ຈີນຈະສະໜັບສະໜູນການພັດທະນາວຽກງານແມ່ຍິງໃນພາກພື້ນອາຊຽນຢ່າງສຸດຄວາມສາມາດ
ກອງປະຊຸມຄະນະກໍາມະການແມ່ຍິງອາຊຽນກັບຈີນ,ຍີ່ປຸ່ນແລະສ.ເກົາຫຼີຫຼືອາຊຽນບວກ3ຄັ້ງທີ 4 ໄດ້ຈັດຂື້ນໃນວັນທີ18ຕຸລານີ້,ທີ່ນະຄອນຫຼວງວຽງຈັນ,ຄະນະຜູ້ແທນແມ່ຍິງຂັ້ນສູງຂອງ10ປະເທດອາຊຽນແລະຈີນ,ຍີ່ປຸ່ນແລະສ.ເກົາຫລີໄດ້ເຂົ້າຮ່ວມກອງປະຊຸມດັ່ງກ່າວພາຍໃຕ້ຫົວຂໍ້ທີ່ວ່າ"ການ ສົ່ງເສີມບົດບາດຍິງ-ຊາຍແລະການຮ່ວມມືຂອງແມ່ຍິງອາຊຽນເພື່ອສິ່ງແວດລ້ອມທີ່ຍືນຍົງ ".ໃນໄລຍະເຂົ້າຮ່ວມກອງປະຊຸມ,ທ່ານນາງໂໝຫົງ ຜູ້ຕາງໜ້າແມ່ຍິງຈີນ,ຫົວໜ້າຄະນະພົວພັນສາກົນຂອງສະຫະພັນແມ່ຍິງຈີນໄດ້ໃຫ້ສຳພາດຕໍ່ນັກຂ່າວວິທະຍຸແຫ່ງຊາດຈີນຫຼືCRIປະຈຳນະຄອນຫຼວງວຽງຈັນ.
ຄຽງຄູ່ກັບການພັດທະນາຂອງຂະບວນການເຊື່ອມໂຍງເຂົ້າກັນຂອງອາຊຽນໃນຊຸມປີມໍ່ໆມານີ້,ອາຊຽນມີຖານະບົດບາດສູງຂຶ້ນໃນເວທີສາກົນ,ບົດບາດການນຳພາແລະລະດັບການມີສ່ວນຮ່ວມໃນວຽກງານສາກົນຂອງແມ່ຍິງອາຊຽນກໍ່ໄດ້ຍົກສູງຂຶ້ນຢ່າງຈະແຈ້ງ.ທ່ານນາງໂໝຫົງກ່າວວ່າ,ເປັນເວລາດົນນານມາແລ້ວທີ່ຈີນໄດ້ສຸມກຳລັງເຂົ້າໃນການຊຸກຍູ້ການຮ່ວມມືທາງດ້ານວຽກງານແມ່ຍິງພາຍໃຕ້ຂອບອາຊຽນມາໂດຍຕະຫຼອດ.ນາງກ່າວວ່າ:
"ປີ2007,ຈີນໄດ້ສ້າງຕັ້ງສູນຝຶກອົບຮົມແມ່ຍິງຈີນ-ອາຊຽນຢູ່ເຂດປົກຄອງຕົນເອງເຜົ່າຈວ້າງກວາງຊີ,ຫຼັງຈາກນັ້ນແຕ່ລະປີແມ່ນໄດ້ຕ້ອນຮັບເອົາພະນັກງານຫຼັກແຫຼ່ງຂອງແມ່ຍິງຈາກປະເທດອາຊຽນມາຝຶກອົບຮົມ,ທັດສະນະສຶກສາເຮັດວຽກຫຼືການຢ້ຽມຢາມທາງການເມືອງຢູ່ຈີນ.ແຕ່ລະປີ,ຈີນກໍ່ໄດ້ແຕ່ງຕັ້ງຄະນະຜູ້ແທນແມ່ຍິງຂັ້ນສູງຂອງຕົນໄປເຂົ້າຮ່ວມກອງປະຊຸມອາຊຽນບວກ3ເພື່ອຮ່ວມກັນຄົ້ນຄວ້າການຮ່ວມມືທາງດ້ານແມ່ຍິງພາຍໃຕ້ຂອບອາຊຽນ."
ມາຮອດປີ2012ນີ້, ກອງປະຊຸມຄະນະກຳມະການແມ່ຍິງອາຊຽນ,ຈີນ,ຍີ່ປຸ່ນແລະສ.ເກົາຫຼີຫຼືອາຊຽນບວກ3ໄດ້ຈັດຂຶ້ນຢ່າງມີຜົນສຳເລັດເປັນຄັ້ງທີ4ແລ້ວ.ປະຈຸບັນ,ກອງປະຊຸມນີ້ໄດ້ກາຍເປັນກົນໄກການແລກປ່ຽນລະຫວ່າງແມ່ຍິງຂອງຈີນ,ຍີ່ປຸ່ນ,ສ.ເກົາຫຼີກັບອາຊຽນ.ຜ່ານການຈັດກອງປະຊຸມຫຼາຍຝ່າຍເປັນປະຈຳເພື່ອຮ່ວມກັນຊົມໃຊ້ຜົນສຳເລັດຂອງວຽກງານແມ່ຍິງ,ຄົ້ນຄວ້າແລະປຶກສາຫາລືເພື່ອການຮັບມືກັບສິ່ງທ້າທາຍໃນຕໍ່ໜ້າໃນຂະບວນການທີ່ຈະຍົກຖານະບົດບາດສັງຄົມຂອງແມ່ຍິງໃຫ້ສູງຂຶ້ນ,ຊອກຫາຊ່ອງທາງທີ່ມີຜົນສັກສິດໃນການຊຸກຍູ້ບົດບາດຍິງ-ຊາຍ.ລາວໃນຖານະເປັນປະເທດເຈົ້າພາບຈັດກອງປະຊຸມຄັ້ງນີ້,ໄດ້ກະກຽມຢ່າງລະອຽດຖິ່ຖ້ວນແລະຮອບດ້ານໃຫ້ແກ່ກອງປະຊຸມແລະໄດ້ຕ້ອນຮັບຄະນະຜູ້ແທນປະເທດຕ່າງໆດ້ວຍຄວາມອົບອຸ່ນແລະມີໄມຕີຈິດມິດຕະພາບ.ທ່ານນາງໂໝຫົງຍັງກ່າວວ່າ:
"ລາວເປັນປະເທດທີ່ມີທິວທັດທຳມະຊາດອັນສວຍງາມ,ປະຊາຊົນລາວມີຄວາມໂອບເອື້ອອາລີ,ມີການດຳລົງຊີວິດທີ່ລຽບງ່າຍ,ສອງປະເທດຈີນລາວມີມິດຕະພາບອັນເປັນມູນເຊື້ອມາແຕ່ດົນນານ.ໃນຕໍ່ໜ້າ,ພວກຂ້າພະເຈົ້າຈະສືບຕໍ່ຊຸກຍູ້ ແລກປ່ຽນການຢ້ຽມຢາມເຊິ່ງກັນແລະກັນລະຫວ່າງເຈົ້າໜ້າທີ່ແມ່ຍິງຂັ້ນສູງ,ທຳຄວາມພະຍາຍາມຈົນສຸດຄວາມສາມາດໃນການໃຫ້ຄວາມຊ່ວຍເຫຼືອຕົວຈິງແກ່ການພັດທະນາວຽກງານແມ່ຍິງຂອງລາວ."
