ທ່ານເວີ່ນເຈຍປາວ,ນາຍົກລັດຖະມົນຕີຈີນເຈລະຈາກັບທ່ານທອງສິງ ທຳມະວົງ,ນາຍົກລັດຖະມົນຕີລາວ
ຕາມຂ່າວCRI:ວັນທີ 5 ພະຈິກນີ້,ຢູ່ທີ່ນະຄອນຫຼວງວຽງຈັນແຫ່ງປະເທດລາວ,ທ່ານເວີ່ນເຈຍປາວ,ນາຍົກລັດຖະມົນຕີຈີນໄດ້ເຈລະຈາກັບທ່ານທອງສິງ ທຳມະວົງ,ນາຍົກລັດຖະມົນຕີລາວ.
ທ່ານເວີ່ນເຈຍປາວກ່າວວ່າ,ຈີນຍິນດີຮ່ວມກັບລາວຮັບມືກັບສິ່ງທ້າທາຍນາໆປະການ,ທຳຄວາມພະຍາຍາມຢ່າງບໍ່ລົດລະເພື່ອເພີ່ມຄວາມສຸກໃຫ້ແກ່ປະຊາຊົນສອງຊາດແລະປົກປັກຮັກສາສັນຕິພາບແລະສະຖຽນລະພາບຂອງພາກພື້ນ.ຈີນກັບລາວຄວນປະຕິບັດຕາມຄວາມຮັບຮູ້ທີ່ໄດ້ຕົກລົງຮ່ວມກັນຂອງຜູ້ນຳສອງປະເທດຢ່າງຮອບດ້ານ,ເພີ່ມທະວີການແລກປ່ຽນແລະຮ່ວມມືກັນໃນທຸກຂົງເຂດ,ຊຸກຍູ້ການໄປມາຫາສູ່ກັນທີ່ມີໄມຕີຈິດມິດຕະພາບລະຫວ່າງປະຊາຊົນສອງຊາດ.
ທ່ານທອງສິງ ທຳມະວົງກ່າວວ່າ,ທ່ານເວີ່ນເຈຍປາວເດີນທາງມາຢ້ຽມຢາມລາວແລະເຂົ້າຮ່ວມກອງປະຊຸມສຸດຍອດອາຊີເອີຣົບຄັ້ງທີ 9 ຫຼືອາເຊັມ 9 ໃນໄລຍະທີ່ທ່ານກຳລັງກະກຽມກອງປະຊຸມໃຫຍ່ຄັ້ງທີ 18 ຂອງພັກກອມມູນິດຈີນ,ນີ້ໄດ້ສະແດງໃຫ້ເຫັນຢ່າງເຕັມທີ່ວ່າ,ຈີນໄດ້ໃຫ້ຄວາມສຳຄັນຫຼາຍຕໍ່ການພົວພັນລະຫວ່າງລາວກັບຈີນແລະສະໜັບສະໜູນລາວຢ່າງແຂງແຮງ.ລາວຍິນດີທຳຄວາມພະຍາຍາມຮ່ວມກັນກັບຈີນ,ເພີ່ມທະວີການແລກປ່ຽນທາງດ້ານການປົກຄອງປະເທດແລະບໍລິຫານປະເທດ,ຮັກສາການປະສານງານຢ່າງໃກ້ຊິດໃນວຽກງານພາກພື້ນແລະສາກົນ,ຂະຫຍາຍການຮ່ວມມືໃນຂົງເຂດເສດຖະກິດການຄ້າ,ວັດທະນະທຳແລະອື່ນໆໃຫ້ກວ້າງອອກ,ຮ່ວມກັນຕໍ່ຕ້ານອາຊະຍາກຳຂ້າມຊາດ,ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງລາວກັບຈີນໃຫ້ຂະຫຍາຍໄປໜ້າຢ່າງບໍ່ຢຸດຢັ້ງ.
ນາຍົກລັດຖະມົນຕີສອງທ່ານໄດ້ຮ່ວມກັນເປັນສັກຂີພິຍານໃນພິທີເປີດນຳໃຊ້ຫໍປະຊຸມແຫ່ງຊາດລາວແລະພິທີລົງນາມໃນສັນຍາການຮ່ວມມືທີ່ກ່ຽວຂ້ອງລະຫວ່າງສອງຝ່າຍ.
