັນທີ16ຕຸລານີ້,ເພື່ອທົບທວນຄືນການຈັດຕັ້ງປະຕິບັດແຜນປະຕິບັດງານແມ່ຍິງອາຊຽນ ປີ 2011-2015; ແຜນການສ້າງປະຊາຄົມອາຊຽນດ້ານເສດຖະກິດ-ສັງຄົມ ທີ່ພົວພັນເຖິງວຽກງານແມ່ຍິງ;ການຈັດຕັ້ງປະຕິບັດວຽກ ງານທີ່ຮັບຮອງໃນກອງປະຊຸມຄະນະກຳມະການແມ່ຍິງອາຊຽນຄັ້ງທີ 10 ທີ່ປະເທດອິນໂດເນເຊຍໃນປີ 2011 ທີ່ຜ່ານມາ.
ພ້ອມກັນນັ້ນ ຕົວແທນຂອງແມ່ຍິງແຕ່ລະປະເທດທີ່ເຂົ້າຮ່ວມ ກໍ່ໄດ້ລາຍງານການຈັດຕັ້ງປະຕິບັດວຽກງານຂອງຕົນ ແລະປະກອບຄຳຄິດຄຳເຫັນຕໍ່ການຈັດຕັ້ງປະຕິບັດແຜນປະຕິບັດວຽກງານຂອງກອງປະຊຸມຄະນະກຳມະການແມ່ຍິງອາຊຽນປີ 2011-2015 ໂດຍສະເພາະບັນຫາສິ່ງແວດລ້ອມ,ການຫຼຸດຜ່ອນຄວາມທຸກຍາກ, ການສົ່ງເສີມບົດບາດຍິງ-ຊາຍໃນການນຳ ແລະ ອື່ນໆ.
ກອງປະຊຸມຄັ້ງນີ້ດຳເນີນໄປໂດຍການເປັນປະທານຂອງທ່ານນາງ ບັນດິດປະທຸມວັນ,ຮອງປະທານສູນກາງສະຫະພັນແມ່ຍິງລາວ,ມີຄະນະຜູ້ແທນຂັ້ນສູງຂອງແມ່ຍິງບັນດາປະເທດສະມາຊິກອາຊຽນ 10 ປະເທດເຂົ້າຮ່ວມ.
