ງານຖະແຫຼງຂ່າວການນຳເອົາລະບົບໂທລະສັບມືຖື4Gມາຮັບໃຊ້ກອງປະຊຸມສຸດຍອດອາເຊັມຄັ້ງທີ9
ຕອນເຊົ້າຂອງວັນທີ 26 ຕຸລານີ້ທີ່ນະຄອນຫຼວງວຽງຈັນ ບໍລິສັດລັດວິສາຫະກິດລາວໂທລະຄົມມະນາຄົມໄດ້ຈັດງານຖະແຫຼງຂ່າວເປີດໂຕລະບົບໂທລະສັບມືຖື 4G ເພື່ອ ກຽມຮັບໃຊ້ກອງປະຊຸມສຸດຍອດອາເຊັມຄັ້ງທີ 9,ພາຍໃຕ້ການເປັນປະທານຂອງທ່ານ ທອງໃສ ຊານໄຊຍະ, ຜູ້ອຳນວຍການໃຫຍ່ລາວໂທລະຄົມ, ທ່ານທັນສະໄໝ ກົມມະສິດ, ລັດຖະມົນຕີຊ່ວຍວ່າການກະຊວງໄປສະນີ, ໂທລະຄົມ ມະນາຄົມແລະການສື່ສານ ແລະ ບັນດາແຂກທີ່ມີກຽດຈາກພາກສ່ວນຕ່າງໆເຂົ້າຮ່ວມ.
ຜູ້ເຂົ້າຮ່ວມງານຖະແຫຼງຂ່າວ
ເພື່ອເປັນການຂໍ່ານັບຮັບຕ້ອນ ແລະ ປະກອບສ່ວນໃນການເປັນເຈົ້າພາບຈັດກອງປະຊຸມ ສຸດຍອດອາເຊັມຄັ້ງທີ 9, ບໍລິສັດລາວໂທລະຄົມ ແລະ ບໍລິສັດຮົວເວີ່ຍຂອງຈີນຈຶ່ງນຳ ເອົາລະບົບໂທລະສັບມືຖື 4Gຈຳນວນ 20ສະຖານີມາຕິດຕັ້ງຢູ່ນະຄອນຫຼວງວຽງຈັນ. ລະບົບ 4Gນີ້ແມ່ນລະບົບເຕັກໂນໂລຊີຂໍ້ມູນຂ່າວສານ ແລະ ການສື່ສານລຸ່ນທີ 4, ຊຶ່ງເປັນລະບົບທີ່ທັນສະໄໝທີ່ສຸດໃນປັດຈຸບັນ,ມີຄວາມໄວສູງໃນການຮັບ-ສົ່ງສັນຍານເຖິງ 100Mbps, ສາມາດໂທລົມກັນແບບເຫັນໜ້າ, ເບິ່ງໂທລະພາບ, ສາມາດຮັບຮູ້ຂ່າວ ຕ່າງໆທັງພາຍໃນ ແລະ ຕ່າງປະເທດ, ແລະ ນໍາໃຊ້ອິນເຕີເນັດໃນໂທລະສັບມືຖືແບບ ສະມ໊າດໂຟ້ນໄດ້ຢ່າງສະດວກສະບາຍ ແລະ ວ່ອງໄວຂຶ້ນກວ່າເກົ່າຫຼາຍເທົ່າ. ນອກຈາກ ການໃຊ້ງານທົ່ວໄປແລ້ວຍັງລວມເຖິງການໃຊ້ງານລະບົບ Multimedia, ໂດຍມີຄວາມ ໄວເພີ່ມຂຶ້ນຫລາຍກວ່າ 3Gເຖິງ 5ເທົ່າ. ນອກນັ້ນ, ພາຍໃນງານຍັງມີການສາທິດການ ນຳໃຊ້ລະບົບອິນເຕີເນັດຄວາມໄວສູງເປັນຕົ້ນວ່າ: ການເບິ່ງໂທລະພາບແບບອອນລາຍ, ເບິ່ງວິດີໂອໃນຢູ່ທູ໊ບ ແລະ ການດາວໂຫຼດຂໍ້ມູນເປັນຕົ້ນ.
ຖ່າຍຮູບຮ່ວມຫຼັງງານຖະແຫຼງຂ່າວ
ລາວເປັນປະເທດທີ 2 ຖັດຈາກສິງກະໂປທີ່ເປີດນຳໃຊ້ ລະບົບ4G ໃນພາກພື້ນອາຊຽນ. ເມື່ອສຳເລັດກອງປະຊຸມສຸດຍອດອາເຊັມ ຄັ້ງທີ 9ແລ້ວ, ລະບົບ 4Gນີ້ຈະໄດ້ຂະຫຍາຍໄປໃນຂອບເຂດທົ່ວປະເທດລາວ ແລະ ຜູ້ນຳໃຊ້ 3Gຈະສາມາດຍົກລະດັບເປັນ 4Gໄດ້.
