ວັນທີ26ຕຸລານີ້,ຢູ່ຫ້ອງວ່າການລັດຖະບານທີ່ນະຄອນຫຼວງວຽງຈັນ,ໄດ້ຈັດພິທີລົງນາມໃນ3ເອກະສານການຮ່ວມມືລະຫວ່າງລາວກັບຈີນ, ຄື:ສັນຍາວ່າດ້ວຍການຮ່ວມມືດ້ານເສດຖະກິດເຕັກນິກ,ສັນຍາວ່າດ້ວຍລັດຖະບານຈີນຈະສະໜອງທຶນຊ່ວຍເຫຼືອລ້າໃຫ້ແກ່ລັດຖະບານລາວເພື່ອນຳໃຊ້ເຂົ້າໃນວຽກງານການຮ່ວມມືດ້ານຄວາມປອດໄພຕາມຂົງເຂດແມ່ນ້ຳຂອງ, ສານແລກປ່ຽນທີ່ຈີນຈະໃຫ້ການຊ່ວຍເຫຼືອການສ້ອມແປງປັບປຸງຫໍວັດທະນະທຳແຫ່ງຊາດແລະສານແລກປ່ຽນທີ່ລັດຖະບານຈີນສະໜອງທຶນໃຫ້ແກ່ໂຄງການສ້າງເຂດສີຂຽວຢູ່ຫໍປະຊຸມແຫ່ງຊາດ.ທັງສາມເອກະສານດັ່ງກ່າວ,ທ່ານສົມສະຫວາດເລັ່ງສະຫວັດ, ຮອງນາຍົກລັດຖະມົນຕີ,ປະທານຄະນະກຳມາທິການຮ່ວມມືລາວຈີນແລະທ່ານນາງປູ້ຈ້ຽນກົວ, ເອກອັກຄະລັດຖະທູດຈີນປະຈຳລາວເປັນຜູ້ຮ່ວມລົງນາມ.
ການເຊັນເອກະສານການຮ່ວມມືສາມສະບັບດັ່ງກ່າວໄດ້ເປັນການຢັ້ງຢືນຕື່ມອີກສາຍພົວພັນແລະການຮ່ວມມືຮອບດ້ານລາວຈີນຕ່າງຝ່າຍຕ່າງມີຜົນປະໂຫຍດທີ່ໄດ້ຮັບການພັດທະນາດີຂຶ້ນເລື້ອຍໆ ແລະມີປະສິດທິຜົນສູງ.
